Read Konyak Naga EZEKIEL 35 Bible Online

EZEKIEL 35 - Konyak Naga bible

EZEKIEL 35

¹Youngwanpa ngao üte pei.

²“Hangko kahta, nang sheta Edom phei tüi-e yongtüoh, hüyange Edom kahmükte yaowelene tamtüoh.

³Tao, Youngwanpa Kahwange kahtalante hanghe i ngaotam tüoh: Edom kahtanglan, Taowa numan wepa! Taowe numan-a hango yenangpe wüngmakke linge tamlak.

⁴Taowe numan jing chingnyulan-a heamteiye, Hüyange numan kahmük wüngmakke tüohlak; hüwante numan-e Taowa Youngwanpa she shinglak.

⁵“Numan yelakpe Israellan wepa ne ngoh hüyange yha kahtalan mahshupu yha ünulan jingne shaoshiyateng ükümpa hipak me lange toi.

⁶Tüojingne, üting tingha me Tao Youngwanpa Kahwang, Taowa üyin Kahwangne mengpuwe, iy shailak-a numan yatuhshao, hüyange numan tüopa mepu yeyin oklak. Iy shaipuwa numan-e püohpu, hüyange iy shaipuwe numan pheite woilak.

⁷Taowe Edom phaotang kahmük-a jajang japu ne menge tamlak hüyange tüopa kaiye kemme yongpalan moilan toitamlak.

⁸Taowe kahtanglan-a kahta mange maatamlak, hüyange aoyin yanglow me toiyapeih tüolan mange kahmüoh hei kahjee maatamlak.

⁹Taowe nanga jintepu jingne wüngmakke linge tamlak, hüyange nangjing chingnyulan me ao-o nishe yenyoilak. Hüwante Taowa Youngwanpa she nange shinglak.”

¹⁰“Tao Youngwanpa, imanjing Kahwangne ngohjang ngoh-e, nange jat ni Judah hei Israel, imanjing kahtok-o omme nangjing she nange i.

¹¹Tüojingne, üting tingha me Tao Youngwanpa Kahwang, üyin Kahwangne mengtepuwe, nang mongshih yangpu jingne, nange aohüng müktak yangpu jingne, hüyange ü-kahtalan yekao me nange aohüng yangpu jingne Taowe nang te leih phalak. Nange imante hanghe lingyangki tüopa jingne Taowe nang te shaoshiyateng phanang she iman-e shinglak.

¹²Numan-e Israel kahtanglan phei tüi-e, tüolan-a teman jing ngohnang, tüolan-a teman-e hahyinglak jingne pha she, phoiwümpu khongküm Tao Youngwanpawe jaiteki she numan-e shinglak.

¹³Numan-e ü-phei tüi-e yongelüowe hüyange kahta yelepu lamme numan-e ngaopu Taowe jaiyangki.”

¹⁴Youngwanpa Kahwange inang, “Hüke kahtoknyu nopuwe nang yeipute mongmeilak ne Taowe nanga wüngmakke linge tamlak.

¹⁵Üjing moth Israel ükengne menge tampute nang mongmeipu mei mei kih-e linge tamlak. Seir kahtanglan, üting, Edom kahmük khongküm wüngmakke linge tamlak. Hüwante moilanne Taowa Youngwanpa she shinglak.”