Read Konyak Naga EZEKIEL 29 Bible Online

EZEKIEL 29 - Konyak Naga bible

EZEKIEL 29

¹Wangpeng pen leat pen hüyange pen me ni shepupa nyih me Youngwanpa ngao üte pei.

²“Hangko kahta, Egypt ahngpa Pharaoh yekaote sheta metüoh hüyange Iphei tüi-e ngaotüoh. I hüyange Egypt kahmük nopute hangke shaoshiyateng phalak Ite itüoh.

³Hatüowa Youngwanpa Kahwange Egypt ahngpa pharaohte hanghe inang tüo ngohnang she itüoh. Taowa nang wepa, yengyin me lamyange ngohpu, nang yengching phoi üyongpa. ‘Nile-a üjing hüyange hüke hatüowa taowe ling she nange i.’

⁴Taowe nangjing tahwaan me yankeilei wahlak hüyange nangjing yengme ngohpu nyah nangme manne tamlak. Tüophei me nangme neakyange ngohpu nyah khongküm puphei Nile mepu nanga Taowe shuiye ngaitamlak.

⁵Taowe nang hüyange nyahlan khongkümpu wanwüng jeng me toon-e shüplak. Nang püm kahtok me yeilak hüyange yemutampe tüohlak. Taowe tüopa-a awhalan hüyange yinmoklante heeine phawe tamlak.

⁶Hüwante Egypt kahtalan khongkümpuwe Taowa Youngwanpa she shinglak.” Youngwanpawe i, “Israel lan-e jamlak yamme numan Egypt lante neang yangki; hüpoi nanga wong yenangpu shengshaoh kih-e ngoh.

⁷Aope iman-e nangme neang, nang phakke ta, iman jing phakphangte lüt, hüyange imanjing tokwaan jot yüppe imante lingetam.

⁸Hüma-a sha-a, Tao Youngwanpa Kahwange nangte inang, hüke yanglow phei nangte shümlak jingne Taowe kahtalan yahlak, hüyange iman-e numan kahta hüyange numan jing yinmoklan toilak.

⁹Hüyange Egypt-a jajang japu ükeng ne menglak. Hüwante numan-e Taowa Youngwanpa she shinglak. “Hangjingne ima-a nange iyangki, Nile-a üjing hüyange tüopa-a taowe ling.

¹⁰Taowa nang wepa hüyange nangjing Nile tepu wepa. Taowe Egypt khongkümpu jajang japu ükengne, apyekao mepu Migdol chingnyu mepu, heyekao me Aswan chingnyu ngoiye, Sudanese yikeng khongküm püowe linge tamlak.

¹¹Kahtanyuha yejema-a yinmoklan ao-o tüopa kaiye yekemlak. Wangpeng deli ngoiye tüoken me hango yengohlak.

¹²Taowe Egypt-a kahtoknyu me üshei phei wüngmakpu kahmük ne linge tamlak. Wangpeng deli jingne Egypt chingnyulan-a heamteiye ange tamlak, ülao chingnyu phei shemeng she heamteiye ngohlak. Taowe Egyptlan-a chingtaipalan ne linge tamlak. Iman kahmük lilite phette yanlak hüyange ülao kahtalan yo me nyoilak.”

¹³Youngwanpa Kahwange inang, “Wangpeng deli phei me ümeken me Taowe iman yanne tamyangki tüolan jat mepu Taowe Egyptlan yah yelak;

¹⁴hüyange iman jing kahmük ülang heyekao Egypt me Taowe iman nyoine tamlak. Tüoken me iman wong yenangpu ahngching ne ngohlak;

¹⁵üshei yeme wong yenangpu ahngching ja ne, hüyange iman-e ülao jatlan tangme aope-o nishe wanglam lampu ye-oklak. Taowe iman-a loishe wongyenangpe khaiye tamlak hüke iman-e teihpu kih-e jat ja nehoi linge tampu ye-oklak.

¹⁶Israel-e aope-o jampu yamme imante monghümpu yengohlak. Egypt yatuhshao kaiye imante mongneanglaka hangshin pienpu she Israel te teihne tamlak. Hüwante Israel-e Taowa Youngwanpa Kahwang she shinglak.”

¹⁷Wangpeng da me nyit üwangpa leat hüyange üwangpa nyih, Youngwanpa ngao üte pei.

¹⁸“Hangko kahta, Ahngpa Nebuchadnezzarwe Tyre chinghah-e tam. Iye yoijing wetaipalante hüke hangkiyih ki ne tam, tüokaiye imanjing shanga kowe-tetne tam hüyange iman jing phak peak ne tam, hüpoi ahngpawe jeyah yejema-a Ijing nyahponglan ne jeyah iman shangyangpu khongkümpu jingne hango yetüo.

¹⁹Tüokhei sha-a, ao Youngwanpawe hanghe inang tüo ngohnang: Taowe Egypt kahmük-a Ahngpa Nebuchadnezzarte pha nang. Iye chinghahlak hüyange tüopa mepu nyieyahlak hüyange Ijing nyahponglan nanmee ne Egypt toinyu nanha khongkümpu kiye tailak.

²⁰Taowe Ite Egypt-a Iye shaoshan yangpu nanmee ne phanang, hangjingne I jing nyahponglan-e ü-jingne toi lingyangki. Tao, Youngwanpa Kahwange ngaoyangki.”

²¹“Aope tüopa ngailakei, Taowe Israel kahtalan wongnangne tamlak hüyange nang ümeken me kahta liliye nang ngao jaipu oklakei tüoken me ngaotüoh, hümme nakshih iman-e Taowa Youngwanpa she shinglak.”