Read Konyak Naga EZEKIEL 36 Bible Online

EZEKIEL 36 - Konyak Naga bible

EZEKIEL 36

¹“Hüyange nang, hangko kahta, Israel kahtanglante ngaotam tüoh hüyange Tao Youngwanpa Kahwange iman jingne ipu ngaolante jaitüoh she itüoh:

²Youngwanpa Kahwange inang: Israel jing wepalan-e ya-naowe lei hüyange i, ‘Sha-a tüolan kahtang ülanglan-a teman jing!’

³“Tüokhei, hi-ngao itüoh, hüyange Tao, Youngwanpa Kahwang Taowe hanghe inang shingne tamtüoh. Aope yupi jatlan-e iman omme yah hüyange Israel kahtanglan nyieye kuhyah, moilanne Israelte teetam.

⁴Tüokhei sha-a Tao, Youngwanpa Kahwange numan kahmüoh kahtanglan te hanghe i, numan shaoha hei kahjeelan te hanghe i, numan heamteiye tüohpu nyoijinglan, hüyange hanghepa neikonne ngohpu jatlan-e ükengne menge tüohpu chingnyulan hüyange kuh nyieye yahyange phoiwümme tüohpu chingnyulan jaitüoh.

⁵“Tao Youngwanpa Kahwange, neikonne ngohpu jatlan, hüyange ünyei ne Edom phei tüi-e ümongshihpu sheamme ongwante ngaoyangki. Mongmei lokke ngo-e hüyange ye-i-yeshepe, iman-e ü-kahmük om hüyange tüopa heeijong mepu mothlei toinan yah.

⁶“Tüokhei Israel kahmük te hi-ngao itüoh; kahtang hei kahmüohlan, shaoha hei kahjeelante Tao, Youngwanpa Kahwang müktakke mongshih ngaipuwe inang hangjingne ima-a jatlan-e hanghepake teetam hüyange imante kahta ne ye-i-pe linge tam tüopa jingne itüoh.

⁷Tao, Youngwanpa Kahwange lahnyik mongkowe jannang hüke neikonpu jatlan-a wüotüopu ngelak.

⁸Hüpoi Israel kahtanglan pee me üne-o üyak ngaiye jonglak hüyange nangjingne ülick licklak, ü-kahtalan Israel. Nang nokte mamshe yelak.

⁹Taowa numan jingne ngohnang, hüyange Taowe hüke numan kahmük nishe pheaklak ütingne linge tamlak hüyange tüoken me üli deine tamlak.

¹⁰Taowe numan shangtoi jalunne tamlak. Numan chingnyulan me nyoilak hüyange hanghepa heamteiye tüoh khongkümpu linge yelak.

¹¹Taowe kahta hüyange yinmok shangtoi jaalunne tamlak. Numan üshongwante ngohyangpu phei shenyei she ngohlak; hüyange numan me hayimlan üngang ngohlak. Numan ngohyangpu kih-e tüoken me Taowe numan ngohne tamlak, hüyange Taowe numan üshongwantepu phei shenyei she jaalunne tamlak. Hüwante numan-e Taowa Youngwanpa she shinglak.

¹²Kahmük me nishe nyoilak nanjingne, ü-kahtalan Israel, Taowe numan yah yelak. Tüopa-a numan jing kahmük ne menglak, hüyange shaaji nishe numan hayimlan-e toinan ne yetamlak.

¹³“Tao, Youngwanpa Kahwange inang: Kahtalan-e kahmük te kahta hahpalan she nyikpuwa üting, hüyange iman-e hüke tüopawe jat hüyange tüopatepu hayimlan nyieye yahnang she i.

¹⁴Hüpoi sha-a me peiye shaaji kahta hahpa ne aowe nang mepu hayimlan nyieye yahnang tüopa ne yemenglak. Tao, Youngwanpa Kahwange ngaoyangki.

¹⁵Kahmükke shaaji jat te phoiwümpu yejema-a kahtalan-e tüopate üyin shinne yaowe tampute yejailak. Kahmükke shaaji jat tepu hayimlan nyieye yahpu yengohlak. Tao, Youngwanpa Kahwange ngaoyangki.”

¹⁶Youngwanpa ngao üte pei:

¹⁷“Hangko kahta, aope Israellan iman kahmük me nyoiyapeih, iman-e tüopa-a iman nyoingoh wanglam hüyange toishao kaiye iman-e nuwe tam. Iman nyoingoh wanglam-a sheko ja lekeng lep iye yejao yeshapu me angtampu kih-e ngohyangki.

¹⁸Hangjingne ima-a iman-e kahmük me toilange ünu ompu jingne hüyange peshaolan hangheye iman-e tüopa nuweshakke tampu jingne Taowe ümongshihpu wong iman tangme peitam nang.

¹⁹Iman nyoipu wanglam hüyange toishao jingne Taowe iman yeitam; hüyange Taowe iman-a yinching kahtalan yo me yanne tam.

²⁰Ümeken me iman tailakei, iman-e ü-üjao min wüotüotampu yah peinang, hangjingne kahtalan-e hüke i, ‘Tüolan kahtalan-e imanjing Kahwange imante phapu kahmük tüohne ngainang.’

²¹Shaajihi iman taipu üken phe mepu Israellan-e wüotüotampu tüopa tangte yah peipu we ü-üjao min jingne mongshangne üte tamnang.”

²²“Tüokhei sha-a, Tao Youngwanpa Kahwange iman jingne phapu ngaolan Israellante phatüoh. Taowe hanghe lingne tümyapeih tüopa-a numan Israellan meipu jingne yeje, hüpoi ü-üjaopa min jingne, hanghepa numan-e numan taipu kahmük lili me wüotüopu yah peiyangki tüopa jingne linglak.

²³Aope Taowe jatlante ü-min üyong üjaopa iman yo me numan-e wüotüone tampu min, nyüowe hüowe tamlakei, hüwante iman-e Taowa Youngwanpa she shinglak. Tao, Youngwanpa Kahwange ngaoyangki. Taowa üjao she jatlante hüolak jingne Taowe numan jonlak.

²⁴Taowe numan jat lili hüyange kahmük lili mepu yahlak hüyange numan jing yoi kahmükte numan yah yelak.

²⁵Taowe numante jaoshepu yenge shaitamlak hüyange numan jing peshaolan hüyange hangheye numan nuweshakke tam tüolan lili mepu numan jaowe tamlak.

²⁶Taowe numante mongjang üla hüyange kenmong üla phalak. Taowe numan mepu long mongjang üngei yah teilak hüyange numante innyaipu mongjang phalak.

²⁷Taowe numan me ü-yaha phatamlak hüyange numan-e ü-ngaokhümlan jonya hüyange Taowe numante phayangpu ngaokenglan tükke angya tüopate Taowe leilak.

²⁸Tüophei me Taowe numan pajeiyonglante phayangpu kahmük me numan nyoilak. Numan ü-kahtalan ne menglak, hüyange Taowa numan Kahwangne menglak.

²⁹Hangheye numan nuweshakke tam tüolan lili mepu Taowe numan yintamlak. Tahlick üngang ngailak jingne Taowe ngaokeng phalak, tüokaiye numan me shaaji seanyao yenglepu yengohlak.

³⁰Taowe numan jing pelick jong hüyange numan kah me ülick jaalunne tamlak, tüome nakshih jatlan yo me numan wüotüotamlak ne seanyao yenglepu yengohlak.

³¹Numan-e nyoingoh ümeng hüyange numan-e püohpinne lingyangpu teihtüolak, hüyange numan ünu hüyange nuweshak yangpulan jingne numan nying nyingke numante nuweteih lak.

³²Israel, Taowe tüolan khongkümpuwa numan jingne yelingtampu she numan-e shingne tamhu nang. Numan-e hanghe lingyangki tüopa jingne numan wüowe hüyange mongmengpu numante teih-e peine Taowe tamhunang. Tao, Youngwanpa Kahwange ngaoyangki.”

³³Youngwanpa Kahwange inang, “Aope Taowe numan jing ünu lili mepu numan jaowe tamlakeih, Taowe numan jing chingnyulan me numan nishe nyoine tamlak hüyange heamtepulan numante linge yene tamlak.

³⁴Aoyin numan jing kah kaiye kemyapeih moilanne iman hangke yiengemah hüyange phao ne menge mah ngeyangki, hüpoi Taowe numante tüolan nishe hamne tamlak.

³⁵Iman-e ilak, hangke tüopa kahmük hipak ja me phao ne menge mahtepuwa, Eden pesha kih-e ngaipu, hüyange chingnyulan hanghe yin menge tam, nyieyeleih-e yah, hüyange heamteiye tüoh, tüolan me sha-a chingnyoiye hüyange meipe latte hangke tüm!

³⁶Hüwante neikonne yemahpe yinne ngohpu jat lan-e, Tao, Youngwanpawe heamtepu chingnyulan linge ye hüyange winne tüohpu kah nishe hamme ye ne tam she shinglak. Tao, Youngwanpawe tüopa-a Taowe linglak she jan, hüyange Taowe linglak.”

³⁷Youngwanpa Kahwange inang, “Israellan-e üne-o tonge tamlak jingne taowe lingtamlak, hüyange nyee ükhong kih-e iman shangtoi taowe jaalunne tamlak.

³⁸Sha-a heamteiye ngohpu chingnyulan-a mowante toidolak jingne peipu nyeelan-e Jerusalem maawe tamme hipak ja me ngohpu kih-e, kahtalan-e maawe tamlak. Hüwante Taowa Youngwanpa she iman-e shinglak.”