Read Konyak Naga EZEKIEL 41 Bible Online

EZEKIEL 41 - Konyak Naga bible

EZEKIEL 41

¹Ünepa me kahtapawe üwopa tüp, Üjao nyoite tao woi in. Tüopate inpu yalam Iye sheam; tüopa me moini yekao üpeam me yakkong wokpong ngoh.

²Hüyange ongpu yekao üpeamte yakkong pen; hüyange ongpu yekao moinikao jant me yakkong nga pong ngoh. Tüopa tungmong Iye sheam: tüopa-a üjükte yakkong deli, hüyange üpeamte yakkong da ngoh.

³Tüophei me I ümongpa tüpmong te ong. Tüopate inpu yalam Iye sheam, tüopa me lupute yakkong ni hüyange ongpu üpeamte yakkong wok, moini yekao jant me yakkong nyit nang yange ngoh.

⁴Iye tüopa tüpmong sheamme lei, hüyange tüopa me üshei yekao me yakkong da pong, ja kih kih-e ngohyangki. Hüwante Iye üte i, “Hatüowa üshei phei shejaopupa nyoi.”

⁵Kahtapawe khümjing nok ümongye jant jeipute sheam, hüyange tüopa-a yakkong wok ngoh. Khümjing neikonne, jant tangme yakkong peli khaowe tüp üjoilan lingyange ngoh.

⁶Tüolan tüp lüm me shinyange, taleng phe me tüp delüm pong phei ngoh. Taleng phe mepu khümjing ü-atye jant-a üphangpa taleng phei shepe she, tüokaiye tüopa me phat yenangpe tüp me lingpuwa jant tangme ngohpu ok.

⁷Tüojingne khümjing jant te aope ü-atye mepu leilakei, ütangpa ngoiye khongkümpu jakih kih-e jeipukih nge. Khümjing ü-atye jant tangme, tüpnyoilan ü-at ye me, khaolehpu püangshai ni ling, tüo kaiye üphangpa tüp mepu üwopa tüpte ongpu ok hüyange ütokpa tüpte ngoipu ok.

⁸Taowe üne-o khümjing neikonne lengjong lingyange nge; ünahye tüp nyoijing sheampu me yakkong wok khakwange.

⁹Ünahye mepu tüp jant jeipu me yakkong nga; hüyange lengjong nyei ngaitampu me yakkong nga. Khümjing tepu lengjong nipa me;

¹⁰hüyange ghonyoi tüp khümjing neikonpu me nyoijing ngaipu yakkong da.

¹¹Hüyange tüp ünah yemepu taküplan lengjong yemepu epyange angtüoh, apyekao me taküp ja, hüyange taküp ja-a heyekao me; hüyange üpeam yekaome hüke neikonne tüohpu-a yakkong nga.

¹²Khümjing henyipye ghonyoi yekao me meepu nok-a yakkong denyit khao; hüyange nok shüpneipu tepu jant jeipu me yakkong nga, hüyange tüopa üjük (laopu) me yakkong detu ngohyangki.

¹³Kahtapawe khümjing ü-atye sheam, hüyange tüopa-a yakkong gho ja laowe ngoh. Hüyange khümjing tokphei ye mepu, henyip yekao nok nyoijing ükeng ngoiye, nyoijinga yakkong gho ja muh ngoh.

¹⁴Khümjing sheshaoye kaiye, moini yekao mepu nyoijing ükeng omme nyoijinga yakkong gho ja muh ngoh.

¹⁵Iye henyip yekao me nok laopute sheam, moini yekao tepu tunglam omme, hüyange tüopa-o yakkong gho ja ngohyangki. Khümjingte ongpu lam mepu tüp, Üjaopa Nyoi, hüyange Shejaopupa Nyoi,

¹⁶hüyange moilan lüm khongkümpu me tawo neikon-e ngoh, nok ümong jant me taleng mepu tawo te ngoi-e tawo mepu noktok ngoi-e neikon-e pee phei büang;

¹⁷ümongpa tüpte ongpu taküpte ngoi-e ümongye hüyange ütahye me ngohyangki. Hüyange jant khongkümpu me hüyange neikon-e ümongpa tüp me hüyange tüp hotan me cherubim lingyange ngoh.

¹⁸Logpee phei me cherubim she, ja pheite ja woiye, tüp neikonpu khongkümpu me ngoh. Cherub lili me sheta nipong.

¹⁹Logpee ükao ja ye me kahta sheta meeyange, hüyange pee jayekaote meeyange yengkong mailang sheta ngohyangki. Hatüo kih-e jant khongkümpu neikonne,

²⁰kahtok mepu taküp kaiye daopu me cherub hüyange logpee ngohyangki.

²¹Üjaopa nyoitepu tashüplan-a ja kih kih-e ngoh. Shejaopupa Nyoijingte ongpu taten sheshao me, leilak müklei me pee phei lingpu wümjong lepu ülam ja ngohyangki.

²²Tüopa-a daopu me yakkong lüm hüyange khaopu me yakkong ni. Tüopatepu shongnyulan, tüopa yajenth, hüyange tüopa neikonpu khongküm pee phei lingyange ngoh. Kahtapawe üte i, “Hatüowa Youngwanpa sheshao me hanghepa khao yongyapeih tüo ngohnang.”

²³Üjao Nyoite inpu yalam üküm yeme taküp ja ngohyangki, hüyange shejaopupa nyoite inpu yalam üküm yeme-o üne-o ja ngoh yangki.

²⁴Taküplan-a nipong pheiyange jhotyange üwome lüowe eppe ngohyangki.

²⁵Jant me ngohpu meimei kih-e Üjao Nyoi taküplan me logpee hüyange cherubim lingyange ngohyangki. Hüyange onglam me ngohpu tüp taküp ü-atye khongkümpu me, pee phei neamme lingyange ngohyangki.

²⁶Tüopa tüp ünahye me tawo lingyange, hüyange jant-a logpee phei oleng lingyange ngoh yangki.