Read Konyak Naga EZEKIEL 45 Bible Online

EZEKIEL 45 - Konyak Naga bible

EZEKIEL 45

¹Aope jat liliye meitam japong kahmük tamlakei, meitam ja-a Youngwanpate phünne phalak. Tüopa-a laopute yakkong haja da me nga hüyange yakkong haja da khaopu me ngohlak. Tüopa neikonpu nyoijing lanshe üjaopa.

²Tüopa wankam mong me khümjing jingne moilan yekao me yakkong gho nga pong phei pu kahnyoi, yakkong denga khongkümpu me nyoijing neikonne ngohyange anglak.

³Tüopa Üjao nyoi ja kih-e tampu üjükte kilometer penme ni phei me tangkhüw, üpeamte kilometer nga, nyoijinga sheamme anglak yang; tüopa me üshei phei shejaopupa nyoi, Khümjing ngohlak.

⁴Tüopa-a kahmüktepu Üjao Nyoi, aoyinne Ijing khümjing me Youngwanpa shaoshan, tüolan ngengpalan jingne atte angpu nyoi ja. Tüopa me imanjing nok ngohlak hüyange Khümjing jingne kahmük üwenja ngohlak.

⁵Ülao jakih-e tange ngohpu kahmük-a Levilan aoyinne Khümjing me toi lingnang tüolan jing moth ne tüohlak. Tüoken me iman nyoilak jingne bangchinglan ngohlak.

⁶Üjao nyoi phei phinne ülaopa üwenja, üjükte yakkong haja nga hüyange üpeamte yakkong da me nga Israel kahta she minpu nyoilak chingnyu ja ne itte tüohlak yang.

⁷Kahmük-a wanglam lampa ahngpa jingne-o itte anglak. Üjao nyoi henyip yekao yikeng mepu henyip yekaote Mediterranean yengching ngoiye paowe teilak; hüyange heongye yikeng mepu kahmük tepu heongye yikeng ngoiye paowe teilak, tüokaiye tüopa üjükte Israel jatlante tampu üjük shinne muh ngohlak.

⁸Tüolan nyoi-a Israel kahmük me wanglam lampawe tüolak meitam, tüo me nakshih Iye shaaji kahtalante shangne yetamlak, hüyange topu kahmüklan Israel jatlan jingne menglak.

⁹Youngwanpa Kahwange inang, “Numan Israel wanglam lampalan, numan-e jamloi hipak laowe ünu lingyangki! Numan-e yakphei lükpu hüyange shangne tampu halan me laktüoh. Hanghepa üting hüyange shupupa ngohnang tüopa lingtüoh. Numan-e shaaji nishe ü-kahtalan iman kahmük mepu aiye yeteilak yang. Tao, Youngwanpa Kahwange numante tüopa inang.

¹⁰“Moilanne tokke-heipu ngaoting iye jonlak yang.”

¹¹“Eawahpu jingne tokke-heipu ephah ja-a, yeng pheipu tokke-heipu bath phei ja kih-e ngohlak yang. Tokke-heipu ma-a homer sheyihpu. Tokkeheitüoh ma-a hüke ngenang: Homer ja-a ephah pen, ephah penna bath pen.

¹²“Numan-e tokke-heilaklan hüke ngohkülak: Gerah da-a shekel ja, shekel dewok a min-a ja.

¹³“Hatüowa numan-e tüopa yafün me dolak yang: Wheat homer ja mepu ephah meitam; üphong wok, hüyange barley homer ja mepu ephah meitam üphong wok.

¹⁴Hüyange minnga meitam itpu me cor ja mepu bath meitam pen (homer kih-e cor ja me bath pen nyipnang;)

¹⁵hüyange Israel nokden mantoop mepu gho ni yo mepu nyee ja. Hatüo dopuwa hahying dopu, jakke dopu, hüyange chingmei dopulan iman jingne tantamlak jingne dotüoh she Youngwanpawe inang.

¹⁶“Kahmük mepu kahta liliye Israel wanglam lampa ahngpate tüopa dopu peilak yang.

¹⁷Yinmoklan nowe jaklak jingne phalak, hahying dopu, hüyange lela mo me; nyüonyih me, hüyange ülao mo hipak me Israel jat khongkümpu jingne wuwüngti dopu phalak-a I toishao. Israel kahtalan ünu yahteilak jingne, Iye ünu dopu, hahying dopu, nowe jakke dolak, hüyange chingmei dopu Iye phalak yang.”

¹⁸Youngwanpa Kahwange i, “Üwangpa leat tepu üwangpa nyih, tushangpu hango yenangpu mahu üpong ja numan-e toidolak yang hüyange Khümjinga jaolak yang.

¹⁹Ngengpawe ünu dopu tepu iy ütam yahlak hüyange tüopa-a tashüp te, wümjong ünuk pelite, hüyange ümongpa ghonyoite ongpu tatenlam shongnyulan te pholak.

²⁰Lekeng tepu nyit shepupa nyih me hüke tüo ja kih-e muh aoyinne yeshingpe yejema-a üpong yetüopu kaiye ünu ling tüolan jingne linglak yang. Tüo kih-e, nange khümjinga jaowe anglak yang.”

²¹“Üwangpa leat nyih penme peli shepupa nyih me numan-e Linnetaipu Mo mo ne ükong wanglak yang. Nyih nyit mongme moilanne do yenyütpu an hahlak.

²²Mo üwangpa nyih me wanglam lampu ahngpawe. I ünulan jingne hüyange ülao kahtalan khongkümpu jingne mahu üpong ja toidolak yang.

²³Mo mopu nyih nyit nyihjeih she Iye Youngwanpate tushangpu yenangpu mahu üpong nyit hüyange nyeepong nyit toidolak yang, hüyange tüolan-a no she jakke tamlak. Iye üne-o nyih jeih she younpong ja-a ünu jingne dopu toidolak yang.

²⁴Mahu üpong hüyange nyee pong toidopu phe me tahlick liter penme nyit phei me tangkhüw hüyange olive minnga liter lüm pong dolakyang.”

²⁵“Pemsheam mo, hanghepa lekeng nyit shepupa nyih penme nga shepupa me ükong wang, ahngpawe nyih jeih she nyih nyit mongme ünu jingne dopu jakih muh, noshe jakke, dopu jakih muh, hüyange tahlick hei olive minnga dopu jakih muh dolak yang.”