Read Konyak Naga EZEKIEL 42 Bible Online

EZEKIEL 42 - Konyak Naga bible

EZEKIEL 42

¹Tüophei me kahtapawe ghonyoi te tao woi in hüyange apyekao khümjing yekao nokte, henyip yekao khümjing nok mepu meiyange yejaipe tao woi.

²Tüopa nok-a yakkong gho ja lao hüyange khaopute yakkong denga ngoh.

³Ükao ja me khaopute yakkong da nyoijing meeyange hanghepa khümjing paowe ngoh, hüyange jayekao me nokshaoye ghonyoite inpulam yekaote meeyange ngoh. Tüopa-a yafün lüm me we, moilan ja phei jawe jiengpeiye ngoh.

⁴Tüopa nok apyekao paowe yalam ja khaopute yakkong pen hüyange laopute yakkong gho ja ngoh, tüoyekao me ongpu lam nangyange ngoh.

⁵Nok ütokpa wen mepu tüplan-a üwopa hüyange üphangpa wen phei sheti she ngoh, hangjingne ima-a tüolan tokphei yete sheye she ngoh.

⁶Üwen lüm mepu tüplan khongkümpu me kahhom yange hüyange ghonyoi mepu ülao nokte shengpu kih-e shongnyulan yenang.

⁷Hüyange ü-atye me tüp phei yoi yoi ne ghonyoi ü-at yeme, tüp phei janhüowe yakkong denga laowe jant ngoh yangki.

⁸Hangjingne ü-atye ghonyoi tüplan-a yakkong denga lao, tüoyangpoi khümjing phei janhüo pulan-a yakkong gho ja laowe ngoh.

⁹Tüplan üphang yeme heongyeme tatenlam ngoh, hüke ja-a ü-atye ghonyoi mepu onge,

¹⁰ümeken nyoi me ü-atye jant ükong wang. Heyekao me-o, longkon phei janhüowe hüyange nok phei janhüowe, iman sheshao me yalam nangyange tüplan ngohyangki.

¹¹Tüp sheshao me apyekao me ngohpu meimei kih-e yalam ja ngohyangki. Itte sheampu ja kih-e, we-lingpu jakih-e, hüyange yalam jakih muh ngohyangki.

¹²Tüp üphang me noktepu heyekao; heongye ünukpong ümeken me jant ükong wang tüoken me taküp ja ngoh.

¹³Kahtapawe üte i, “Tüopa nok moini üjao, tüolan me Youngwanpa tangte ngengpalan aoyin ongyapeih iman-e üjaopa dopulan hahlak. Hangjingne tüplan-a üjao, ngengpalan-e shejaopupa dopulan tüoken me anglak yang: hahying dopu hüyange ünu jingne toidopulan yejema-a püohpinpu jingne dopulan.

¹⁴Aope ngengpalan khümjing me ngohyalakei hüyange nokshao ghonyoite taihuwe teilakei, iman-e tüolan tüp me Youngwanpate shaoshanwante yah ngohpu üjao inkheklan tüohlak yang. Ümeken me kahtalan jemme ngoh tüokente iman yushaome iman-e ülaopa inkhek yahlak yang.”

¹⁵Aope kahtapawe khümjing ümong nyoi sheamme shoyapeih, heongye peten kaiye Iye tao yah yüo hüyange ü-atye nyoi neikonne sheam.

¹⁶Iye sheamlieng yah hüyange heongyekao sheam, hüyange tüopa-a yakkong gho nga ne ngoh.

¹⁷Tüophei me Iye apyekaote lüpyange sheam, sheamwante yakkong gho nga ne ngoh.

¹⁸Tüophei me I lüppe ye hüyange heyekao sheam, tüopa me-o sheampu me yakkong gho nga ngoh.

¹⁹Tüophei me I henyip yekaote lüp hüyange sheam. Sheamwante yakkong gho nga ngoh.

²⁰Hüke Iye tüopa-a ükao peli me sheam. Tüopa neikonpu me jant ngoh yangki, yakkong gho nga laowe hüyange yakkong gho nga khaowe, tüopawe üjaopa hei bangnyuha nipa me yoi yoine tam.