Read Konyak Naga EZEKIEL 23 Bible Online

EZEKIEL 23 - Konyak Naga bible

EZEKIEL 23

²“Hangko kahta, hipakja me nyuyong ja mepu Inya Inao ni ngohyangki.

³Hüyange iman-e Egypt me üshoyüopu jon; iman yhashaoha me iman-e üsho yüo, tüome iman düam te phit, hüyange tüome iman wangngoipu jakuh me tük.

⁴Nyayongnyu te Oholah she min (Yha-a Samaria nanleinyu), hüyange naolinyu te Oholibah she min (yha-a Jerusalem nanleinyu). Taowe imni moini phei nokne meng, hüyange imniye üte moipaiye tam.

⁵“Yha ü-jingne mengyapoi, Oholah-e üshoyüopu yelak hüyange Assyria mepu mailan phei yhawe iy meiye mongpu ütahte ngaine tam.

⁶Iman-a nye ümang (inkhek ümang) jakihpu yahyang phei wetaipalan, lwngwang naomei hüyange woipa ütahlan shaha; iman moilan; koipong tok me shotpu wongnangwan woipalan shaha ne ngoh yangki.

⁷Hüyange yhawe iman tangme ünyei yahhuwe ngai, iman khongküm Assyrialan leyangpu lan; hüyange ao te yhawe uhyinge pei, iman jing peshaolan khongküm puphei yhawe yoi nying nyingke nuweshak.

⁸Ümeken me yhawe yoi jaowe shapu mahyahpei, yhawe Egyptme hanghepa üshoyüopu wangyapeih, yhawe yelakpe ling. Yha naoyha ne mengpu hipak mepu kahtalan yha phei shi hüyange yha-a üshoyüonyu ja ne jon.

⁹Tüokhei Taowe yha-a yhajing Assyria mailan yhawe aoyin loishe yahhu imante phünne pha.

¹⁰Iman-e yha-a pümkeng me khokke tam, yha jing shelalan hei yhalalan phowe yah, hüyange yanglow phei yha toi. Ükenphe mepu shekolan-e yha yatuhshao jeng ngaowe jemnang.

¹¹“Inao Oholibah-e tüopa ngeyange-o, yha ünyei menge ngai hüyange Oholah-e linge ngohpu phei shenyei she üshoyüonyu ne meng.

¹²Assyria lwngwang naomeilan hei üyih üyonglan jakihpu oleng shemeiyaomapu phei yahyangpu wetaipalan, hüyange koipong tokme ongpu woipalan, pümheita wang ngoipu naoshelan phei yha-o iy meiye yah hupuwe maawe ngoh;

¹³Yha-a lanshe iymei phei, hüke inaowa Inya hangshin meng teshinne menge Taowe nge.

¹⁴“Yha-a shelu shelu she yha yejao yeshapu me hünge ta. Babilon woipa ütahlan jantpenyu tangme iman mieng (Peshao) lan lingyange taakpuwe phihlange phoyange,

¹⁵iman shiengpong me shiengnye ümei hüyange iman shangme oleng pheipu shangnyeih khek-e nyeihyange müklei me üyonglan kih shaha, nyupuh kahtok Chaldea me Babilon-e yha-a naiyangki.

¹⁶Yhawe iman ngepu phei jamshe yha ünyei yah hupuwe maa, hüyange iman tangte ngaolan kipalan Babilonte shonne tei.

¹⁷Yha phei shüppe jailak jingne Babilonlan pei. Iman-e yha jon hüyange yha-a loishe nuweshakke tam tüo kaiye ükümne imante yhawe yeleihupe nu.

¹⁸Yha yoi nying nyingke ükote weakpan-e hüo, hüyange yha ükeng me ngoh nang she moilante shingne tam. Inyate nupu kih-e Taowe Ite-o nuyangki.

¹⁹Tüoyangpoi yha üshongwantepu phei shenyei she üsho yüo, ya naoyha wante aope Egyptme yha üshoyüonyu ne ngoh tüo mei mei kih-e yhawe ling.

²⁰Yha-a loishe shüppe jaipu jupengjong üyong ngohpu kahtalan kih-e hüyange koipong lahnyikpu kihpuwe maayange ngoh yangki.”

²¹Oholibah, nang Egypt me naoyha ne ngohwante iymeiye mongpu lingyangpu üne-o linghu nang, ümeken me kahtalan-e nangjing düamte jonnepai hüyange nange nang üyin jaowe shapu ye-ang okpe mah.

²²“Sha-a hüma-a, Oholibah, hatüowa Tao, Youngwanpa Kahwange nangte hanghe i tüo ngohnang. Nanga tüolan nangmai lan-e eangteki, hüpoi Taowe iman-e nang phei mongshih ngaine tamlak hüyange nangte neikonlak jingne iman yahpeilak.

²³Taowe Babilonlan hei Chaldealan khongküm, Pekod, Shoa, hüyange Koa mepu kahtalan, hüyange Assyrialan khongkümpu yah peilak. Taowe pümta wangngoipu lwngwang naomei wongnangpalan hüyange woipalan, woipa ütahlan khongküm hüyange koipong tok me shotpu ütahpalan khongkümpu Taowe shaiye jemlak.

²⁴Iman nang phei tüi-e nyahponglan üngang pong tongtoi phei hüyange tongtoilan phei apyekao mepu nangte shümlak. Ree hüyange yan shaoshaohwe tienyange, iman-e nangte neikonlak. Taowe nanga imante phünne phalak, hüyange iman-e nangte imanjing yoi ngaokhüm phei ngaophün phalak.

²⁵Hangjingne Tao nangphei mongshih ngai nang, iman mongshih ngaipu phei Taowe iman-e nang phei ngaone tamlak. Iman-e nangjing nateang hüyange na langne tamlak hüyange nanghalan toilak. Üting, iman-e nangmepu hala hüyange yhalalan yahlak hüyange iman-a üyin me vün me jakke tamlak.

²⁶Iman-e nangjing inkheklan hitte tamlak hüyange nangjing juyük khokke tamlak.

²⁷Hüke nang iymeiye lengpu lakne tamlak, hüyange Egypt kahmük mepu yahpeipu nang nuweshakpu nang mepu Taowe lakne tamlak: tüojingne nange nang mük iman tangte nganne yeleitamlak, yejema-a shaaji Egypt teihtüone yetamlak.”

²⁸Hatüowa Kahwang Youngwanpawe hanghe i tüo ngohnang: “Taowe nanga nange nupu hüyange yeleihupe teihpu kahtalan iman yakte phünne phalak.

²⁹Iman-e nangte nupu jingne hanghepa jingne nange toi lingyangki, nangme ngohpu khongkümpu iman-e yah-e teilak hüyange nanga pümkeng me khokke tüohlak, üshoyüonyu kih-e ükote ngaiye tüohlak. Nang iymeiye lengpu hüyange yüoweleihpuwe,

³⁰tüopa-a nang tangte yah peinang. Nanga jatlante üshoyüonyu ne ngoh hüyange iman jing peshaolan-e nang nying nyingke nuweshak yangki.

³¹Nange nangnya yamee me kem, tüojingne Taowe nangte jakihpu shaoshiyatengpu wan yinglak jingne phalak.”

³²Youngwanpa Kahwange inang, “Nange nangnya jing wan me yinglak; tüopa-a khaowe hüyange lulüngpu wan; moilanne nangte nyiye hüyange phoilak; wan-a maayange ngohnang.

³³Tüopawe nangte nyamnyamshe hüyange jokne tamlak, nyampu hüyange heamlakpa wan, nangnya Samaria jing wan.

³⁴Nange yinglak hüyange shoktampuwe jüpne tamlak, hüyange paiyangpu ükhüwlan-e nangjing düamte kaklak. Tao, Youngwanpa Kahwange ngaoyangki.”

³⁵Sha-a hatüowa Youngwanpa Kahwange hanghe i tüo ngoh nang: “Hangjingne ima-a nange Tao pe-mei hüyange üte nang tok shong, nange nang iymei hüyange nange üshoyüo yangpu jingne nange shaoshilak.”

³⁶Youngwanpawe üte ngao, “Hangko kahta, Oholah hei Oholibah nite ngaophünlak jingne nange tümtekü a? Iman-e lingyangpu nunushepu toishaolan jingne iman yeine tamtüoh.

³⁷Iman-e phwngngam-e hüyange iyshai-e ünu omyangki, peshaolan phei phwngngam hüyange iman-e puhpu hayimlan toilang yangki. Iman-e ü-hayimlan imanjing peshaolante toiye doyangki.

³⁸Iman-e lingyangpu khongkümpuwa tüolan shaha ne yeje. Taowe hanghepa linge ang, iman-e ü-khümjing nuwetam hüyange Sabbath menge tamyangki.

³⁹Iman-e ü-hayimlan peshaolante toidopu phane toipu nyih, iman ü-khümjing te pei hüyange tüopa nuwetam!

⁴⁰“Kahmük üjai mepu kahtalante nyiklak jingne iman-e yelakpe shongshonpalan shonne tei; hüyange kahtalan pei. Inya Inao niye yeng yüowe tüm hüyange mükshopte nyan hüyange juyük yah-e tüm.

⁴¹Shemei yaomapu taleng me, hüyange iman sheshao me toimei lamme maayange khao ja Taowe imante phapu üpeameipu hüyange olive minnga nangyange iman shon.

⁴²Hango yeteihpu ükhong ngaowüng, wanwüng jeng mepu yahpeipu kahta ükhong wüng jailak. Iman-e shekolan yaksea me wentong lange tamlak hüyange iman shang me shemei yaomapu ahngpa shaoshaoh shaoh-e tamlak.

⁴³Hüyange taowe ü-nying nyingke üte i, hüke iman-e phwngngam-e mengtephei sheko ja üsho yüonyu ne jon nangki.

⁴⁴Tüolan üsho yüonyulan tangte iman sha-a sha-a leih yenang. Tüolan iymei pheipu shekolan Oholah hei Oholibah tangte iman leih yenang.

⁴⁵Khakshupu kahtalan-e imante phwngngampu hüyange iyshaipu jingne ümeng phalak, hangjingne iman-e phwngngampu ling hüyange iman jing yak-a iy phei lüpyange ngohnang.”

⁴⁶Hatüowa Youngwanpa Kahwange hanghe i tüo ngohnang: “Iman phei tüi-e nyamshaowe tamlak hüyange kuhleih-e tamlak jingne mopjoppu ükhong ja peilak.

⁴⁷Mopjoppu ükhonge imante longe shüpne tamtüoh hüyange yanglow phei imante shümme tamyange iman hayimlan toitam tüoh, hüyange iman jing noksalan jakke tamshih.

⁴⁸Kahmük nopu me iymei mongpu toi lingpu Taowe lakne tamlak hüke iman-e lingne ngohpu phwngngampu yelinglak jingne sheko lilite deingao ja ne phalak.

⁴⁹Hüyange nang nyanao ni numan yejaoyeshapu jingne hüyange peshaolante numan-e yoppe khümpu ünu jingne Taowe numante shaoshiyateng phalak. Hüwante nakshih numan-e Taowa Youngwanpa Kahwang she shinglak.”