Read Konyak Naga EZEKIEL 28 Bible Online

EZEKIEL 28 - Konyak Naga bible

EZEKIEL 28

¹Youngwanpa ngao üte pei:

²“Hangko kahta, Tao Youngwanpa Kahwange Ite hanghe inang, Tyre wanglam lampate, itüoh. Otapuwe loiyange, nange kahwang ja ne she i. Yengchinge neikonyange kahwang ja leye ahngpa shotjing me shotyange ngohnang she nange i. Nange kahwang ne lowelamne ok, hüpoi yeje, nanga lilak kahta, kahwang ne yeje.

³Nanga Daniel phei shedeipupa she nange teih, hüke nang mepu lowe angpu hango ye-oklak she teih.

⁴Nang konheingao hüyange okkeshangpuwe-a hon hei khüm shengngin phei nang hakpa ne menge tam.

⁵Nange pheeileihpu me konjonge linge ok hüyange yelakpe küw tüoyangki. Nangjing toinyunanha jingne nanga hangshin otapu!

⁶“Sha-a hüma-a, Tao, Youngwanpa Kahwange hanghe inang tüo ngoh nang: Nange nanga Kahwang shinne deitahnang she teihpu jingne,

⁷Nangte shümlak jingne shüpsheye yeteihpu wepalan Taowe yah peilak. Nang konheingao hei okkeshangpuwe küppe ompu shemei yaomapu toishao lili iman-e mahtamlak.

⁸Iman-e nanga kahsate shüptamlak, hüyange yengching hotan me aoyin toilange li, tüopa lipuwe nanga lilak.

⁹Aope iman-e nang toilak jingne peilakeih, nanga kahwang ja she yelakpe nange ipu oklak a? Aope nang toitampupa nange hüolakei, nanga kahwangne aope-o yemeng okpe hangko kahta ne hei ngohlak.

¹⁰Kahwang yeshingpu yinhulan yak me nanga lilak. Tao, Youngwanpa Kahwange ngaokeng phayangki.”

¹¹Youngwanpa ngao üne-o üte pei.

¹²“Hangko kahta,” Iye i, “Tyre ahngpa jingne tanpu ngoikülak yatuhshao jingne shappe yoongtüoh. Tao, Youngwanpa Kahwange hanghe inang Ite itüoh: Hipak ja me wangengoipu yo me ja ne nang ngohyangki. Nanga hangshin deitah hüyange wangngoi yangpu!

¹³Nanga Kahwang Pesha, Eden me nyoi ngoh, hüyange long ülam liliye yüohyange ngoh: rubies hüyange diamond; topaz, beryl, carnelian, hüyange jasper; saphires, emeralds, hüyange garnets. Nangme hon juyük ngoh. Tüolan-a nang linge ngaipu nap nang jingne lingyangki.

¹⁴Taowe nang yomlak jingne tüoken me nyam nyam shepu cherub tüoh, nanga Kahwang üjaopa kahtang me nyoi hüyange phihlangpu long yo me kemme ngoh.

¹⁵Nang linge ngaipu nyih mepu nange ünu lingne manwangpu nyihte ngoishe nangjing nyoingoh-a khakshuwe ngohyangki.

¹⁶Nanga yüopu hei shakpu me nan yenangpe ngoh, hüyange tüo kaiye nanga yakphei lükne hüyange ünu omne tam. Tüokhei Kahwang üjao kahtang mepu nang tailak jingne Taowe kangnang, hüyange cherub aowe nang yomme ngoh Iye nanga phihlangpu long yo mepu jange teinang.

¹⁷Püm heita wangyahpute nang ota, hüyange nang teehepuwe nanga üngapa kih linge tam. Tüojing ne Taowe nanga kahtokte shuitainang, hüyange ülao ahngpalante deingao ja ne nang tüoh nang.

¹⁸Nange hükihpu shakpu hüyange yaopu ünu ling, tüowe nange yoppe khümpu nyoijinglan-a mengne tam. Tüokhei chingnyu te Taowe vün pah tamnang hüyange kahtok ne shuwe tamnang. Sha-a aoyinne nangte lei khongkümpuwe nanga tüpla ne menge mahpu ngenang.

¹⁹Nanga mahteki, jinjintepu jingne mahteki, hüyange jatlan üshei aoyinne nang shinge ngoh yashanyali nang, iman khongkümpuwe nange tüopu ngoikülak yatuhshao tüophalak yang she nyamnang.”

²⁰Youngwanpa ngao üte pei,

²¹“Hangko kahta, Sidon chingnyu yekaote nang sheta metüoh hüyange iman phei tüi-e hi-ngao ngaowe tamtüoh.

²²Tao, Youngwanpa Kahwange hüke inang she itüoh: Sidon, Taowa nangjingne wepa; Taowe nangte hanghepa linge tam tüopa jingne kahtalan-e üte minyong phalak. Aope Taowe nang me aoyin nyoiye ngohyapeih tüolante shaoshi yatengpu phawe Tao hangshin üjaopa ne ngoh hüowe tamwante, iman-e Taowa Youngwanpa she shinglak.

²³Taowe nang tangte daktin shontamlak hüyange nangjing püanglamyin me iy yinne tamlak. Nangte-a üken phe mepu shümlak, hüyange nang kahtalan-a toilak. Hüwante nange Taowa Youngwanpa she shinglak.”

²⁴Youngwanpawe i, “Israelte yaoleye leiye jonne paiye ngohyangpu neikonne ngohpu jatlan aowe-o shaaji nishe Israelte mayah-e tamlak ne huh hüyange phao jupeng ne yemenglak. Hüyange iman-e Taowa Youngwanpa Kahwang she shinglak.”

²⁵Youngwanpa Kahwange i, “Israel kahtalan ümeken me Taowe iman yanne tam tüolan jatlan mepu Taowe yah yelak, hüyange jatlan khongkümpuwe Taowa üjaopa she shinglak. Israel kahtalan iman jing yoi kahmük, hanghepa kahmük Taowe ü-shaoshanpa Jacobte pha tüome nyoilak.

²⁶Iman tüoken me ütuh yenangpe nyoilak. Iman-e nok weyange ngohlak, hüyange wuwüngwu deilak. Aoyinne imante yaoweleye jonnepai yangki tüolan iman jing yupilan khongkümpute Taowe shaoshiyateng phalak, hüyange Israel-a ütuh yenangpe ngohlak. Hüwante hüke Taowa imanjing Youngwanpa Kahwang she iman-e shinglak.”