Read Konyak Naga EZEKIEL 26 Bible Online

EZEKIEL 26 - Konyak Naga bible

EZEKIEL 26

¹Wangpeng pen me ja shepu, leat tepu üwangpa nyih me Youngwanpawe üte ngao.

²“Hangko kahta, Tyre chingnyu me ngohpu kahtalan-e hanghepate hoongli mongonge inang hatüowa tüo ngohnang. Iman-e üngwün, ‘Jerusalem küppe mahteki! Yha-e pheeileih hümpu ünganwong mahteki! Yha-a shaaji teman wepa ne yemeng oklak!’

³“Tüokhei sha-a, hatüowa Tao, Youngwanpa Kahwange hanghe i, tüo ngohnang: Tyre chingnyu, Taowa nang wepa. Nangte shümlak jingne Taowe jatlan maapu yah peilak; hüyange iman-a yengching yayungpu kih-e peikülak.

⁴Iman-e numan jing chingynyu jantpenyulan menge winlak hüyange numan jing daonok khüw-e winlak. Tüophei me Taowe kahmak khongkümpu moiye winlak hüyange longnyu üko shaha tüohlak.

⁵Tüopa tangme nyah ompalan-e imanjing shaan yamlak, ümeken yengching me tüopa yongyange ngoh tüoken me, Tao, Youngwanpa Kahwange ngaoyangki. Jatlan-e Tyre-a nuweshakke mengtamlak,

⁶hüyange iman jing yanglow phei yha jing bangching kahmük me aoyin nyoi iman-e toilak. Hüwante Tyre-e Taowa Youngwanpa she shinglak.”

⁷Youngwanpa Kahwange inang, “Üshei yo me sheyongpupa ahngpa Babilon Ahngpa Nebuchadnezzar Tyre chinghahlak jingne Taowe yah-e peilak. Nyahponglan üngang phei, koiponglan hei pongtongtoi hüyange koipong pheipu wetaipalan phei apyekao mepu I peilak.

⁸Aoyin kahmük yekao bangchinglan me nyoi yanglow phei toilak. Wepalan-e jhom shaolak, kahtok shokke ngailak, hüyange numan phei tüi-e mongjüongpu jantpenyu yonglak.

⁹Iman-e numan jing jantpenyulan-a jankhüwlak phei shuwe tamlak hüyange numan jing daonoklan-a wenao yan phei shüoh-e tailak.

¹⁰Iman jing koiponglan-e phunge tampu kahmak wangphom-e numante yüohlak. Iman-e heamtepu chingnyu petenlan kaiye linwante imanjing koiponglan-e shupu tongtoi hüyange pongtongtoilan wünge numan jing jantpenyute polak.

¹¹Iman jing koipong pheipu kahtalan-e imanjing yanglow phei numan püanglamyin me numan kahta toi phalak. Numan jing wongnangpu shongnyulan-a kahtokte toiloi taitamlak.

¹²Numan jing wepawe numan jing moth hei pheeinyuleihpu iman nying nyingke yahlak. Iman-e numan jing jantpenyulan khüw tamlak hüyange phihlangpu numan noklan küppe tamlak. Iman-e long hei pee hüyange longkhoih khongküm yahlak, hüyange yengchingte shüppe tamlak.

¹³Numan-e lokpu hem khongkümpu Taowe lakne tamlak; hüyange numan jing kongki ümtük hemwüng shaaji yejailak.

¹⁴Taowe ümeken me nyah ompalan-e imanjing shaan wanlak ngohnang tüopa nyoi ne longnyu ükeng shaha tüohlak. Chingnyu aope-o linge yeyelak. Tao, Youngwanpa Kahwange ngaoyangki.”

¹⁵Tyre chingnyute ilak ne Youngwanpa Kahwange hatüo ngohnang: “Aope numan ching hah-e ngohlakei, yengnah paowe aoyin kahtalan nyoiyapeih tüolan-e aoyinne toilang yapeih tüolan jingne khahkowe yashan yalilak.

¹⁶Hüwante yengching shüpneipu ahngching ahngpalan khongküm ahngpa shotjing mepu yulak. Iman-e ngeng-ahng phakshao hüyange oleng inyangpu inkhek khokke anglak hüyange nin-nin she kahtok me shotlak. Nangtepu ngoikülak yatuhshao jingne iman jamloi yashan yalilak tüo kaiye iman ninpu yelak oklak.

¹⁷Iman-e nang jingne tüopa manglüng hem loklak: “Ütahpa chingnyuwa mahtamteki! Yengching mepu yha jing yenglinlan phoonge teiteki. Tüopa chingnyu mepu kahtalan-e yengching tangme wanglam lam, Hüyange yengnah me aoyin nyoi khongkümpu yashanne tam.

¹⁸Sha-a, tüopa toitapu nyih me dikhotlan ninnang, Hüyange hükih-e mahtampute iman me ngohpu kahtalan mokhnang.”

¹⁹Youngwanpa Kahwange inang: “Taowe nanga ümeken me ao-o yenyoipu wüngmakke heamtepu chingnyulan ngohnang, tüone linge tamlak. Taowe nanga yengching ülu yenge küppe tamlak.

²⁰Taowe nanga üshongwante aoyin nyoiyangki tüolan kahta phei jamme lipu yimching me omlak jingne shonlak. Taowe nanga üküm yenangpe heampu kahmong mepu kahtoknyu me liye ngohpalan phei ngohlak jingne shonlak. Tüokaiye numan nishe leihye-e nyoine ye-oklak, hüyange üyin ngohpalan kahtok me numan-e nyoi yetüolak.

²¹Taowe nanga yashan yalipu leppu ja ne linge tamlak, hüyange tüopa-a nang jingne ükümpa ne menglak. Kahtalan-e (numan) nang yamme leilak, hüpoi nanga shaaji ye-ngelak.” Youngwanpa Kahwange ngaoyangki.