Read Konyak Naga EZEKIEL 37 Bible Online

EZEKIEL 37 - Konyak Naga bible

EZEKIEL 37

¹Youngwanpa ünganwong yak ü-tangte pei, hüyange I yahawe tao yahtei hüyange ümeken kahtok me waan shaha ngoh tüoken kahjee üwo me tao shotne tam.

²Iye tao kahjee khongkümpu neikonne tam, hüyange üwaanlan üngang Taowe nge hüyange tüolan-a yeonge wanne mahteiye ngoh.

³Iye üte i, “Hangko kahta, tüolan waan üyin ne mengpu oklak a?” Taowe jan, “Youngwanpa Kahwang, nange hei shing!”

⁴Hüwante Iye üte i, “Youngwanpa ngaote tüolan wantepu waanlan-e manjai manjai she waanlante hi-ngao itüoh.

⁵Imante itüoh, hüke Tao Youngwanpa Kahwang, Taowe imante inang: Taowe numan tangme lüo yo ne tamlak hüyange numan üyin ne linge tamlak.

⁶Taowe numante ülah hei ühak ngaitamlak hüyange numan me üshowe lümlak. Taowe numante ülüo yolak hüyange numan üyin ne linge tamlak. Hüwante numan-e Taowa Youngwanpa Kahwang she shinglak.”

⁷Tüokhei üte ngaowe tampu kih-e taowe hi-ngao ngaowetam. Aope Taowe ngaowe ngohyapeih, taowe mookh shepu ngaowüng ja jai, hüyange waanlan shüppe jemme yoi yoi waante sheine wang.

⁸Taowe aope leiye ngoh, waan tangme ülah hei ühaklan pah hüyange tüophei me üshowe lümp. Hüpoi tüopa püm me lüohepu yenang.

⁹Hüwante Iye üte i, “Hangko kahta, wangyangte (yaha) hi-ngao itüoh. Hüke ünuk peli mepu wangyang peiye, tüolan ümang me ngohpu pümlan te lüoheye tamlak, hüyange iman üyin ne linge tamlak wangyangte Youngwanpa Kahwang ngaokeng pha yangki she itüoh.”

¹⁰Tüokhei üte hangke i hüke Taowe itpu ngao ngaowe tam. Ümang me ngohpu pümlan te lüo ong, hüyange iman üyin ne menge iman lüowe ya me yong, nyahpong ükhong üyong ne ngohyangki.

¹¹Tüophei me Iye üte i, “Hangko kahta, tüolan waan-a Israel nokphong khongkümpu ngohnang. Iman-e inang, ‘Teman waan wanmahteki, hüyange teman monghümpu mahteki; teman-a jaoshe-e langwinyange ngohnang.’

¹²Tüokhei hi-ngao itüoh, hüyange imante itüoh, hüke Youngwanpa Kahwange inang; leihuyah, taowe numan mangjonglan eptamlak, hüyange numan mangjong mepu ngaine tamlak. O ü-kahtalan, hüyange taowe numan Israel kahtok te woi yelak.

¹³Aope ümeken me ü-kahtalan mupu mangjonglan Taowe eplakei hüyange numan yah ngailakei, hüke numan-e Taowa Youngwanpa she shinglak.

¹⁴Taowe numante ü-lüo yowe tamyange numan üyin ne leihye-e tamlak, hüyange numan yoi kahmük me nyoilak. Hüwante numan-e Taowa Youngwanpa she shinglak. Taowe tüopa-a linglak she Taowe janyangki hüyange Taowe linglak. Tao, Youngwanpawe ngaoyangki.”

¹⁵Youngwanpa ngao üte üne-o pei.

¹⁶“Hüyange nang, hangko kahta, nange shengshaoh ja jontüoh, hüyange tüopa me nyantüoh, ‘Judah hüyange I eihalan Israel hayim jingne’; tüophei me shengshaoh ülao ja yahtüoh hüyange tüopa me nyantüoh, ‘Joseph jingne Ephraim shengshaoh hüyange I eiha Israel nokphong khongkümpu jingne.’

¹⁷Tüophei me shengshaoh ni-a üjeng moini yekao me nang yakke jontüoh, hüwante imni-a ja ne ngelak.

¹⁸Aope nang kahtalan-e nangte tüopate leppu hanghe shi tomante yehüolak a? she tongma-a,

¹⁹imante hüke itüoh, hüke Tao, Youngwanpa Kahwange Israel nanleipu shengshaoh Taowe yahlak hüyange hanghepa Judah nanleipupa ngohnang tüopa me angtamlak. Ni yahpuwe Taowe ja ne menge tamlak hüyange ü-yak me tüopa-a jonlak.”

²⁰“Shengshaoh moini nang yak me jontüoh hüyange kahtalan-e tüopa-a ngene tamtüoh.

²¹Tüophei me imante itüoh, hüke Tao, Youngwanpa Kahwange ümeken me ü-kahtalan yanne tai tüolan jatlan yomepu Taowe iman jamshe shaijemlak, hüyange iman yoi jing kahmükte jamme jemne tamlak.

²²Taowe iman-a Israel kahtanglan me kahmük me jat ja ne shüppe jemme tamlak. Iman tangme wanglam lamlak jingne iman me ahngpa ja ngohlak, hüyange iman shaaji jat ni ne yanne yengohlak yejema-a ahngching ni ne yanne yengohlak.

²³Shaaji iman-e iman nying nyingke nunushepu peshüolan-e nuweshakne yetamlak yejema-a iman nying nyingke ünuwe mengne yetamlak. Hangheye iman-e ünu om hüyange üte lowetam nang tüolan khongkümpu mepu Taowe iman lanne tamlak. Taowe iman jaowe tamlak, iman-a ü-kahta ne menglak, hüyange Taowa iman Kahwangne menglak.

²⁴Ü-shaoshanpa David iman jing ahngne menglak. Iman khongkümpu wanglam lampa ja phangme shüppe jemlak hüyange ü-ngaokhümlan mongphawe jonlak.

²⁵Ü-shaoshanpa Jacob te Taowe phapu kahmük me, ümeken kahmük me iman jing pajeiyonglan nyoiyangki tüo me iman nyoilak. Tüoken me iman jinjinte nyoilak, hüyange hüke muh iman jing hayimlan hüyange imanjing huhayimlan khongkümpu nyoilak. Hüyange ü-shaoshanpa David iman tangme jinjinte wanglam lamlak.

²⁶Iman jin jinte yinne oklakpa jiengjeppu ja Taowe iman chingnyoi ne tamlak hüyange iman shangtoi jalunne tamlak, hüyange iman kahmük me ü-khümjing angne tamlak, ümeken me tüopa jin jinte ngohlak.

²⁷Tao tüoken me iman phei ngohlak. Tao iman Kahwangne menglak, hüyange iman-a ü-kahtalan ne menglak.

²⁸Aope taowe tüoken me ü-khümjing iman phei jin jinte ngohlak jingne angne tamlakei, hüwante jatlan-e Tao, Youngwanpawe Israellan-a ü-kahtalan ne leyangki she shinge peilak.”