Read Konyak Naga EZEKIEL 31 Bible Online

EZEKIEL 31 - Konyak Naga bible

EZEKIEL 31

¹Wangpeng pen me ja, leat lüm, hüyange nyih üwangpa me Youngwanpa ngao üte pei.

²“Hangko kahta, Egypt ahngpa hüyange Ijing kahtalante itüoh: “Nang hangshin wongnangpu! Taowe nanga hangphei phinne hüolak?

³Nanga Lebanon me Cedar kih-e, Shemei yaomapu üquilan yashüm phei, Wangphom yüowe daowe ongpu peeja.

⁴Tüopa jonge tamlak jingne yeng ngohyangki, Hüyange tüopate uhyinglak jingne kahmong me yengyinlan ngoh. Ümeken me pee jongyapeih tüoken nyoite iman-e yeng pha, Hüyange phao mepu peelan tang te yengyin ühalan shon.

⁵Yeng wangmanne phapu jingne, Tüopa-a ülao peelan khongkümpu phei shedao she jong. Tüopa tepu pequilan ngütshappe hüyange laowe jong.

⁶Pequilan me awha ülao liliye ülüp ling; Phao yinmoklan-e tüopa peshüm phangme iman jing ühalan toloimei ne kahkook; Tüopa yashüm phangme kahtoknyu jatlan toloimei.

⁷Tüopa pee-a hangshin shemei yaomapu, Laolüngpu üquilan phei, teshinne daowe, Itepu yalahlan yengyin ülu ngoiye tawe ngohnang.

⁸Kahwangpa pesha mepu cedar hanghe phei-o tüopa phinne ye-ok. Fir pee hanghe me-o tüopa kihpu üquilan yenang. Hüyange longpe hanghepa me-o hükihpu üqui yenang, Kahwangpa yoi pesha me nehoi hükih-e shemeiyaomapu pee hango yenang.

⁹Üquilan yanne tam-e, Taowe tüopa-a shemei yaomawe ling. Hatüowa Kahwang pesha Eden, mepu pee liliye waowe teihpu ngohyangki.

¹⁰“Sha-a hüma-a, Tao Youngwanpa Kahwange hüke wangphom manngoi manngoi she jongpu peete hanghe ngailak Taowe nangte ipha ning. Hüke tüopa daowe jongpu kih-e otapu-o jongnang.

¹¹Tüokhei tüopa-a Taowe winne tamnang hüyange kahheng wanglam lampa jawe tüopa-a yahlak. I ümengpa jingne hanghe tüolak ne ngoh Iye tüopa peete phalak.

¹²Yayeng yenangpu kahhenglan-e tüopa-a akke tamlak hüyange tüohlak. Tüopa üquilan hüyange phakke leampu üquihalan kahmük tepu kahtang hei kahjee lilite yeilak. Tüopa peshüm phangme nyoiyang phei jatlan khongküm taiye kümlak.

¹³Awhalan peilak hüyange phakke yeipu pee me shahlak, hüyange tüopa pequilan tangme phao yinmoklan kemlak.

¹⁴Tüojing ne, sha-a me peiye, ja ja shinne meiye yeng phawe ngoh yapeyoi, hanghe pee-o, tüopa daopu shinne nishe daowe yejonglak yejema-a wangphom yüowe onge hüyange tüopa daopu yeyüo oklak. Iman khongkümpuwa hangko kahtalan kih-e lilak jingne mahnang, aoyin lipu kahtoknyu te tayapeih tüolan phei omlak jingne mahnang.”

¹⁵Youngwanpa Kahwange hanghe i hatüo ngohnang: “Aope lipu kahtoknyu te pee talakei, tüonyih kahtok ümong me ngohpu yeng te, mangshappu füo hüowe küppe tamlak jingne Taowe linglak. Yengyinlan Taowe tükke anglak hüyange yengyin ühalan maawe yünne yetamlak. Hangjingne pee-a lipu jingne Lebanon Kahtang te Taowe wangnyak yah peilak, hüyange phao mepu pee lili kuine tamlak.

¹⁶Aope Taowe lipu kahtoknyute tüopa shonne tailakei, tüopa phakke leampu ngaowünge jatlan te shuitamlak. Eden pee khongkümpu hüyange leyange angpu khongküm, Lebanon mepu yeng wangmanne phapu peelan, aoyin kahtoknyu üphangpa te tateki tüopa phakke leampuwe moimanlak.

¹⁷Lipu kahtoknyu te aoyin phakke leamme taiteki tüolan phei hüolak jingne iman tüopa phei jamme tailak. Hüyange tüopa yashümphang me aoyin nyoiyangki khongküm jatlan yote yanne tamlak.

¹⁸“Pee-a Egypt ahngpa hüyange I kahtalan khongküm. Eden mepu pee nehoi teshinne yedao hüyange lahnyik mongkopu yenang. Hüpoi sha-a, Eden mepu peelan kih-e, tüopa-a lipu kahtoknyu te talak hüyange Kahwang yeshingpulan phei hüyange shapju me aoyin toi tüolan phei jamlak. Taowe ngaoyangki;” Youngwanpa Kahwange inang.