Read Konyak Naga EZEKIEL 4 Bible Online

EZEKIEL 4 - Konyak Naga bible

EZEKIEL 4

¹“Hangko kahta, jaklong ja yahtüoh, tüopa nang sheshao me angtüoh, hüyange Jerusalem chingnyu ngailak jingne tüopa tangme nyanne lingtüoh.

²Tüophei me tüopa phei tüi-e neikon-e jhom shaotüoh, yomteplan wetüoh, tüopa me kahtok ton-e lingtüoh; tüopa neikon-e yomlak nyoi lingtüoh, hüyange tüopa neikon-e jankhüwlak angtüoh.

³Hüyange yan tükpan ja yayah hüyange tüopa-a chingnyu hei nang nipa me jan kih-e angtüoh. Chingnyu yete sheta metüoh. Hatüowa tukmong me, hüyange tüopa tuk yahpuwa nangne menglak. Tüopa-a Israel jat jingne füo ja ne menglak.

⁴“Tüophei me nang yaknyaye me neamyange lamyange ngohtüoh, hüyange tüopa tangme Israel nokphonge ünu ompu kitamtüoh: nyih hangshin nang lamyange ngohlakei, tüopa phei shuwe nange iman-e ünu ompu kilak.

⁵Hangjingne iman shaoshine tampu wangpenga Taowe nangte nyih itpu phei jakih-e phanang; hüke nyih gho lüm phei me detu; hükih-e nange Israel nokphonge ünu ompu kilakyang.

⁶Aope nange tüopa sholakei, yakjah ye me nang lüppe yetüoh hüyange Judah-e püohpin yangpu jingne nyih deli shaoshitüoh; iman jing shaoshiyateng wangpeng lep ipu me nyih ja pong.

⁷“Jerusalem tukyangpute nang mük khak ange leitüoh. Chingnyute nang yaktümp hüotüoh hüyange tüopa phei tüi-e hi-ngao ngaotüoh.

⁸Taowe nangte shatamlak tüokaiye tüopa tukpu manlin manlin nang jaye kao mepu jaye kaote lüpne ye-oklak.”

⁹“Sha-a wheat, barley, pheang, hoiling pheang, cee hüyange spelt tah ütam yayah. Tüolan khongküm ja ne nyüt tüoh hüyange an ne lingtüoh. Tüopa-a nyih gholüm detu mongme nang yaknya ye me lamyange ngohwante nange hahlak.

¹⁰Nangte nyih japu jingne an gram ghoni delüm tamlak, hüyange tüopawe üne nyih ngoiye hahlak.

¹¹Nange üne-o yeng-a ityange nyihte wan ni hei yinglak.

¹²Nange kahta jing ihwan phei vün jaktüoh, tüopa vün me an lingtüoh, hüyange ümeken me kahta liliye nang ngene ok tüoken me tüopa hahtüoh.”

¹³Youngwanpawe i, “Tüopawe aope iman yinching kahmükme yanne tamlakei hanghepa Ngaokhüm me tienang tüopa hahying Israel lan-e hahlak hüonang.”

¹⁴Hüpoi taowe janne ye, “Yeje, Okkeshangpupa Youngwanpa! Taowe aope-o ü-nying nyingke yenuyeshak. Naha hipak mepu muh taowe aope-o iman nying nyingke lipu yejema-a phao yinmok-e toipu hanghe yinmok mei-o yehah, taowe aope-o yejao yeshapu she tahtüopu hahying yehah.”

¹⁵Tüokhei Kahwange i, “Yeonge meiteki. Taowe nangte kahta ih nanleiye mahu ih jonne tamlak, hüyange nange nangjing an-a tüopa me lingne ok.”

¹⁶Hüyange Iye paowe i, “Hangko kahta, Jerusalem jingne peipu an taowe lakne tamlak. Tüoken me kahtalan yatuhshao menge ponglak hüyange iman-e hahpu hahying hüyange iman-e yingpu yeng itte shemwante iman mong toitailak.

¹⁷Iman an hüyange yeng yenanglak; iman mongyehüm okpe ngohlak hüyange iman yoi ünulan jingne poihwintam lak.”