Read Konyak Naga EZEKIEL 25 Bible Online

EZEKIEL 25 - Konyak Naga bible

EZEKIEL 25

¹Youngwanpa ngao üte pei.

²“Hangko kahta, Ammon kahtalan yekaote nang sheta metüoh, hüyange iman phei tüi-e hi-ngao ngaotüoh.

³Tao, Youngwanpa Kahwange imante hanghe inang jaitüoh she imante itüoh. Ü-khümjing nuwetampu ngewante Israel kahmük wüngmakke tüohpu ngewante Judah kahtalan phowe yahteipu ngepute numan-e mongsa ngaiphaih-e teih.

⁴Numan hoongli mongong yangpu jingne, heongye wanwüng jeng mepu jatlan-e numan chinghahne Taowe tamlak. Iman-e imanjing lakjing numan kahmük me linglak hüyange tüoken me nyoilak. Iman-e numan jingne ngohyangpu pelick hahlak; hüyange düamyeng yinglak.

⁵Rabbah chingnyuwa Taowe udh angpu nyoi ne linge tamlak, hüyange Ammon kahmük nopu nyeelan angpu nyoi ne linge tamlak, hümme nakshih numan-e Taowa Youngwanpa she shinglak.”

⁶“Hatüowa Youngwanpa Kahwange hanghe i tüo ngoh nang: Numan-e numan jing yakfa khok hüyange mongong monglepuwe hoom. Numan-e Israel kahmükte ye-i-yeshepe lingyangki.

⁷Numan-e lingyangpu nanjingne, aoyinne numante nyieleih-e hüyange toilange linglak tüolan jatlante Taowe numan phünne phalak. Taowe numan lanshe mahtamlak, tüokaiye shaaji numan-a jat ja ne yengoh oklak yejema-a numan jingne kahmük yengohlak. Hüwante numan-e Taowa Youngwanpa she shinglak.”

⁸Youngwanpa Kahwange i, “Judah-a ülao jatlan lili kih-e ngohnang she Moab-e ipu jingne,

⁹Moab yikenglan me tienpu ne ngohpu chingnyulan-a Taowe, shemeipupa chingnyulan Beth-Jeshi-moth, Baal Meon, hüyange Kiriathaim tüolan nehoi omme chinghah ne tamlak.

¹⁰Heongye wanwüng jeng mepu jatlan-e Ammon phei jamme Moab chinghah ne Taowe tamlak, tüo kaiye Moab shaaji jat ja ne ngohpu ye-oklak.

¹¹Taowe Moab te shaoshiyateng ne tamlak, hüyange iman-e Taowa Youngwanpa she shinglak.”

¹²Youngwanpa Kahwange i, “Edom kahtalan-e Judah te yemeipe phuh hah, hüyange tüopa phuh hahpuwe Edom te jintepu jingne püohpinpu yah pei.

¹³Sha-a Taowe jaine tamnang hüke Taowe Edom te shaoshiyateng phalak hüyange tüoken me ngohpu kahta hüyange yinmok lili toilak. Taowe Teman chingnyu mepu Dedan chingnyu ngoiye yanglow phei wüngmakke linge tamlak.

¹⁴Ü-kahta Israel-e Edom tangme üjingne phuh hahlak, hüyange nyamlakpa ne ümongshihpu iman-e Edomlan tangme peine tamlak, Taowe phuh hahpute leppuwa hanghe Edomlan-e shinglak.” Youngwanpa Kahwange ngaoyangki.

¹⁵Youngwanpa Kahwange i, “Philistialan-e iman phei wangpang pute we ne mengpu tangme yemeipe phuh hahteki hüyange iman-e nupu phei iman mahne tamteki.

¹⁶Tüokhei Taowe jaine tamnang hüke Taowe Philistialan chinghahlak. Philistialan kahjee me üyin me towe tüohpu moilan Taowe mahne tamlak.

¹⁷Taowe imante yemeipu shaoshiyateng phalak hüyange imante khakwange phuh hahlak, ü-mongshihpu iman-e shinge peilak; Hüwante iman-e Taowa Youngwanpa she shinglak.”