Read Konyak Naga EZEKIEL 24 Bible Online

EZEKIEL 24 - Konyak Naga bible

EZEKIEL 24

¹Wangpeng tu, lekeng pen, nyih pen shepupa leat me Youngwanpawe ü-phei ngao.

²“Hangko kahta, tenyihpu nyih nyantüoh, hangjingne ima-a Babilon ahngpawe Jerusalem omlak jingne ükongwangpuwa tüopa nyih ngoh nang.

³Hokkewepu ü-kahtalante, hüke Tao Youngwanpa Kahwange iman jingne tüopa leppu ngohnang she itüoh: “Vün tangme tüknyu jantüoh hüyange tüopa-a yenge maatam tüoh.

⁴Tüopa me shemeipupa mei ühak hüngtüoh, phakpong hüyange yashoklan, leyange angpu üwaan, üsho ü-nowe tüopa maatam tüoh;

⁵shemeipupa nyeeha mei hüngtüoh; tük phang me han phonge tamtüoh. Yeng hokne tamtüoh; mei ühak hei üwaanlan yangne tamtüoh.”

⁶Tüokhei Youngwanpa Kahwange hanghe i, tüo ngohnang: “Toilangpu chingnyuwa mahnang! Hatüowa aope-o yewaopu shitte hahpu tüknyu kih-e ngohnang. Ü-oun ja phei me ü-oun ja she, ja nehoi towe yetüohpe lüppe yahkümnang.

⁷Chingnyu me toilangpu ngoh, hüpoi kahmakke linne mahtamlak ne iy-a kahtokme yeshai; hatüowa longnyu üko tangme shaitam.

⁸Taowe iy-a tüopa longnyu tangme, ümeken me tüopa yelo ok, ümeken me mongshih ngaiye phuh hahlak yam tüoken me tüoh nang.”

⁹Tüokhei Youngwanpa Kahwange hanghe i tüo ngoh nang: “Toilangpu chingnyuwa mahnang! Ü-nying nyingke Taowe han-a phonge tamlak.

¹⁰Han üngang süngtamtüoh! Vünloong te yüptüoh! Mei yangtam tüoh! Hoiyeng jüpne tamtüoh! Üwaanlan khaine tamtüoh!

¹¹Sha-a shakphanyan tük ükeng vün oun tangme angtamtüoh hüyange tüopa-a taakke sheamne tamtüoh. Tüophei me nakshih shitte hah shuyang phei me tüopa tük-a nishe jaowe yekülak;

¹²Vünloong me shitta khongkümpu ye-ngepe yelak ei yangpoi jaolak.

¹³Jerusalem, nang yejaoyeshapu toishaowe nanga nuweshakke tamnang. Ümongshihpu nange wongnange manpong manpong nang nishe jaone ye-oklak.

¹⁴Tao, Youngwanpa Kahwange ngaoyangki. Toi linglak jingne üte hipak peiteki. Taowe nang ünulan hüke yetüohlak yejema-a yayeng yehüolak yejema-a shüpsheye yeteihlak. Nange hanghe lingyangki tüopa jingne nangte shaoshiyateng phalak.” Youngwanpa Kahwange ngaoyangki.

¹⁵Youngwanpa ngao üte pei.

¹⁶“Hangko kahta, ja me shetpuwe nange ünyei shekenpupa kahta Taowe yah teilak. Nange tüopa jingne ngao yengailak yejema-a üng yewünlak yejema-a mükphi hango yeyinlak.

¹⁷Ngao yengaipe mongmeng tüoh, lipu nyu jingne mang tahshap; nang shangnyeihkhek shatüoh, hüyange nang ya me yashom shomtüoh; nang jumin tahsa hüyange mangshappe hahying tah-hah.”

¹⁸Tüokhei shomme taowe kahtalan phei hüke ngao. Tüonyih ünpong me ü-shekonyu li, hüyange üne nyih üte hangke ngaowe tam hüke taowe ling.

¹⁹Kahtalan-e üte tong, “Hangjingne nange hüke linge hüopu tomante ye-ilak a?”

²⁰Tüokhei taowe imante i, “Youngwanpawe üte ngao hüyange üte,

²¹tüopa ngaolan numan Israellante phalak jingne i: Khümjing wongnangpu jingne numan ota-nang. Numan-e tüopate leihu nang hüyange tüote peiye ngoh hunang, hüpoi Youngwanpawe tüopa-a nuwe tamlak. Hüyange numan noksalan mepu shenaolipalan aoyin Jerusalem me tüoh tüolan-a wehok me toilak.

²²Hüwante taowe hanghe lingyangki numan-e linglak. Numan-e numan shetate yelümlak yejema-a shappe yoongpalan-e hahpu hahying yehahlak.

²³Shangte yelümpe numan yetailak yejema-a yakeng me yejema-a mangshappu yejema-a üngwünpu yengohlak. Numan ünulan jingne numan poiye winlak, hüyange numan-e shejawe shejate üng teiwünlak.

²⁴Hüwante taowe numan jingne füo ja ne menglak; taowe lingyangpu khongküm numan-e linglak. Youngwanpawe inang hüke aope tüopa ngailakei I-a Youngwanpa Kahwang she numan-e shinglak.”

²⁵Youngwanpawe i, “Sha-a, hangko kahta, Taowe iman mepu wongnangpu khümjing hangheye iman ota hüyange mongong mongle, hanghete iman-e leihuwe teih hüyange onge peihuwe teih tüopa yahteilak. Hüyange Taowe imanjing shela hei yhalalan yah teilak.

²⁶Taowe tüopa linge tampu nyih, aoyin mahlakpa mepu yinyapeih, ütam peikülak hüyange numante tüopa jeng iphalak.

²⁷Tüo nyih memuh hanghepa numan-e meiwinyange ngohyapeih, ngaowe oklak jingne numan-e ünganwong leih-e tüolak, hüyange numan-e Iphei ngaolak. Hükih-e kahtalan jingne numan-a yepinlakpa ja ne menglak, hüyange Taowa Youngwanpa she iman-e shinglak.”