Read Konyak Naga EZEKIEL 38 Bible Online

EZEKIEL 38 - Konyak Naga bible

EZEKIEL 38

¹Youngwanpa ngao üte pei;

²“Hangko kahta, Magog kahmük mepu Meshech hei Tubal jatlan wanglam lampa ütahpa Gogte I phei tüi-e hi-ngao ngao tamtüoh,

³hüke Youngwanpa Kahwange inang: Leihuyah tao nang phei tüinang, O Gog, Rosh, Meshech hei Tubal ahngpa.

⁴Ijing tahwaan me yankeileiye wahyange, Taowe I lüngleine tamlak, hüyange Ijing wongnangpalan khongkümpu phei shuiye ngailak. Ijing nyahponglan, tüopa tepu koiponglan hei tümyangpu ükhong jamloi she hüyange wetaipalan liliye ree yahyange hüyange yanglow leapyange ngaitamlak.

⁵Iphei Persia, Sudan, hei Libya mepu kahtalan, hüyange moilan me ree hei yan shaoshaoh nangyange;

⁶Apyekao me Gomer hei Beth-Togarmah kahmüklan mepu hokke wepu kahtalan I phei nangyange, hüyange tüokih muh ülao jatlan mepu kahtalan ngaitamlak.

⁷Nang tüm ngohyah, eihja, nang nying nyingke tümyah; nang hüyange nang shongte jem ngohpu ükhong khongküm, hüyange nanga iman jingne yompa ne mengtüoh.

⁸Wangpeng nangjange ngohyang phei me ümeken me jatlan maapu mepu kahtalan jamshe yahye, hüyange wehokte nyampu yenangpe nyoi ngoh, tüolan chinghahlak jingne Taowe Ite ngaokeng phalak. Iye Israel kahtanglan chinghah lak, hanghepa ükengne menge tam hüyange wanwüng jengne hipak laowe tüoh, hüpoi hükihpu ken me sha-a kahtalan nyampu yenangpe ngohnang.

⁹Nang hüyange nangjing nyahponglan hüyange nangphei jatlan üngang nangyange wangyang wangyi ja leye shümme peilak hüyange wangphom kih-e kahmükte yüohlak.”

¹⁰Hatüowa Youngwanpa Kahwange Gogte hanghe i hatüo ngohnang: “Aope tüopa hipak peilakeih, nange ünu toi linglak juteih ükong wanglak.

¹¹Nange ümeken me kahtalan chingmei me hüyange nyampu yenang jantpenyu ye-ang tienpu hango yenangpe nyoipulan chinghahlak jingne tümlak.

¹²Hipak ja me heamteiye ngohpu chingnyulan me aoyin nyoi ngohyapeih tüolan kahtate nange kuhyange nyieyeyahne tamlak. Iman jatlan mepu shüppe jempu ne ngoh, hüyange sha-a iman me yinmok yinha, hüyange toinyunanha nangyange kahtoknyu lampong me nyoi ngoh nang.

¹³Sheba hüyange Dedan kahtalan hüyange Spain chingshaolan mepu pheeinyuleihpalan ne nangte tonglak, ‘Nange kuhleihyange nyieye yahlak hüyange shümlak jingne nangjing nyahponglan nange jemne tam man? Nange hon hei khüm, yinmokyinha hei toinyu nanha, hüyange yakphei lükke yahpulan khongküm puphei yayong ne tüohlak mongnang kü a?’ ”

¹⁴Tüokhei Youngwanpa Kahwange Gogte Iye hanghe inang iye tamlak jingne tao shon: “Sha-a aope ü-kahta Israellan nyampu yenangpe nyoinang, nang yayonglak,

¹⁵nang nyoi mepu apye üjai ngoiye, jatlan üngang mepu wetaipalan hüyange wongnangpu nyahponglan üngang woiyange, moilan koipong tokme ongyange yayonglak.

¹⁶Nange ü-kahta Israellante wangyang wangyiye kahmük linne taipu kih-e shümlak. Aope hipak ngoilakei, jatlan te Tao ao shi hüolak nanjingne, nang phei tüi-e Taowe hanghe lingnang tüowe ü-üjaopa hüolak jingne, ü-kahmük chinghahlak jingne Taowe nang shonlak.

¹⁷Ngoikülak hipak me Israelte shümlak jingne Taowe ütamja yah peilak she aope Taowe ü-shaoshanpa Israel hipa kaiye ngaowe tamme üshongwante muh Taowe ngaohümpuwa nang ngoh nang.” Youngwanpa Kahwange ngaoyangki.

¹⁸Youngwanpa Kahwange inang, “Aope Gog-e Israel chinghahlakei, tüonyih Taowa mongshih ngailak.

¹⁹Tao mongshih yemeipe ngailak Taowe jaitam nang, hüke tüopa nyih me Israel kahmük me yeonge menge minwe leipu ngohlak.

²⁰Nyah hei awha lili, yinmok üjoi hei üyong lili, hüyange kahtok tangme ngohpu kahtanyuha lili üte nyampuwe ninlak. Kahtanglan leamme tailak, longwaklan khüwlak, hüyange jantpenyu lili shüoh talak.

²¹Mahshupu ülam khongkümpuwe Taowe Gogte fajümlihpu üyong phalak. Tao, Youngwanpa Kahwange ngaoyangki. Ijing kahtalan-e iman jing yanglow-a yoipheipulan phei tüi-e nolak.

²²Taowe Ite daktin hei iy shaipu phei shaoshi yateng phalak. Akshengyeng wai hei yilong, vün pheipu kahnyan hei vün phei jamme, I tangme, Ijing nyahpongian tangme hüyange I yekao me ngohpu jatlan maapulan tangme shokke tamlak.

²³Tüo kih-e jatlan khongkümpu te Taowa kheyong nang hüyange Taowa üjaopa me ngohnang she Taowe hüolak. Hüwante iman-e Taowa Youngwanpa she shinglak.”