Read Konyak Naga EZEKIEL 34 Bible Online

EZEKIEL 34 - Konyak Naga bible

EZEKIEL 34

¹Youngwanpa ngao üte pei.

²“Hangko kahta, Israel nyeeyompalante yaowe winpu ngaotüoh. Imante itpu ngao itüoh, hüyange imante Tao, Youngwanpa Kahwange hanghe i imante itamtüoh: Numan Israel nyeeyompalan, numan mahnang! Numan-e numan nying nyingke paowetük, hüpoi aope-o nyee yeyom.

³Numan-e düamyeng ying, mat phei takpu inkhek numan-e in, hüyange shemeipupa nyee toi hüyange hah. Hüpoi numan-e aope-o nyee yeyom.

⁴Wong yenangpupate numan-e yenamno, aoyin dak yemeitam, mayahpalante yenyeihtam, aoyin wa-e tai yah-e yeyetam, yejema-a aoyin mahyapeih tüolante yeleitam. Namnohah shepu nanleiye numan-e imante yemeipe jon.

⁵Tüokhei nyeelan-e nyeeyompa yenangpu jingne, iman yanne küm, hüwante phao yinmoklan-e iman toi hüyange hah.

⁶Tüokhei Ü-nyeelan-a kahmüoh kahtanglan kaiye wa-küm nang; iman kahtoknyu khaopute yanteki, hüyange sheja nehoi imante leipu yenang yejema-a iman yamlak jingne ngangpu yenang.

⁷“Tüokhei numan nyeeyompalan, Tao Youngwanpawe numante hanghe inang jaitüoh.

⁸Tao üting tingha me üyin Kahwangne mengtepuwe, jienge inang, Ü-nyeeha lan-a phao yinmoklan-e shümne tam hüyange iman hahtam, hangjingne ima-a nyeeyompa ao-o yenangpe ngoh. Ü-nyeeyompalan-e nyeelan yamlak jingne ye-ngang. Iman-e nyeelan jingne yeje hüpoi yoi jingne hei paowetük.

⁹Tüokhei, numan nyeeyompalan, üte jaiyah.

¹⁰Tao, Youngwanpa Kahwange, Taowa numan wepa she ngaiye i. Taowe numan yo mepu ü-nyeelan yahteilak hüyange aope-o numante iman nyeeyompalan ne yemengtamlak; numan shahate paowetüklak ne Taowe aope-o nishe yetamlak. Taowe ü-nyeelan-a numan ju mepu yinne tamlak hüyange numante iman hahne yetamlak.”

¹¹Tao, Youngwanpa Kahwange numante iyangki hüke Taowe ü-nying nyingke ü-nyeelan yamlak hüyange imante namnolak;

¹²tüokih-e muh nyeeyompawe yoijing nyeelan yanne kümpulante paowetükke hüyange jamshe yah-e nishe peipu kih-e namnolak. Wangnyak hüyange mahshupu nyih me ümeken me iman yanne tamyangki tüolan nyoijinglan mepu Taowe iman khongkümpu jamshe yah yelak.

¹³Taowe iman-a yinching kahmüklan mepu yah ngailak, iman jamshe jemtamlak, hüyange jamshe iman yoi kahmük te leih yelak. Kahtang yekao te, hüyange Israel yengyinlan tang te Taowe iman-a leih woiyelak hüyange iman-a heeijong ümei me uhyinglak.

¹⁴Kahtang yiha yo me hüyange kahjee yo me hüyange Israel kahmük phümha ühüng pheipu hahnyoi (heeijong) lili me Taowe iman-a ütuh yenangpe phümha hahne tamlak.

¹⁵Tao ü-nying nyingke ü-nyeelan yompane menglak, hüyange iman toloimeilak nyoi Taowe tüowe tamlak. Tao, Youngwanpa Kahwange ngaoyangki.

¹⁶“Aoyin mah ngohnang Taowe yamlak, aoyin waayounne tainang yah yelak, aoyin mayah yange ngoh maluwe tamlak, hüyange aoyin dakyapeih meiye tamlak; hüpoi aoyin nüt hüyange wongnang puphei ngoh Taowe mahtamlak, hangjingne aowe ütingpa lingnang tüopa nyeeyompa-a Tao ngohnang.”

¹⁷“Hümma-a sha-a, ü-nyeelan, Tao Youngwanpa Kahwange numan te inang, hüke Taowe numan nyeelante ngaophünlak hüyange ümenglan mepu ümeilan, younlan mepu nyee yanne tamlak.

¹⁸Numan ütam-a shemeipupa hüng hahpute mongme yehu; numan-e hanghepa yehah yapeih numan-e yawe nehoi lokke tam! Numan-e jaoshepu yeng ying hüyange numan-e hanghepa yeying, numan ya phei shamnoong ne linge tüoh!

¹⁹Numan-e yawe lokke tüohpu hüng üjing ülao nyeelan-e hahlak hüyange numan-e nuwetampu yeng yinglak.”

²⁰“Tüokhei sha-a, Tao Youngwanpawe numante hüke inang wongnangpu numan nyeelan hei wong yenangpu nyee nipa me Taowe ngaophünlak.

²¹Dakpalante numan-e heampate shung hüyange shangme shuyange nyeekhong mepu ükenphe te yanne tam.

²²Hüpoi ü-nyeelan-a Taowe yintamlak hüyange shaaji imante yemeipe jonne yetamlak. Taowe ü-nyeelan japhei me ja, ja phei me ja she ngaophünlak hüyange ümeng mepu ümeilan yanne tamlak.

²³Ü-shaoshanpa David imanjing nyeeyompa ja ne menglak jingne Taowe imante phalak, hüyange Iye imante paowetüklak.

²⁴Tao, Youngwanpa-a iman Kahwangne menglak, hüyange ü-shaoshanpa David iman jing wanglam lampa ne menglak. Tao Youngwanpawe ngaoyangki.

²⁵Hangheye iman yinne ngohpu oklak tüopa jiengjeppu Taowe iman phei linglak. Kahmük mepu yinmok ümeng lili Taowe jange teine tamlak, hümme nakshih ü-nyeelan kahko me yenyampe ngohpu oklak hüyange phao me shipu oklak.”

²⁶“Taowe iman moiman tamlak hüyange ü-üjao kahtang neikonne iman ngohne tamlak. Tüoken me Taowe aope iman-e wongpongne ngailakei waishuya shokke tampu phei imante moiman tamlak.

²⁷Pelickjonge ülick licklak, kah-e yoi ülick ngaitamlak, hüyange moilan yoi yoi kahmük me yenyampe nyoilak. Aope Taowe ü-kahtalan jing yankeilei phünne tamlakei hüyange aoyinne imante rha ne linge tam iman mepu lantampu linge tamlakei hüwante iman-e Taowa Youngwanpa she shinglak.

²⁸Yinhu jatlan-e shaaji imante nyieleihpu hango yeling oklak, hüyange phao yinmoklan-e iman-a yetoilak hüyange yehahlak. Iman yenyampe nyoilak, hüyange aowe-o iman nyamshao ne yetamlak.

²⁹Taowe imante üyao pheipu kah phalak, hüyange kahmük me seanyaopu lak ne tamlak. Ülao jatlan-e shaaji imante yaowelepu yengohlak.

³⁰Taowe Israel yinne angnang hüyange iman-a ü-kahtalan she moilanne shinglak. Tao, Youngwanpa Kahwange ngaoyangki.”

³¹“Numan, ü-nyeelan, Taowe uhyinge angpu nyee-ükhong, numan-a ü-kahtalan, hüyange Taowa numan Kahwang,” she Youngwanpa Kahwange inang.