Read Konyak Naga EZEKIEL 43 Bible Online

EZEKIEL 43 - Konyak Naga bible

EZEKIEL 43

¹Kahtapawe heongyekao me meepu petente tao yahtei;

²hüyange tüoken me Israel Kahwang ompu phihlangpu wangngai heongye mepu peipu Taowe nge. Kahwangpa ngaowünge yengching wüng kih-e ngao, hüyange kahtoknyute phihlangpu wangngai teetam.

³Tüopa himanga Jerusalem mahtamlak jingne Kahwang peipu Taowe ngeyangpu meimei kih-e, hüyange Chebar Yengyin me Taowe ngeyangpupa meimei kih-e ngohyangki. Hüwante Taowe ü-nying nyingke kahtok yekaote ü-sheta khuhta.

⁴Phihlangpu Youngwanpa wangngai-a heongye peten kaiye peingoi hüyange Khümjingte ong.

⁵Youngwanpa yahawe tao nowe in hüyange ümongpa ghonyoite tao yah in, ümeken me khümjinga Youngwanpa müktishiwa-e maawe ngoh.

⁶Tüoken me ü-phin me kahtapa yong, hüyange Khümjing mepu Youngwanpawe ü-phei ngaopu taowe jai:

⁷“Hangko kahta, hatüo me ü-ahngpa shotjing. Hatüo me Tao Israel kahtalan yo me ngohlak hüyange iman tangme jin jinte wanglam lamlak. Israel kahtalan-e jeyah yejema-a iman jing ahngpalan ne jeyah shaaji nishe ülao kahwanglante yoppe khümpu kaiye yejema-a iman jing ahngpalan mang tüolan nyoi me nuweshakke tampuwe ü-üjaopa min yaoweleye yetamlak.

⁸Ahngpalan-e iman jing ahngnok tangke hüyange tashüp ü-khümjing tangke hüyange tashüp phei neakke we, tüo kih-e lingpu kaiye toman pa me jant-a ja shingha. Iman-e lingpu nulakpa toishaolan khongkümpuwe iman-e ü-üjaopa min yaoweleye tam, tüo kaiye ü-mongshih puphei Taowe iman mahtam.

⁹Sha-a iman-e ülao kahwanglante yoppe khümpu laklak, hüyange imanjing ahngpalan mang yahteilak wongpong. Iman-e hüke lingma-a, Tao iman yo me jinjinte ngohlak.”

¹⁰Hüyange Youngwanpawe yelakpe i, “Hangko kahta, Khümjing jeng Israel kahtalante itüoh, hüyange tüopa linglak jeng iman-e teihne tamtüoh. Iman-e lingyangpu ünu toishao jingne iman wüotüone tamtüoh.

¹¹Iman-e hanghe lingyangki tüopa jingne iman wüopu ne mengma-a, khümjing tümme tapu jeng imante khoihnyaiye itüoh: tüopa itteshempu, tüopate ongpu lam hei taipu lam, tüopa müklei, tümme tapu shemin lamphe, hüyange tüopatepu wanglam hei jonnepailak itüoh. Iman jingne tüolan khongkümpu nyantüoh hümme nakshih iman-e sheminlam phe hangke tümmeta ngelak hüyange wanglam lili jonpu oklak.

¹²Tüopa-a Khümjing ngaokhüm: kahtang üshang tüopa neikonpu nyoijinglan khongkümpuwa üjao hüyange jaoshapu nyoi.”

¹³Tüolan-a wümjong sheampulan ngohnang. Khümjing sheampu ja kihpu sheamwu muh jonyange sheam. Wümjong neikonpu yajenth khongkümpu me lupute yakkong ja hüyange khaopute yakkong ja, ü-atye ünah neikonpu üjute yakkam ja phei me tangkhüw daowe yengsho ngoh;

¹⁴Wümjong ükümpa wen, yajenth üju mepu yakkong ni daowe ngoh. Ünepupa wena ünah yemepu yakkong ja neikonpu mepu shinne ye, hüyange yakkong peli daowe ngoh. Tüophei mepupa wenno ünah mepu yakkong ja neikonpu mepu shinne ye.

¹⁵Ütangpa wenlan, ümeken me toidopulan jakke tamyapeih, tüolan-o yakkong peli dao. Ünuk peli me nyeiye ngaitampulan-a ütangpa mepulan khongkümpu phei shedao.

¹⁶Wümjong ütokpa-a neikonpu jakih kih-e, moilan yekao me yakkong pen me nipong;

¹⁷Üwopa wenno neikonpu jakih kih-e, moilan yekao me yakkong penme peli pong, ü-atye ünah üjute yakkam ja phei me tangkhüw daowe ngoh. (yengsho-a yakkong ja khao) Wümjongte ongpu yafünlan-a heong yekao me.

¹⁸Youngwanpa Kahwange üte i, “Hangko kahta, Taowe nangte hanghe i jaitüoh. Aope wümjong weyalakei, nange tüopa-a toidopu jakke jaowe tamlak hüyange hanghe yinmoklan toidoyapeih tüolan iy-ye tüopa tangme shaitamlak yang.

¹⁹Ngengpalan aoyin Levi jat mepu ngohnang, aoyin Zadok huhayimlan mepu pei, ü-shongte peiye ü-shaoshanlak ne-a tüolan shaha ngohlak. Tao, Youngwanpa Kahwange tüopa ngaokeng pha nang. Nange imante ünu jingne toidolak ne mahu üpong üha phalak.

²⁰Nange tüolan tepu iy ütam yahlak, hüyange wümjong ütangpa ünuk lüowe ngaitampu me tüopa angtamlak, hüyange wümjong üwopa wen ünuk tangme, hüyange tüopa neikonpu ünah khongkümpu me angtamlak. Hatüo kih-e nange wümjonga jaolak hüyange tüopa jaowetamlak.

²¹Ünu jingne toidopu mahu üpong nange yahlakyang hüyange khümjing wankam mong tüopa jingne she lepu nyoi me jaklak yang.

²²Üne nyih tushangpu yenangpu youn üpong ja nange yahlak yang hüyange ünu jingne toidopu ja ne dolak yang. Mahu üpong iy-ye nange hangke ling hüke tüopa iy phei wümjonga jaolak yang.

²³Aope nange tüopa kih lingpu shoyalakei, mahu üpong üha ja hüyange nyeeha ja yahtüoh, moini me hang tushangpu yenanglak wongpong,

²⁴hüyange tüolan-a üte yah peikei. Ngengpalan-e iman tangme hüm phuwe tamlak hüyange tüolan-a üte dopu ja ne jakke tamlak.

²⁵Nyih nyit mongme nyih jeih she nange youn ja, mahu üpong ja, hüyange nyee ja ünu jingne toidolak yang. Moilan me tushangpu hango yenanglak wongpong.

²⁶Nyih nyit jingne ngengpalan-e wümjonga jaowe tamlak hüyange jonlak jingne tümyange anglak.

²⁷Aope hatja linlakei, nyih tet shepupa nyih me ngengpalan-e wümjong tangme jakke dopu, hüyange kahtalan shüppe jempu dopu dowe ükong wanglak. Hüwante numan khongkümpu phei Taowe moimanlak. Tao, Youngwanpa Kahwange ngaoyangki.”