Read Konyak Naga EZEKIEL 44 Bible Online

EZEKIEL 44 - Konyak Naga bible

EZEKIEL 44

¹Kahtapawe khümjing wankam heongye ü-atye petente tao woi. Peten-a küpyange ngoh.

²Hüyange Youngwanpawe üte i, “Tüopa peten-a küpyange ngohlak hüyange aope-o ye-eplak. Kahtanyuha aote-o tüopa jonne yetamlak, hangjingne ima-a Tao, Israel Kahwang Youngwanpa tüopa kaiye ongyangki. Tüopa-a küpyange hei anglak.

³Tüoyangpoi, wanglam lampu ahngpa, ü-shong me üjao hahying hahlak jingne tüokente ongne ok. I onglak hüyange tüp üyongpa ümongye ünuk tatenlam ja te muh tailak.”

⁴Tüophei me kahtapawe apyekao peten kaiye Khümjing sheshao yete Tao yahtei. Taowe leihshih shaome, Youngwanpa Khümjing I ompu phihlangpu wangngaiye maayange Taowe nge. Taowe ü-nying nyingke kahtok yete ü-sheta khuhta,

⁵hüyange Youngwanpawe üte i, “Hangko kahta, nange ngepu hüyange jaipu lilite mong phatüoh. Taowe nangte khümjing jingne ngaokeng hei wanglam lili ilak. Aoyin kahtalan Khümjing ümongte ongne tam hüyange taine tampu oklak, hüyange aoyin kahta ye-oklak, meimeiye nyantüoh.”

⁶“Tüolan hokkewehupu Israel kahtalante itüoh, hüke Tao, Youngwanpa Kahwange shaaji iman-e linghümpu nulakpa toishaolan jingne nünne yengohlak.

⁷Aope toidopu üyao hüyange iy üte dolak jingne khümjingte ongyapeih, iman üsho-yekhüppu ülao jatlan, kahtalan aoyinne ü-ngao yejai, iman inne tampuwe ü-khümjing yejao yeshape linge tam. Tüokhei Ü-kahtalan-e nunushepu toishaolan iman-e lingpu khongküm puwe ü-jiengjeppu mengteki.

⁸Numan-e Ü-khümjing me khümme wümpu me jonne paipu toinante yakjongpalan ne yemeng, hüpoi numan nanleiye ülao kahtalan yakjongne tam.”

⁹“Tao, Youngwanpa Kahwange ngaowe tamnang, hüke mongjang me hüyange mei me üsho yekhüppu yinpalan ao-o, üte yejaipu aowe-o, Israel kahtalan yo me aoyin yinpalan nyoi tüolan nehoi ü-khümjingte ongpu ye-oklak.”

¹⁰“Hüpoi Levilan aoyinne Israel kahtalan phei jamme Tao wüngmakke tüoh hüyange peshaote yoppekhüm tüolante Taowe shaoshi yateng phalak.

¹¹Petenlan me yakjongpalan ne menge iman-e khümjing me hüyange khümjing toishaolan linge ü-shaoshanne ok. Iman-e hanghepa kahtalan-e jakke dolak jingne hüyange toidolak jingne dopu ne phapu yinmoklan toine ok, hüyange kahtalante shaoshanlak jingne iman toishao me ngohne ok.

¹²Hüpoi Israel kahtalan jingne peshaolante yoppe khümpu iman-e woipu jingne hüyange hüke linge iman-e kahtalan ünu omne tampu jingne, Tao, Youngwanpa Kahwange lahnyik mongko puphei jiengnang hüke imante shaoshi yateng phalak.

¹³Iman-e ngengpa ja ne ü-shaoyeshanlak yejema-a ü-jingne jaoshepu hanghe shongte-o yepeilak yejema-a Shejaopupa Nyoite ye-onglak. Hatüowa nulakpa toishao iman-e lingyangpu jingne phapu shaoshi yateng ngohnang.

¹⁴Tüoyangpoi Taowe iman-a khümjing me toikhoihtoinyai linglak jingne nyinge tamnang.”

¹⁵Youngwanpa Kahwange i, “Ngengpalan aoyin Levi jat mepu aoyin Zadok huhayimlan mepu, aope towe ngohpu Israel kahtalan ü-mepu lüppe küm, tüoyangpoi yelakpe muh khümjing me ü-shaoshan. Tüokhei sha-a aoyinne ü-shaoshanlak hüyange üte toidopu üyao hei iy dolak jingne ü-shongte peilak tüolan-a iman ngohnang.

¹⁶Iman shaha ü-khümjingte onglak, ü-wümjong me shaoshanlak, hüyange khümjing yoppe khümpu woilak.

¹⁷Aope iman ümongpa ghonyoi Khümjingte petenlam me onglakeih, iman-e pengkhainye yahlak. Aope iman ümongpa ghonyoi me yejema-a Khümjing me toishao me ngohlakei, mat phei takpu hango iman-e ye-inlak.

¹⁸Hümme nakshih iman me wanglüm yengailak, iman-e shangnyeihkhek ne pengkhaiye hüyange phakshaoh ne-o pengkhai, hüpoi shienghit yenangpe yahlak yang.

¹⁹Ümeken me kahtalan ngoh, tüoken ü-atye gho nyoite iman yushao me khümjing mongme toishao me ngohwante yahpu inkheklan iman-e üwangne khokke tüohlak yang hüyange tüolan-a Üjao tüp me tüohlak yang. Ülao kahtalante iman jing üjao inkheklan-e shahmaoshao me iman ülao inkheklan yahlak yang.

²⁰“Ngengpalan-e iman jing shang linne yewinlak yejema-a imanjing shangmin laowe-o ye-anglak. Iman-e shanga khakshuwe laowe anglak.

²¹Ümongpa ghonyoi te ongshao me ngengpalan aowe-o wuwüngti hango yeyinglak.

²²Ngengpa aowe-o toi yanne ngohpu sheko yeyahlak. Iye-a wangngoipu Israel naoyha yejema-a ngengpajawe tüohpu wamnyu hei yahlak.”

²³“Ngengpalan-e ü-kahtalante hanghepa üjao hüyange hanghepa yejao, hüyange hanghepa ütingpa me jaowesha hüyange hanghepa yeje tüo nipa yoiyoi nyüowe tamlak yang.

²⁴Aope ütingpa jingne moppu ngailakei, ngengpalan-e ngaowa ü-ngaokhüm me ngohpu kih-e phünlak. Iman-e mengpu wanglam me motappu ü-ngaokeng hei wanglamlan kih-e anglak, hüyange iman-e nyüonyih-a jaowe anglak.”

²⁵“Ngengpa jawe Inyu ipa ja ja pahi yejepute, Ihayim yo me ja ne yejepute, yejema-a jeiheinao yejema-a toi mantaipu nyaheinao ja ne yejepute kahta mangte letyange khümmewümpu toishao me yejao yeshape yengailak yang.

²⁶Nishe I jaoyang phei me, (Nupune mengma-a) Iye nyih nyit tanlak wongpong,

²⁷tüophei me nakshih Khümjing ümongpa ghonyoite onglak hüyange I jaowe shalak jingne toidolak, hümme nakshih Iye Khümjing me nishe shaoshanlak. Tao Youngwanpa Kahwange ngaoyangki.”

²⁸“Ngengpalan-e iman meitam ne ngengpa toishao hanghepa Taowe Israellante jin ja phei me jinja she talak jingne pha tüopa ngohnang. Iman-e Israel me moth tükke ye anglak; iman wongpong khongkümpuwa Tao.

²⁹Hahying dopu, ünu jingne dopu, hüyange püohpinpu jingne dopulan-a ngengpalan hahying ne menglak, hüyange Israel me ü-jingne she itte angpu shemin lamphe iman-e yah anglak.

³⁰Üwangpa ülick shemeipupa khongkümpu hüyange üte dopu sheminlamphe-a ngengpalan jing. Kahtalan-e an lingpu hipak phe me iman-e üwangpa anhünga dopu ja ne ngengpalante phalak, hüyange iman noksa me ü-moiman ngohlak.

³¹Ngengpalan-e awha yejema-a yinmok wanglamme lipu yejema-a ülao yinmok jawe toipu yehah lakyang.”