Read Konyak Naga EZEKIEL 32 Bible Online

EZEKIEL 32 - Konyak Naga bible

EZEKIEL 32

¹Wangpeng penme ni, leat pen me ni, üwangpa nyih, Youngwanpa ngao üte pei.

²“Hangko kahta, Egypt ahngpate lahnyik mongkopu deingao ja phatüoh. Ü-mepu tüopa ngaolan Ite phatüoh. Jatlan yo me nange yengkong mailang kih-e ling, hüpoi nanga tüophei shenyei she yengching phoi kih-e yengyin paowe wookke kem. Nang ya phei nange yeng-a shamnoong ne lingtam hüyange yengyinlan nuwetam.

³Youngwanpa Kahwange hüke inang: Aope jatlan maawe jemlakei, Taowe nanga ü-shaan me pholak hüyange iman-e nanga yengnah te shuiye yetamlak.

⁴Taowe nanga kahtokte ngaiye shüplak hüyange awhalan khongküm hüyange kahtoknyu yinmoklan nang uh tamlak jingne peine tamlak.

⁵Taowe nümtepu nangjing mange kahjee phaotang maawe tamlak.

⁶Kahtang nopute shaiye hüyange yengyinlan manmaa manmaa Taowe nang iy shokke tamlak.

⁷Aope Taowe nang mahtamlakei, Taowe wang te küpyange shanhalan büange tamlak. Wanghenyu-a wangphom mongme lolak, hüyange linnyuwe wangngai yephalak.

⁸Wangdang mepu wangngai lili Taowe mah ne tamlak hüyange nangjing kahtoknyu wangnyakke büange tamlak. Tao, Youngwanpa Kahwange ngaoyangki.

⁹“Aope Taowe nang mahpu ngaolan nange aope-o manjaipu kahmüklante yanne tamlakei, jatlan maapu yeonge shaoshilak.

¹⁰Taowe nangte hanghe ling tüowe jatlan maapu mokhlak. Aope Taowe ü-yanglow lüplakei, nyampu phei ahngpalan-a khüwkümlak. Nang yeipu nyih, yoi yoi üyin jingne nyampuwe iman khongküm ninlak.”

¹¹Egypt ahngpa te Youngwanpa Kahwange inang, “Nang phei tüi-e Babilon ahngpa mepu yanglow hüolak.

¹²Mengshipu jatlan mepu wetaipalan te imanjing yanglow nolak hüyange nang kahtalan khongküm toilak jingne Taowe tamlak. Nang kahtalan khongküm hüyange hanghelan jingne nang otawe teihnang sheminlam phe mahtamlak.

¹³Yengpeiwo lili me Taowe nangjing mahulan langne tamlak. Shaaji yeng wookke tamlakne kahtalan jeyah yinmoklan jeyah yengohlak.

¹⁴Taowe nangjing yeng hümne tamlak hüyange jaowe ngailak hüyange nangjing yengyinlan jünge yünne tamlak. Tao, Youngwanpa Kahwange ngaoyangki.

¹⁵Aope Taowe Egypt-a wüngmakke winne tamlakei, hüyange aoyin tüoken me nyoi khongküm mahtamlakei, iman-e shinglak hüke Taowa Youngwanpa.

¹⁶Tüopa lahnyik mongkopu deingaowa manglüng hem ne menglak. Jatlan shekolan-e tüolan tepu kahtalan liliye tüopa-a Egypt jingne shappe yoongpu ne loklak. Tao, Youngwanpa Kahwange ngaoyangki.”

¹⁷Wangpeng pen me ni, üwangpa leat pen me nga shepupa nyih me Youngwanpawe üte ngao.

¹⁸“Hangko kahta, Egypt kahtalan khongkümpu jingne shappe yoongtüoh. Ülao wongnangpu jatlan phei lipu kahtoknyute iman shonne taitüoh.

¹⁹Imante itüoh: “Ülaolan phei numan ünyei shemeiyaoma nang she teih nangkü a? Lipu kahtoknyute numan talak hüyange tüoken me üshoyekhüppulan phei lamlak.

²⁰“Egypt kahtalan-a shapju me aoyin toiyangki tüolan phei jamme toitalak. Iman toilak jingne yanglow-a tümteki.

²¹Naomei ütahlan hüyange aoyinne Egyptlan yekao me hokyapeih iman-e lipu kahtoknyute Egyptlan nyik nang. Iman-e üngwün: ‘Üshoyekhüppulan aoyin shapju me toiyangki iman tüome tateki, hüyange iman tüome lamyange ngohnang!’ ”

²²“Yha jing wetaipalan mangjonge neikon yange, Assyria-a tüome! Iman khongkümpuwa shapju yanglow me toi,

²³hüyange imanjing mangjonga lipu kahtoknyu shelupupa yekao me ngoh nang. Yha jing wetaipalan khongküm shapju me toita, hüyange imanjing mangjonge yha jing mangkoksa neikon nang. Tüoyangpoi hipak ja me iman-e üyin me ngohpu kahtoknyu nyamshao ne tamyangki.

²⁴“Yha jing wetaipalan mangjonge neikonyange, Elam-a tüo me. Iman khongkümpuwa shapju me toi, hüyange iman-a üsho yekhüppe lipu kahtoknyu te ta. Üyin me ngohwante iman-e nyam nyam shepu yanne tam, hüpoi sha-a iman-a liteiye toitawe hüyange wüotüopu phei ngohnang.

²⁵Aoyin shapju me toiyangki tüolan phei Elam toitawe ngohnang, hüyange yha jing wetaipalan mangjonglan-a yha neikonyange. Iman khongküm üsho yekhüp, khongkümpu shapju me toi. Üyin me ngohwante iman-a nyam nyam shepu yanne tampalan ne ngoh, hüpoi sha-a iman-a liteiye toitawe hüyange mongmeng pu phei, aoyin shapju me toiyangki tüolan yatuhshao tüoyange ngohnang.”

²⁶“Iman jing wetaipalan mangjonge khongküm neikonyange, Meshech hei Tubal lan-a tüome. Iman-a khongküm üsho yekhüp, khongkümpu yanglow-e toi. Tüoyangpoi hipak ja me iman-e üyin me ngohpalan fajümlihne tamyangki.

²⁷Üshongwantepu naomeilante phapu kih-e imante yihnoonne mangmu ne yetam, aoyin lipu kahtoknyute yonglah khak wangpu phei ta, iman jing yanglow-a iman jing shangje ne ang, hüyange imanjing ree-a iman mangtang me yüoh. Hipak ja me tüolan naomeilan-o üyin me ngohpalante fajümlihne tam-e wongnange ngohyangki.”

²⁸“Tüopa kih-e Egyptlan-a üsho yekhüppu aoyin yanglow-e toiyangki tüolan phei toiloi lamlak.”

²⁹“Yha jing ahngpalan hüyange wanglam lampalan phei Edom-o tüo me! Iman-a wongnangpu wetaipalan ne ngohyangki, hüpoi sha-a iman-o üsho mankhüppulan aoyin yanglow-e toiyangki tüolan phei lipu kahtok me ngoh nang.”

³⁰“Apyekao mepu ahnghalan khongkümpu tüoken me, hüyange hüke muh Sidonlan-o ngohnang. Hipak ja me imanjing wonga yawinmongpailak ne yanyangki, hüpoi sha-a aoyin yanglow-e toiyangki tüolan phei wüotüopu phei iman ta nang hüyange üsho yekhüppe toloimeiye lamnang. Aoyin lipu kahtoknyute ta tüolan mongmeng phei iman omnang.”

³¹“Aoyin yanglow-e toiyangki tüolan khongkümpu phinme Egypt ahngpa Pharaoh hüyange Ijing nyahponglan toloimeilak,” she Youngwanpa Kahwange inang.

³²“Taowe Egypt ahngpate üyin me ngohpalan fajümlihne linge tamyangki, hüpoi I hüyange Ijing nyahponglan khongküm toilak, hüyange üsho yekhüppulan aoyin yanglow-e toiyangki tüolan phei toloimei lak.” Youngwanpa Kahwange ngaoyangki.