Read Konyak Naga EZEKIEL 3 Bible Online

EZEKIEL 3 - Konyak Naga bible

EZEKIEL 3

¹Iye üte i, “Hangko kahta, nang sheshao me hanghe tüo, tüopa laitee hahtüoh; tüophei me taitüoh hüyange Israel kahtalante ngaotüoh.”

²Tüokhei taowe ü-ju ka, hüyange hahlak jingne Iye üte laitee pha.

³Iye i, “Hangko kahta, Taowe nangte phapu tüopa laitee hahtüoh; tüopawe nang sea moh ne tamtüoh.” Taowe tüopa hah, hüyange tüopa-a zahtai jelo shinne wünge ngohyangki.

⁴Tüophei me Iye üte i, “Hangko kahta, Israel kahtalan tangte taitüoh hüyange Taowe nangte hangheyin ilak jingne i, imante ngaotam tüoh.

⁵Taowe nanga wanpu ülao jat ngao ngaopu tangte shonpu ne yeje, hüpoi Israellan tangte shonnang:

⁶Taowe nanga nange ngao yeshingpu jatnyulan tangte shonshihma-a, iman-e nangte jaihah shepu.

⁷Hüpoi Israel kahtalan aowe-o nangte jaihuwe yeteihlak; iman-e üte nehoi yejaikülak. Iman khongküm ngayoun hüyange shelange jei mah.

⁸Sha-a Taowe nanga iman shinne ngayounne hüyange shelange khonne linge tamlak.

⁹Longlang phei nehoi shewanpu long kih-e taowe nang shekeng lingtamlak; iman ngao yejaipu noksalan ne mengyapoi, imante tahnyam yejema-a iman-e leipute mokh tahngoh.”

¹⁰Iye yelakpe ngao, “Hangko kahta, meimeih-e mong phatüoh hüyange Taowe nangte ngaowe tampu khongküm teihtüoyah.

¹¹Tüophei me nangpheipu kahtalan aoyin phowe teiye ngohnang tüolan tangte taitüoh, hüyange iman-e nange ngaopute jaiyah yejaiyah, Tao okkeshangpupa Youngwanpawe imante hanghe i, imante ngaowe tamtüoh.”

¹²Hüwante yahawe tao nowe in, hüyange ü-tokphei me taowe ngaowüng üyong ngugngakpu hüyange üngwünne hüke ipu jai, “Wangdang ütangpawe Youngwanpa müktishiwapute yihlutüoh!”

¹³Wangme yinmoklan yangteng jamjamshe teiheappu taowe jai, hüyange tükneilan ngaowüng ngugngakpu taowe jai.

¹⁴Youngwanpa ünganwong ü-tangte yeonge wongnange pei, hüyange I yahawe tao yah teiwante, üte khah-e hüyange mongshih ngaiye pei.

¹⁵Tüokhei tao, Tel Abib Chebar yengyin tokphei ye me, ümeken me phowe teipalan nyoi tüote pei, hüyange taowe hanghe nge hüyange jai tüopawe naoyange nyih nyit ngoiye tao tüoken me nyoi.

¹⁶Nyih nyit linyang phei me Youngwanpa ngao üte pei.

¹⁷“Hangko kahta, Taowe nangte Israel jat jingne yompa ja ne linge tamnang Taowe nangte phapu deingaolan nange imante ngaowe tamlak.

¹⁸Ünu kahta ja-a lilak üja she Taowe shingne tampute hüpoi nange I ünu lam mepu lüppe yelakne I üyin yinlak ne nange Ite deingao üpha ma-a, ünu kahta ja ne muh I-a lilak; hüpoi I iy jingne Taowe nang mepu kanglak.

¹⁹Tüoyangpoi ünu kahta ja te nange deingao phapute ünu lingpu yelakma-a, I-a ünu kahta ja ne muh lilak; hüpoi nang üyinpa-a yinne tamlak.”

²⁰“Ütingpa me khakshupu kahta jawe I khakshupu mepu yanne ünu lingne wangma-a hüyange Taowe I sheshao me yashah hüolak angtam ma-a I lilak, hangjingne nange Ite deingao yephapu jingne I lilak. I yoi ünu jingne I-a lilak. Iye lingyangpu toimeilam Taowe yeteih tüolak; hüyangpoi I iy jingne Taowe nang yak mepu kanglak.

²¹Tüoyangpoi khakshupu kahta ja te ünu yelinglak jingne nange deingao pha hüyange Iye nang ngao jaiyange ünu yelingma-a, I üyin ngohpu oklak, hüyange nang üyin-o yinne tamlak.”

²²Youngwanpa ünganwong ompu üte jinne pei hüyange Iye üte ngaopu taowe jai, “Lüotüoh hüyange kahjee yete taitüoh. Tüoken me Taowe nang phei ngaolak.”

²³Tüokhei kahjee yete tao yayonge tai, hüyange tüoken me Chebar Yengyin shongme taowe ngeyangpu meimei kih-e, taowe Youngwanpa müktishiwapu nge. Taowe kahtok yete ü-sheta khuhtawe lam;

²⁴hüpoi Kahwangpa yaha üte ong hüyange ü-ya phei tao lüone tam. Youngwanpawe üte i, “Nokte yetüoh hüyange nang nying nyingke nokme küpyange ngohtüoh.

²⁵Nanga wu ja phei shatamlak, hangko kahta, hüyange ükhong sheshao me nang ngaiye taipu ye-oklak.

²⁶Taowe nangjing yi-a tapdao me neak tamlak tüokaiye tüolan hokkewepu kahtalante nange deingao phapu ye-oklak.

²⁷Tüophei me, aope Taowe nangte nishe ngaolakei hüyange ngao ngaowe oklak ünganwong phatamlakei, nange imante tao, okkeshangpupa Youngwanpawe hanghe inang, ngaowe tamlak. Iman yo me ütam-e jaiyahlak, hüpoi ütam-e nangte ye-i-yeshepe linglak; hangjingne iman-a hokkewepu ngaitampu jat ngohnang.”