Read Konyak Naga EZEKIEL 20 Bible Online

EZEKIEL 20 - Konyak Naga bible

EZEKIEL 20

¹Wangpeng nyit lekeng nga hüyange nyih pen shepupa nyih ne ngoh. Israellan mepu woipalan ütam Youngwanpawe mongpu jeng ü-phei teitonglak jingne pei, hüyange iman ü-sheshao me shot.

²Hüwante Youngwanpawe ü-phei ngao.

³“Hangko kahta,” Iye i, “Tüolan kahtate ngaotüoh hüyange Youngwanpa Kahwange inang she imante itüoh: Taowe mongpu hanghe ngoh tüopa tonglak jingne numan peipu no? Üting tingha me Tao üyin Kahwangne mengtepuwe, Taowe numante üte hango tongne yetamlak. Tao, Youngwanpa Kahwange ngaoyangki.

⁴“Imante ngaophün phalak jingne nange tümpu jeya, hangko kahta? Hümma-a phüntam tüoh; Iman jing payimlan-e lingpu nunushepu toishaolan imante teihne tamtüoh.

⁵Taowe hanghe inang imante itamtüoh. Aope Taowe Israel leyah, Taowe imante janpu ja pha. Egypt me Taowe ü-nying nyingke iman tangte ngai hüyange imante i: Taowa numan jing Kahwang Youngwanpa.

⁶Tüophei me jam, Egypt mepu iman yah ngailak jingne Taowe jan hüyange Taowe iman jingne lepu kahmük, üshei yo me shemeipupa, düamyeng hüyange zahtai jelo phei yünpu kahmük te woilak.

⁷Iman-e kenpu nunushepu peshaolan winlak jingne hüyange ütingpa yejepu Egypt kahwanglan phei iman nying nyingke yenulak jingne Taowe imante i, hangjingne Taowa imanjing Kahwang Youngwanpa.

⁸Hüpoi iman-e ü-phei tüi-e yong hüyange yejailak jingne lan. Iman-e iman jing nunushepu peshaolan yewintam yejema-a Egyptlan kahwang yetüoh. Iman-e ümongshihpu meimei-e Egypt yekao me minshing yahne Taowe tümyangki.

⁹Hüpoi, aoyin kahtalan yo me iman nyoi tüolan kahtalan shongme Taowe Israelte Egypt mepu iman Taowe woi teilak she shingne tamyangpute üte ye-i-yeshepu minmeng yah peilak ne ngohtepuwe Taowe yelingtam.”

¹⁰“Tüojingne Taowe iman Egypt mepu yah ngaiye phaonyu jongte woi.

¹¹Taowe imante ü-ngaokenglan pha hüyange imante ü-ngaokhümlan nyüowe tam, hangheye aoyinne tüopa te jailakei, moilante üyin phatam.

¹²Tomanpa me teijanpu füo ja ne, Tao Youngwanpawe tüolan-a üjaone menge tam she imante teihtüo tamlak jingne Taowe Sabbath nyüolak linge tam.

¹³Hüpoi phaonyu jongme nehoi iman-e ü-phei tüi-e yong. Iman-e ü-ngaokhüm meng hüyange ü-ngaokenglan minyah she lan, hangheye aoyinne tüopate jailakei moilante üyin phatam. Iman-e Sabbath lanshe nuweshakke tam. Iman-e ü-mongshihpu phaonyu jongme meimei-e minshingyah ne hüyange iman khongküm mahtamlak Taowe tümyange ngoh.

¹⁴Hüpoi Taowe Egypt mepu Israellan woiteipu ngeyangpu jatlan yome üte ye-i-yeshepu minmeng yahpeilak ne ngohtepuwe Taowe yelingtam.

¹⁵Tüokhei Taowe phaonyu jongme janpu ja ling hüke Taowe imante phapu kahmük düamyeng hüyange zahtai jelo phei yünpu üshei phei shemeipupa kahmükte iman yeteilak.

¹⁶Taowe janpu ja yah hangjingne ima-a iman-e ü-ngaokenglan yejonpe win, ü-ngaokhümlan menge tam, hüyange Sabbath jaoweshawe ye-ang, iman-e imanjing peshaolante yoppe khümlakpa lenge yah.”

¹⁷“Tüoyangpoi imante Tao shüpsheye teih; phaonyu jongme iman yetoilak she Taowe teih.

¹⁸Tüonanleiye iman phei ngohpu naoshelante Taowe deingao pha: Numan pajeiyonglan-e lingpu ngaokhümlan tahjon; iman-e nyüowe tüohpu wanglamte tahwoi yejema-a imanjing peshaolan-e numan nuweshakne tahtam.

¹⁹Taowa numan Kahwang Youngwanpa. Ü-ngaokhümlan hei ngaokenglan jaiyah.

²⁰Sabbath üjao nyih ne lingtamtüoh, hümme nakshih temanpa me jiengjeppu füo ja ne menglak, hüyange tüokaiye Taowa numan Kahwang Youngwanpa she teihtüone tamlak.”

²¹“Hüpoi nahalane-o ü-phei tüi-e yong. Iman-e ü-ngaokhümlan meng hüyange aoyinne tüolante ngao jai moilante üyin phatampu ü-ngaokenglan yejon. Iman-e nyüonyih jaoweshawe ye-ang. Iman-e ü-mongshihpu phaonyu jongme meimei-e minshing yah ne hüyange iman khongküm mahtamlak Taowe tümyange ngoh.

²²Hüpoi Taowe Egypt mepu Israel woiteipu ngeyangpu jatlan yo me üte ye-i-yeshepu minmeng yahpeilak ne ngohtepuwe Taowe yelingtam.

²³Tüokhei phaonyu jongme Taowe ülao janpu ja ling. Kahtoknyu üshei yekao me Taowe iman yanne tamlak she Taowe jiengjeppu ja yah.

²⁴Taowe tüopa ling hangjingne ima-a iman-e ü-ngaokenglan yeyah, ü-ngaokhümlan meng, Sabbath jaoweshawe ye-ang, hüyange imanjing pajeiyonglan-e shaoshanpu peshaolan jate muh yoppekhüm.”

²⁵“Tüophei me Taowe imante yemeipu ngaokhümlan hüyange üyin yephatamlak ngaokenglan pha.

²⁶Taowe iman nying nyingke iman-e dopuwe nuweshakne tam, hüyange imanjing üwangpa hayimlan toidolak jingne tam. Hatüowa imante shaoshiyateng phalak jingne hüyange Taowa Youngwanpa she imante shingne tamlak jingne ling.”

²⁷“Sha-a hüma-a, hangko kahta, Tao, Youngwanpa Kahwang, Taowe imante hanghe inang Israellante itüoh. Imanjing payimlan-e iman üting yelak okpuwe üte yaowelepu ülam ja hüopu ngoh nang.

²⁸Taowe imante phalak she janyangpu kahmükte Taowe iman yahpei. Aope iman-e shedaopu kahtanglan hüyange pee ü-hünglan nge, iman-e tüolan khongkümpu me toidopulan pha. Iman-e toidopu jakpuwe hüyange dopu ne iman-e yahpeipu wuwüngtilan-e Tao mongshih ngaine tam.

²⁹Taowe imante tong: Ümeken me numan taiyapeih tüolan shedaopu nyoijinglan-a hanghe shi? Tüokhei tüonyih me peiye iman-e tüopate ‘Shedaopu nyoijinglan she nyik.’

³⁰Sha-a Tao, Youngwanpa Kahwange Israellante hanghe inang itamtüoh: Hangne numan payimlan-e linge ompu ünu jamuh numan-e omne hüyange imanjing peshaolan pheite phette woilak shi?

³¹Tenyih nehoi numan-e hünghao ja muh pha nang hüyange numan hayimlan imante vün me toidowe tüopa peshaolan jatemuh, phapu kaiye numan nying nyingke nuweshak nang. Hüyangpoi numan Israel lan-a Taowe mongpu hanghe tonglak jingne yelakpe peinang! Üting tingha me Tao, Youngwanpa Kahwang, Üyin Kahwangne mengtepuwe, Taowe numante üte hango tongne yetamlak.

³²Numan-o ülao jatlan kih-e ngohhuwe numan kenmong me, ülao kahmük me aoyin nyoiyapeih tüolan kahta kih-e hüyange longnyu hei pejünglante yoppe khümlak tümyangki. Hüpoi tüopa-a aope-o yejelak.

³³“Üting tingha me Tao, Youngwanpa Kahwang, üyin Kahwangne mengtepuwe, hüke ü-mongshih puwe, wongnangpu yakke, ü-üngan wong üsheiye Taowe numan tangme wanglam lamlak she Taowe deingao phanang.

³⁴Aope Taowe numan jamshe shaijemlakei hüyange ümeken me numan yanne tamyangki tüolan jatlan üshei mepu numan yah yelakei, Taowe numante ü-üngan wong hüyange mongshihpu hüolak.

³⁵Taowe numan-a wanwüngjeng jatlan yote yah peilak, hüyange tüoken me Taowe numan sheta phei teihüowe ngaophünlak.

³⁶Sha-a Taowe numanjing payimlan te Sinai wanwüng jeng me ngaophünne tampu kih-e numante ngaophün pha nang,” she Youngwanpa Kahwange inang.

³⁷“Taowe numante wongnange mongjüonge jonlak hüyange numan-e ü-jiengjeppu jaine tamlak.

³⁸Numan yo mepu aoyin hokkewe hüyange ünu ling Taowe yahteilak. Ümeken me iman sha-a nyoiye ngohnang tüopa kahmük mepu Taowe iman yah teilak, hüpoi Taowe iman-a Israel kahmükte leih yene yetamlak. Hüwante numan-e Taowa Youngwanpa she shinglak.”

³⁹Youngwanpa Kahwange i, “Sha-a pa-a numan Israellan khongkümpuwe numan nying nyingke nangyah! Yelakpe numan jing peshaolan shaoshan yah! Hüpoi Taowe numante deingao pha nang hüke tüophei pama-a numan-e üte jailak hüyange numan jing peshaolante dopu hünghao phawe ü-üjaopa min ye-i-yeshepe lingpu laktüoh.

⁴⁰Tüoken kahmük, ü-üjao kahtang, Israel shedaopu kahtang me, numan Israel kahtalan khongkümpuwe üte yoppe khümlak. Taowe numante monghahlak hüyange numan mepu üte toidopu, numan jing shemeipupa dopu, hüyange numan jing üjao hünghao tüolak she monghümlak.

⁴¹Ümeken me numan yanne tam hüyange numan jamme jemne tam, tüolan kahmüklan mepu Taowe numan yahpei yang phei me, numan-e toidowe jakpu Taowe yahlak, hüyange jatlan-e Taowa üjaopa she ngeye oklak.

⁴²Numan pajeiyonglante Taowe phapu oklakei she janpu Israel kahmükte aope Taowe numan yah yelakei, hüwante numan-e Taowa Youngwanpa she shinglak.

⁴³Hüwante numan-e lingyangpu mong yehahpu toishaolan khongküm hüyange hanghe numan-e numan nying nyingke nuweshakke tam teihtüolak. Numan-e lingyangpu ünu toishao khongkümpu jingne numan nying nyingke nuwe teihlak.

⁴⁴Aope Taowe ü-wangshüm tükke anglak jingne linglakei, numan Israellan-e Taowa Youngwanpa she shinglak, hangjingne ima-a numan-e lingyangpu ünu toishao phei shuwe numan jing ünu phei Taowe yejon.” Youngwanpa Kahwange ngaoyangki.

⁴⁵Youngwanpa ngao üte pei:

⁴⁶“Hangko kahta, heyete leitüoh. Heye te tüi-e ngaotüoh hüyange heye phao te tüi-e hi-ngao ngaotüoh.

⁴⁷Youngwanpa Kahwange hanghe inang jailak jingne heyekao phaote itüoh: Leihuyah! Taowe vün ja ükongwang nang, hüyange tüopawe nangme ngohpu pephao lili, ühüng jeyah üli jeyah hahlak. Hanghe-o tüopa-a meine ye-oklak. Tüopa-a heye mepu apye ngoiye yanlak, hüyange moilan-e tüopa vünloonge sheampu ponglak.

⁴⁸Hüke Tao, Youngwanpawe vün pahtam hüyange tüopa-a aowe-o yemei ok she iman khongkümpuwe ngelak.”

⁴⁹Hüpoi taowe lanne i, “Youngwanpa Kahwang, tüopa üte lingne tahtam pha! Hipak phe me taowe-a leppu ja hei inang she moilan-e ngaohümnangja.”