Read Konyak Naga EZEKIEL 21 Bible Online

EZEKIEL 21 - Konyak Naga bible

EZEKIEL 21

¹Youngwanpa ngao ü-tangte pei:

²“Hangko kahta,” Iye i, “Jerusalemte tüi-e ngaotam tüoh. Ümeken nyoijinglan me kahtalan-e yoppe khüm, tüopate tüi-e ngaotam tüoh. Israel kahmükte deingao phatüoh;

³hüke Tao, Youngwanpa Taowe inang: Taowa numan wepa. Taowe ü-yanglow nolak hüyange numan khongküm ümeng hei ümei moilan toilak.

⁴Hangjingne nang mepu khakshupulan hei ümenglan taowe lange winlak; tüokhei Taowe ü-yanglowa apye mepu heye ngoiye moilan phei tüi-e jonlak.

⁵Tao Youngwanpawe ü-shankhong mepu teakke yahteki hüyange hatüowa Taowe nishe leppe yeyelak she moilan-e shinglak.”

⁶“Hangko kahta, nang mongjanga mongmeng puwe paikhoihpu kih-e shaphuleih tüoh. Ümeken me kahta liliye nangte leilakei tüoken me mongmenge shaphuleih tüoh.

⁷Aope iman-e nangte hangne shaphuleihpu shi she tongma-a, hangjingne ima-a peikülak ngaolan ngohtepuwe she imante itüoh. Aope tüopa peilakeih, iman jing mongjanga nyampuwe maalak, imanjing yak-a mang teiye jhotlak, iman hoongli mongongpuwa mahlak, hüyange imanjing yatuh ninlak. Hipak-a peiteki, tüopa-a yashong me.” Youngwanpa Kahwange ngaoyangki.

⁸Hüyange Youngwanpa ngao üte pei,

⁹“Hangko kahta, hi-ngao itüoh. Tao, Youngwanpa Taowe hanghe inang kahtalante itüoh: “Yanglow ja, yanglow ja-a yieteki hüyange shitteki.

¹⁰Hatüowa toilak jingne yieteki, wanglüppu kih-e lüplak jingne shityangki. Mongong monglepu shaaji yenanglak, hangjingne ima-a ü-kahtalan-e deingao phapu, hüyange shaoshiyateng phapu lilite ye-i-yeshepe lingyangki.

¹¹Yanglow-a jonlak jingne tümlakne shitte tümyangki. Tüopa yiepu hüyange shitte tümpuwa toitamlakpa yakme shümme tamlak jingne!

¹²Hangko kahta, mongshang mongmengpu phei üngwüntüoh; tüopa yanglow-a ü-kahtalan phei tüi-e hüyange Israel woipalan khongkümpu phei tüi-e! Ü-kahtalan khongkümpu phei iman-a toitamlak. Monghümlak yenangpe nang jakuhte tüptüoh!

¹³Taowe ü-kahtalante tokke leinang, hüyange iman-e monglüplak jingne yemongma-a, tüolan khongkümpu imante ngailak.

¹⁴“Hangko kahta, sha-a hi-ngao itüoh. Nangjing yakfa khok tüoh, hüyange yanglow-e metkhan metlak. Hatüowa toitampupa yanglow, nyamlakpa hüyange mette-lange taipupa yanglow.

¹⁵Tüopawe ü-kahtalan mongyong ne yetam hüyange yashah hüowe tamnang. Wang phihlangpu kihpu yanglow phei Taowe iman jing chingnyute nyamshao nang hüyange tüopa-a toilak jingne tümteki.

¹⁶Nang pahpu yanglow, yaknya hüyange yakjah yete met tamtüoh! Ümpehe yekaote nang lüplakei mettamtüoh.

¹⁷Taowe-o ü-yakfa khoklak, hüyange ü-mongshihpuwa mongme hulak. Tao, Youngwanpawe ngaoyangki.”

¹⁸Youngwanpa ngao üte pei.

¹⁹“Hangko kahta, Babilon ahngpa I jing yanglow phei peilak jingne lamnyu ni minsangtüoh. Moini-a kahmük ja mepu muh ükong wanglak. Ümeken me lampong phatte yanyapeih tüoken me füophao yongtüoh.

²⁰Lamjawe ahngpate Ammonlan chingnyu Rabbah te tailam, hüyange ülao japawe meipe latyangpu Judah chingnyu Jerusalemte tailam.

²¹Babilon ahngpa lam phatpong füophao yongpu ken me yong. Ümpehepa tailam me tailam shinglak jingne Iye lahhante po; Iye yoijing peshaolante üpongyam; Iye toidopu yinmok mongphangte tokke lei.

²²Sha-a, I yakjah yeme Jerusalem jingne minsang angpu lahhan jon! Tüopawe Ite tailak jingne hüyange jan khüwlak linglak jingne, shapju haapu wünlak jingne, petenlan me jankhüwlak anglak jingne, kahtok toi linglak, hüyange jhom shaowe tümlak jingne inang.

²³Iman-e teijanne linge peiyangpu nanjingne Jerusalem kahtalan-e tüopate üting yelaklak. Hüpoi tüopa itte ngaowe tampuwa iman jing ünulan teihtamlak jingne hüyange iman-a pho eija she deingao phalak jingne ngohyangki.

²⁴Tüojingne Tao, Youngwanpa Kahwang, Taowe inang. Numan jing ünulan-a ngaiye hüonang. Numan hangshin püohpinpu numan moilan-e shingnang. Numan-e numan ünuwa numan-e lingpu toishao lili me nge. Numan-a winne tüohyange ngohnang, hüyange numan jing wepalante Taowe numan phünne phalak.”

²⁵“Numan ümenglan, yejaoyeshapu Israel wanglam lampalan, numan jing nyih, numan jing ükümpa shaoshi yateng tamlak nyih peiküki.

²⁶Tao Youngwanpa Kahwange ngaoyangki; numan jing ahngpa shaoshaoh hüyange shangnyeih khek khoktüoh. Nishe yakjüngme aope-o yengohlak. Üphang palan nowe intüoh! Hüyange aoyin wanglam lampalan-e ngoh yeitamtüoh!

²⁷Heampu, heampu! Üting, Taowe chingnyuwa heam ne tamlak. Hüpoi chingnyute shaoshiyateng phatamlak jingne Taowe ao leyapeih tüopa manpei manpei tüopa-a yengailak. Tüophei me Taowe tüopa-a Ite phalak.”

²⁸“Hangko kahta, hi-ngao itüoh; Tao, Youngwanpa Kahwange, aoyinne Israelte teetam nang, tüolan Ammonlante hanghe i shingne tamtüoh. Imante itüoh: “Mahtamlak jingne yanglow tümteki; toilak jingne hüyange wangphihlangpu kih-e lüplak jingne shitte photeki.

²⁹Numan-e ngehümpu himanglan-a ngaoleih, hüyange numan-e itte ngaohümpuwa tahleih ngohnang. Numan-a ümeng hüyange ünu, hüyange numan jing nyih, numan jing ükümpa shaoshi yatengpu nyih peiküki. Yanglow-a numanjing üng me hütkülak.”

³⁰“Yanglow-a shankhong me leaptamtüoh! Ümeken nyoi me numan linge ngai, hüyange ümeken kahmük me numan puh tüoken nyoi me Taowe numan ngao phünlak.

³¹Aope numan mepu ü-yak jolakei, vün phihlangpu kih-e numan-e ü-mongshihpu hüolak. Hüyange Taowe numan-a mahtamlak te okpu ngepu mengshipu kahtalan yakte phünne phalak.

³²Numan-a vünne mahtamlak. Numan jing iy, numan jing yoi kahmük me shailak, hüyange numan-a shaaji aowe-o yeteih tüolak.” Youngwanpawe ngaoyangki.