Read Konyak Naga EZEKIEL 22 Bible Online

EZEKIEL 22 - Konyak Naga bible

EZEKIEL 22

¹Youngwanpa ngao ü-tangte pei.

²“Hangko kahta, toilangpuwe maawe ngohpu chingnyute ngaophünlak jingne nange tümtekü a? Yhawe lingyangpu nunushepu toishao lili yhate meimei-e teihne tamtüoh.

³Tao, Youngwanpa Kahwang Taowe hanghe inang chingnyute itamtüoh: Nange nang pheipu yoi kahtalan teshinne toiyangpu jingne hüyange peshaolante yoppekhümme nang nying nyingke nuyangpu jingne, nang jing hipak-a peiküki.

⁴Toiyangpulan hüyange nange lingpu peshaolan-e nuwe tampu tüolan kaiye nanga püoh nang; tüojingne nangjing nyihlan-a peiküki, nangjing hipak-a linteki! Tüojingne Taowe jatlante nangte phoiwümlak jingne hüyange kahmük liliye juja ne mengyange nangte yaone tam.

⁵Üjai me hüyange ü-o me ngohpu kahmüklan-e nangme hango wanglam yenangpu nanjingne nangte juja ne mengyange yaowelelak.

⁶“Israel woipalan khongkümpuwe imanjing yoi wong te monghüm hüyange iy shaipu ünu om.

⁷Chingnyu me yoi nyupalante wangshüm hüopu sheja nehoi yenang. Numan-e yinpalante lowelam hüyange wamnyulan hei khah-ha lante yeshupe jon.

⁸Numan-e üjao nyoijinglan jaowe shawe yejon hüyange numan-e Sabbath ye-ang.

⁹Numan yo mepu kahta ütam-e iman iy shaitamlak jingne ülaolan jingne tahleih i; Ütam-e peshaolante toidopu hah. Ütam-a hipak phe me iman iy meiye mongpu monghah ne tam.

¹⁰Iman ütam-a imanjing üpalan sheko phei shi. Ütam-e shekolan iman nushakpu hipak me iman phei toimeng linglak jingne kang.

¹¹Ütam-e phwngngam, hüyange ülaolan-e imanjing hayim sheko (nyemnya) yejema-a pa me jampu yoi nya-naolan ünyong yete woi.

¹²Numan ütam-e ngin jingne iydak shai; ütam-e iman pheipu Israel lante nginsea phayangpu jingne shompu yah hüyange imante hüke lingpuwe hakpa ne meng. Iman-e Tao pemeiteki.” Youngwanpa Kahwange ngaoyangki.

¹³“Leihuyah, nange ngaoting ye-i-pe küotüopu jeng me hüyange numan-e kuhleihpu hüyange iy shaipu tangme Taowe ü-yak tümp hünglak.

¹⁴Aope Taowe numan tangme mahtamlakpa peilakeih, numan me lahnyikpu towe ngohlak yejema-a numan yak nowe oklak ne wong wangngoiye ngohlak she numan-e teihnangkü a? Tao, Youngwanpawe ngaoyangki, hüyange Taowe ü-ngao angnang.

¹⁵Taowe numan kahtalan kahmük hüyange jat lili me yanne tamlak hüyange numan jing ünu toishaolan üküm ngoine tamlak.

¹⁶Tüo kaiye ülao jatlan-e numante yaowelelak, hüpoi numan-e Taowa Youngwanpa she shinglak.”

¹⁷Youngwanpa ngao üte pei,

¹⁸“Hangko kahta, Israellan-a üjingne wongpong ne yemengpe taiteki. Iman-a vünjüo me khüm jaowe yahyange tüohpu-laang, tamp, yan, hüyange leag winyangpu yan kih-e ngohnang.

¹⁹Tüokhei sha-a, Tao Youngwanpa Kahwange imante inang hüke iman-a tüolan meimei kih-e yemei. Taowe iman-a khongkümpu jamshe Jerusalemte yahpeilak,

²⁰hüke khüm, laang, yan, leag, hüyange tamp jaowe tamlak vünjüo me ange tampu kih-e angtamlak. Ü-mongshihpu hüyange mongshih ngaipuwe vünne yankahtok juwe tampu kih-e iman juwe tamlak.

²¹Üting, Taowe iman Jerusalem me shaijemlak, iman tangme vün jakke tamlak, hüyange ü-mongshihpuwe iman juwe tamlak.

²²Vünjüo me khüm jupu meimei kih-e iman Jerusalem me julak, hüyange tüophei me iman-e Youngwanpa mongshihpu hüonangki she teihlak.”

²³Youngwanpa ngao üne-o üte pei.

²⁴“Hangko kahta,” Iye ngaowe i, “Iman kahmük-a hüke yejao, she Israellante itüoh, tüojingne Taowe ümong shih puphei shaoshiyateng pha nang.

²⁵Woipalan-a iman-e toiyangpu yinmoklan tangme yengkong mailanglan waopu kih-e ngohnang. Iman-e kahtalan toi, iman-e okpu shinne ngin hüyange toinyunanha yah, hüyange iman-e toilangpu kaiye wamnyulan üngang tüoh.

²⁶Ngengpalan-e ü-ngaokhümlan meng hüyange hanghepa üjao ngohnang tüopa jingne wangshüm hüopu yenang. Iman-e hanghepa üjaopa hüyange hanghepa yeje yoiyoi tampu ye-ok. Iman-e yejaopu hei jaopu nipa me hanghe yoi yoi nyüowe tampu ye-ok, hüyange iman-e Sabbath ye-i-yeshepe ling. Tüokaiye Israel kahtalan-e üte ye-i-yeshepe ling.

²⁷Sokali üyih üyonglan-a, iman-e toiyangpu yinmoklan phünne hitpu sholan kih-e ngohnang. Iman haklak nanjingne iman-e iy dak shaiye ünu om.

²⁸Kahtalan-e jant te shunne shitte phowe büangpu ja leye hipalan-e yoi ünu lo-nangki. Iman-e tahleih himang nge hüyange itpu pienne phanangki. Iman-e Youngwanpa Kahwang ngao ngaonangpu ne she i, hüpoi Tao, Youngwanpawe iman phei yengao.

²⁹Hakke yongpalan-e lowelam hüyange kuhleih. Iman-e toinanpalante yemeipe ling hüyange yinpalante lahnyikke yemeipe jon.

³⁰Ü-mong shihpuwe menge winlak ne ngohwante aowe jantpenyu linge yelak, ümeken yinme jantpenyulan khüwteiye ngohnang tüolan nyoi me ao yonge oklak hüyange kahmük-a yinne oklak she Taowe ütam ja ngohya shi she lei, hüpoi Taowe ao-o yetüo.

³¹Tüokhei taowe iman tangme ümongshihpu ngaine tamlak, hüyange iman-e hanghe lingyangki tüopa jingne vün ne shupu kih-e Taowe iman mahtamlak.” Youngwanpa Kahwange ngaoyangki.