Read Konyak Naga EZEKIEL 33 Bible Online

EZEKIEL 33 - Konyak Naga bible

EZEKIEL 33

¹Youngwanpa ngao üte pei:

²“Hangko kahta, nang kahtalante tüo itüoh, aope kahmük te Taowe wehok yah peilakeih hanghe ngaikülak. Tüopa kahmük tepu kahtalan-e iman yo mepu sheja Yompa ne lelak.

³Aope Iye yanglow owe peipu ngeyalakei, moilante deingao phawe Iye nyawong wünglak.

⁴Kahta ütam-e tüopa nyawong wüng jai hüpoi tüote mong yepha hüyange yanglow peiyange I toima-a, hüma-a I lipu jingne I yoite ümeng phalak.

⁵I lipuwa yoi nying nyingke püohpu, hangjingne ima-a Iye deingao phayang pheite mong yepha. Iye mong pha shihma-a, I yinhah shepu.

⁶Tüoyangpoi, yompawe yanglow peipu ngeyange nyawong yewüngma-a, yanglow peilak hüyange ünulan toilak, hüpoi iman lipu jingne-a yompate Taowe ümeng phalak.”

⁷“Sha-a, hangko kahta, Israel jat jingne Taowe nanga yompa ne linge tamnang. Hangkih tingme yanglow peilak nange jailakeih, nange imante jaine tamlak yang.

⁸Ünu kahta ja li eija she Taowe ngaowe tamma-a, hüpoi I ünu lam mepu lüppe ye-e I üyin yinlak ne nange Ite deingao yepha ma-a, hüma-a I-a ünu ja ne muh li sasa, tüoyangpoi I iy jingne Taowe nang te ümeng phalak.

⁹Hüpoi ünu kahta jate nange deingao pha hüpoi Iye ünu ompu yelakma-a, I ünu kahta ja ne muh lilak, hüpoi nang üyinpa-a yinpu oklak.”

¹⁰“Hangko kahta, Israellante iman-e hanghe i tüopa iye tamtüoh. ‘Teman-e lingyangpu püohpinpu hüyange teman jing ünulan phei teman hangki yih nang. Teman jajang jawe mah tainang. Teman hangke üyin ngohlak?’

¹¹Imante itüoh hüke üting tingha me Tao, Youngwanpa Kahwang Üyin Kahwangne mengtepuwe, ünu kahta ja ünu me lipu ngepute Tao mong yemei. Hüleima-a ünu lingpu lakyange üyin me ngohpu ngepute Taowe leihu nang. Israel, numan-e linghümpu ünu lingpu laktüoh. Numan hangne lihupu?”

¹²“Sha-a, hangko kahta, Israellan te itüoh, hüke aope khakshupu kahta jawe ünu omlakei, Iye lingyangpu khakshupu toishaowe I yintamne ye-oklak. Ünu kahta jawe ünu lingpu lakma-a, Ite shaoshiyateng yephalak, hüyangpoi khakshupu kahta jawe ünu omne wangma-a, I üyin yinne ye-oklak.

¹³Khakshupu kahta jate Taowe üyin tüolak janne ok, hüpoi Iye linyangpu hipak me lingpu toimeiye wangpu she teihne wangma-a hüyange ünu lingne wangma-a, Iye linyangpu hipak me lingyangpu toimei Taowe yeteih tüolak, I yoi ünulan jingne I lilak.

¹⁴Hüpoi ünu kahta jate nanga li eija she Taowe deingao pha ne ok, hüpoi Iye ünu lingpu mepu lakma-a, hüyange hanghe shemeipupa hüyange ütingpa lingma-a,

¹⁵leppu ja me, Iye seaye yahyangpute ümee paoyange yejema-a Iye hanghe kuhyah tüopa leih ye ne tamma-a ünu lingpu mepu I lakyange üyin phapu ngaokhüm pheite woima-a, I yelilak, hüpoi üyin tüolak.

¹⁶Iye lingyangpu ünu jingne Taowe ümeng winlak, hüyange Iye üyin tüolak hangjingne hanghe ütingpa hüyange shemeipupa Iye lingyangki.”

¹⁷“Tüoyangpoi Taowe hanghe lingyapeih tüowa yeshuja she numan kahtalan-e inang! Yeje, iman ngohpu nyoingoh wanglampa yeshupu.

¹⁸Aope khakshupu kahta jawe toimei lingpu laklakei hüyange ünu lingne wanglakei, tüopa jingne I-a lilak.

¹⁹Aope ünu kahta jawe ünu ümeng lingpu mepu laklakei hüyange hanghe ütingpa hüyange shemeipupa linglakei, Iye yoi üyin yinpu tüoyangki.

²⁰Hüpoi Israel, Taowe hanghe lingyangki tüowa yeshuja she nange iyangki. Nange hanghe lingyangki tüopawe Taowe nangte ngaophünlak.”

²¹Toman phowe teipu wangpeng pen me ni, leat pen, hüyange nga shepupa nyih me, kahta ja ao Jerusalem mepu yinyapeih peingoi hüyange üte i, hüke “Chingnyuwa toitateki.”

²²I peilak yashao me, Youngwanpa ünganwong ompu Taowe shinge pei. Aope ünenap tüopa kahta peingoi, Youngwanpawe üte ngaowe oklak ünganwong phawe tam.

²³Youngwanpa ngao üte pei.

²⁴Hangko kahta, Israel kahtok me heamtepu chingnyulan me aoyin kahtalan nyoiyapeih iman-e inang: “Abraham-a kahta ja shingha, hüyange Ite kahmük nopu pha. Teman üngang ngohnang, tüokhei sha-a kahmük-a teman jing.”

²⁵“Tao Youngwanpa Kahwange hanghe inang, imante itüoh: Numan-e mei-a iy phei omme hah nang. Numan-e peshaolante khümnang. Numan-e toilange ünu lingnang. Hangheye kahtok-a numan jingne she teihne tampu?

²⁶Numan-e numan jing yanglowte monghüm. Numan toishaolan-a nulakpa. Moilan-e yupipa sheko phei phwngngampu ling. Hangheye numan te kahmük-a numan jing she teihne tampu?”

²⁷“Imante itüoh hüke Tao, Youngwanpa Kahwang, üting tingha me üyin Kahwangne mengtepuwe deingao pha nang, hüke aoyin kahtalan heamtepu chingnyulan me nyoi toilak. Aoyin kahko yekao me nyoi phao yinmoklan-e hahlak. Aoyin kahtang me hüyange longsalan me nyoi daktin phei lilak.

²⁸Kahmük-a Taowe wüngmakke winne tamlak, hüyange hanghepa jingne ümeng jamloi ota tüopa wong üküm ngoiye peine tamlak. Israel kahtanglan jamloi wanwüng jengne menge mahpu jingne, tüopa kaiye kemme yongpu sheja nehoi yenanglak.

²⁹Aope Taowe kahtalan te iman ünu jingne shaoshi yateng phalakei hüyange kahmük-a jajang japu ne menge tamlakei, hüwante iman-e Taowa Youngwanpa she shinglak.”

³⁰Youngwanpawe i, “Hangko kahta, nang kahtalan-e aope iman chingnyu jantpenyulan me yejema-a iman jing nok tatenshong yinme hüoyapeih, nang jeng ngao nangki. Iman-e jawe jate hüke inang, ‘Kei taihah, sha-a Youngwanpa mepu hanghe ngao peiyapeih jaihah.’

³¹Tüokhei nange hanghe ilakei tüopa jailak jingne ü-kahtalan üngang jemnang, hüpoi nange imante hanghe linglak jingne ngao iman-e yeling. Iman-e nang ngaowa heilok hümpu hem ne teih, hüyange iman hahnyakpu lamte muh yelakpe tai.

³²Iman jingne nanga hangne-o yeje hüpoi maihem lokke yejema-a kongki ümtük konge wonne wangpa ja ne hei mengnang. Nange ngaopu lilite iman-e mongphawe jainang hüyangpoi tüolan yo mepu ja nehoi yejon.

³³Hüpoi aope nang ngaolan khongküm üting me peilakeih, hüyange tüolan ütingme peilak: hüwante iman-e shinglak hüke iman yo me hipa ja ngohyangki.”