Read Konyak Naga EZEKIEL 30 Bible Online

EZEKIEL 30 - Konyak Naga bible

EZEKIEL 30

¹Youngwanpa ngao üne-o üte pei.

²“Hangko kahta, Tao Youngwanpa Kahwange hanghe inang, hi-ngao hüyange itpu ngao ngaowe tamtüoh: Shaptüoh, Onyukei Tenyih-a!

³“Hangjingne nyih-a o-küki, Youngwanpawe toi linglak tüopa nyih. Jatlan jingne wangphom nyeihpu hüyange ülangsim nyih.

⁴Egypt tangme yanglow peilak, Hüyange Ethiopia me mongmeng üyong ngohlak. Aope Egypt tangme toilangpu peilakeih; Kahmük-a sheih-e yahteihlak hüyange heamteiye tüohlak.

⁵“Ethiopia (Cush), Put, Lud hüyange Arabia khongküm, hüyange Libya (Cub), hüyange nanpheng peipu kahmüklan iman phei yanglow-e mahlak.”

⁶Youngwanpa Kahwange inang, “Apye Migdol mepu heye Aswan ngoiye Egypt yinne angpalan khongküm shapju me toilak. Egypt otayangpu nyahponglan mahtamlak. Tao, Youngwanpa Kahwange ngaoyangki.

⁷Kahmük-a kahtoknyu me shewüngpupa ne menglak, hüyange tüopa mepu chingnyulan-a lanshe heamteiye tüohlak.

⁸Aope Taowe Egypt te vün pahtamlakeih hüyange yha yinne angpalan khongküm toilakei, hüwante iman-e shinglak Taowa Youngwanpa.”

⁹“Aope tüopa nyih peiye Egypt mahtamlakei, yeteihtüope ngohpu Ethiopia kahtalan mokhtamlak jingne Taowe yenglin me ngaolan kipalan shonlak, hüyange iman yashan yalilak. Tüopa nyih peiküki!”

¹⁰Youngwanpa Kahwange inang, “Egypt lan toinyu nanha üküm ngoiye tamlak jingne Taowe Babilon Ahngpa Nebuchadnezzar jonlak.

¹¹I hüyange yayenge yeteihpu Ijing nyahponglan kahmük ükengne menge tamlak jingne peilak. Iman-e yanglow phei Egypt te shümlak, hüyange kahmük-a kahta mange maawe ngohlak.

¹²Taowe Nile jüppe tamlak hüyange ümeng kahtalan wongphang me Egypt anglak. Kahmük nopuwa kahheng lan-e ükengne menge tamlak. Tao, Youngwanpawe ngaoyangki.”

¹³Youngwanpa Kahwange inang, “Memphis mepu peshao hüyange tahleih kahwanglan Taowe mahtamlak. Egypt tangme wanglam lamlak ne sheja nehoi yenanglak, hüyange kahta üshei Taowe nyamne tamlak.

¹⁴Taowe heyekao Egypt ükengne menge tamlak hüyange apyekao mepu Zoan chingnyu te vün pahtamlak. Thebes ahngjong chingnyu te Taowe shaoshiyateng phalak.

¹⁵Egypt jing yomtep üyongpa Pelusium chingnyu te ümongshihpu Taowe peine tamlak. Thebes toinyu nanha Taowe mahtamlak.

¹⁶Taowe Egypt te vün pahtamlak, hüyange Pelusium khahkowe shaoshipu ngohlak. Thebes jantpenyu khüwmenglak, hüyange Memphis muleamlak.

¹⁷Heliopolis hei Bubastis chingnyulan mepu naoshelan wehok me lilak, hüyange ülao kahtalan-a küpnok te yah teilak.

¹⁸Aope Taowe Egypt wong paiye tamlakei hüyange iman jamloi she otapu wong üküm ngoine tamlakei Tahpanhes tangme wangnyakke küplak. Wangphom-e Egypt te nyeihlak, hüyange yha jing chingnyulan khongkümpu küpnokte phowe teilak.

¹⁹Aope Taowe Egypt te tüokih-e shaoshiyateng phalakei, Taowa Youngwanpa she iman-e shinglak.”

²⁰Wangpeng pen me ja, üwangpa leat, hüyange nyit shepupa nyih me, Youngwanpa ngao üte pei.

²¹“Hangko kahta, Taowe Egypt ahngpa yaksea phakke tamteki. Shejawe nehoi tüopate nyephinne yejema-a tüopa meilak hüyange nishe yanglow jonne oklak ne nyeihtampu yenang.

²²Sha-a hüma-a, Tao Youngwanpa Kahwange hanghe inang, tüo ngohnang: Egypt ahngpa wepa-a Tao ngohnang. Ijing yak moini Taowe phakke tamlak, meiye ngohpupa hüyange phakteiye ngohpupa moini, hüyange I yak mepu yanglow yeilak.

²³Kahtoknyu nopu te Taowe Egypt kahtalan yanne tamlak.

²⁴Tüophei me Taowe Babilon ahngpa yak Taowe wongnangne tamlak hüyange I yak me ü-yanglow shümme tamlak. Hüpoi Egypt ahngpa yak Taowe phakke tamlak, hüyange I ukke yoonglak hüyange Ijing wepa sheshao me lilak.

²⁵Üting, Taowe I wong yenangne tamlak hüyange Babilon ahngpa wongnangne tamlak. Aope Taowe Ite ü-yanglow pha hüyange Iye tüopa-a Egypt yekaote lüp, moilan-e Taowa Youngwanpa she shinglak.

²⁶Taowe kahtoknyu nopute Egyptlan yanne tamlak. Hüwante iman-e Taowa Youngwanpa she shinglak.”