Read Konyak Naga EZEKIEL 39 Bible Online

EZEKIEL 39 - Konyak Naga bible

EZEKIEL 39

¹Youngwanpa Kahwange i, “Hangko kahta, Meshech hei Tubal jatlan wanglam lampa ütah Gog, yaowele tam tüoh, hüyange Ite itüoh hüke Taowa I wepa.

²Taowe nanga lam ülapa yekao te lüppe tamlak, hüyange nanga apyekao üjai mepu Israel kahtangte manpei manpei yayongne tamlak.

³Tüophei me nang yaknya yekao mepu wenglah hüyange nang yakjah yekao mepu nangjing lahhan Taowe kawinlak.

⁴Gog hüyange nangjing nyahponglan hüyange nangphei teishinpulan Israel kahtanglan me liye toitalak, hüyange numanjing manga awhalan hüyange phao yinmoklan hahying ne Taowe linge tamlak.

⁵Numan kahko me toitawe lilak. Tao, Youngwanpa Kahwange ngaoyangki.

⁶Magog kahmük te hüyange yengnah paowe ümeken me nyampu yenangpe kahtalan nyoi tüolan me Taowe vün pahtamlak, hüyange moilanne Taowa Youngwanpa she shinglak.

⁷Ü-kahta Israellan-e ü-üjaopa min shingnang she ütingpa me Taowe linge tamlak, hüyange shaaji Taowe ü-min te ye-i-yeshepe lingne yetamlak. Hüwante jatlan-e Tao, Youngwanpa Taowa Israel Üjao Kahwang she shinglak.”

⁸Youngwanpa Kahwange i, “Nyih hipak jeng Taowe ngaoyangpuwa üting me peikülak.

⁹Israel chingnyulan me aoyin kahtalan nyoi iman yayonge tailak hüyange yonglah wangman-e, jaklak han ne shaijemlak. Iman-e ree, wenglah, lahhan, ngou, hüyange peshümlan phei vün jaklak, hüyange wangpeng nyit mongme jaklak jingne wangman-e ngohlak.

¹⁰Iman-e kahko me jaklak han yahlak ne yeje yejema-a phao me pee aklak ne yeje, hangjingne ima-a iman-e jaklak ne yonglah wangman-e ngohlak. Aoyinne imante kuhyange nyieleih yapeih, tüolante iman-e kuhyange nyieleihlak.” Youngwanpa Kahwange ngaoyangki.

¹¹Youngwanpawe i, “Aope tüolan khongkümpu ngailakei, Taowe Israel me (yengmang) heongye Yinkempalan Kahjee me mangjong ja Gogte phalak. Gog hüyange Ijing nyahponglan khongkümpu tüoken me mulak, hüyange tüopa kahjee te ‘Gog nyahponglan Kahjee’ she nyiklak.

¹²Kahta mang khongkümpu mulak jingne tüowe Israellan lekeng nyit hipak yahlak hüyange kahmük-a nishe jaolak.

¹³Kahmük me ngohpu moilanne iman mang mulakte jamlak, hüyange Taowe okpu ngepu nyih me tüopa jingne iman-e yihnoonlak. Tao, Youngwanpa Kahwange ngaoyangki.

¹⁴Leat nyit linyang phei me, kahtok me towe tüohpu manglan yamme hüyange mulak jingne kahmük linne kemlak kahtalan lelak, tüome nakshih iman-e kahmük-a jaowe tamlak.

¹⁵Kahmük me iman ongong yeye she kemwante, iman-e kahta waan tüopu hipak phe me, tüopa phinme iman-e minsang hüowe tüohlak, tüo kaiye mangjong shaopalan peilak hüyange Gog nyahponglan kahjee me mutamlak.

¹⁶(Nyahponglan phei me tüopa ü-o me iman min minyange jila ja ngohlak.) Hüyange tüokaiye kahmük-a nishe jaolak.”

¹⁷Youngwanpa Kahwange üte i, “Hangko kahta, üken phe mepu awhalan hei yinmoklan khongkümpute Taowe iman jingne tümpu toidopu hahlak jingne nyiktüoh. Hatüowa Israel kahtang me mo üyongne menglak, ümeken me iman mei hahyange iy yinglak!

¹⁸Iman-e wetaipalan jing mei hahlak hüyange kahtoknyu wanglam lampalan iy yinglak, iman aoyin nyeepong yejema-a nyeehalan yejema-a youn hei panne angpu mahu üponglan toipu kih-e toilak.

¹⁹Aope Taowe toidopu kih-e tüolan kahta toilakei, awhalan hei yinmoknyuhawe iman-e okpu shinne üyao lili hahlak hüyange tüopawe iman manjok manjok iy yinglak.

²⁰Ü-khao me numan-e okpu shinne koiponglan hei tüolan tangme ongpalan, hüyange wetaipalan hei hokke okpu kahtalan iman-e hahlak. Tao, Youngwanpa Kahwange ngaoyangki.”

²¹Youngwanpawe i, “Taowe jatlan te ü-müktishiwa ngene tamlak hüyange hangke Taowe ü-ütingpa ngaophünpu jonlak jingne ü-ünganwong Taowe jonnang imante hüolak.

²²Tüolan kaiye Israellan-e Taowa imanjing Youngwanpa Kahwang she shinglak.

²³Hüyange iman-e ü-phei tüi-e ünu ompu jingne Israellan phowe teiye ngoh she jatlan-e shinglak. Iman jing wepalan-e imante naowe tamlak hüyange shapju me iman toitamlak jingne Tao iman mepu lüppe tai.

²⁴Iman yejao yeshayangpu jingne, iman-e nuweshakpu jingne, iman-e hanghe tüolakne wange ngoh Taowe imante pha, hüyange iman mepu Tao lüppe tai.”

²⁵Youngwanpa Kahwange i, “Hüpoi sha-a Taowe Jacob huhayim, Israel kahtalan te shüpshe lak, hüyange nishe iman jaalunne tamlak. Taowe ü-üjaopa min tükke anglak.

²⁶Aope iman üne-o nyampu yenangpe imanjing kahmük me aowe-o imante nyamshaowe tamlak yenangpe nyoilakei, hangke üte lowelampu kaiye iman ye-i-yeshepu yatuhshao me ngoh iman-e pemeipu oklak.

²⁷Taowa üjaopa me ngohnang she jatlan maapute hüolak jingne, Taowe ü-kahtalan ümeken kahmüklan me iman jing wepalan nyoi tüolan mepu khongküm yah yelak.

²⁸Hüwante ü-kahtalan-e Taowa imanjing Youngwanpa Kahwang she shinglak. Iman-e tüopa shinglak, hangjingne Taowe iman-a phowe teine tam hüyange sha-a iman shaijem hüyange iman yo me sheja nehoi yetüohpe imanjing yoi kahtokte yah yene tam.

²⁹Israel kahtalan tangme Taowe ü-yaha shokke tamlak hüyange iman mepu tao aope-o nishe lüppe yetailak. Tao, Youngwanpa Kahwange ngaoyangki.”