Read Konyak Naga EZEKIEL 46 Bible Online

EZEKIEL 46 - Konyak Naga bible

EZEKIEL 46

¹Youngwanpa Kahwange inang, “Toi lingpu nyih wok mong me ümongpa ghonyoite ongpu heongye petenlam-a küpyange anglak, hüpoi tüopa-a Nyüonyih hüyange Lela Mo nyih eplak.

²Wanglam lampa ahngpa ü-atye ghonyoi mepu tüp üyongpate petenlamte onglak hüyange aope ngengpawe I jing dopu noshe jaklakei hüyange Ijing chingmei dopu phalakei, peten shongnyu shong me yongyange ngohlak. Tüoken peten pongme Iye yoppe khümlak hüyange üne-o tailak. Ünpong manngoi manngoi peten yeküplak.

³Nyüonyih phe me hüyange Lela Mo phe me kahtalan liliye Peten shongme Youngwanpate khuhtawe yoppe khümlak.”

⁴“Nyüonyih me Youngwanpa tangte ahngpawe noshe jakke dolak jingne tushangpu hango yenangpu nyeeha wok hüyange nyeepong ja she yah peilak.

⁵Nyeepong ja jingne Iye tahlick liter penme nyit phei me tangkhüw, hüyange nyeeha ja ja jingne Iye hanghe phahu yapeih hüke dopu yah peilak. Hükihpu ülick peipu lili jingne Iye olive minnga liter lümpong peilak.

⁶Lela Mo nyih me Iye mahu üpong üha ja, nyeeha wok, hüyange nyeepong ja, khongkümpu tushangpu hango yenangpu dolak.

⁷Mahu üpong hüyange nyeepong ja ja jingne tahlick liter pen me nyit phei me tangkhüw pong dolak, hüyange nyeeha japong jingne-a ahngpawe hanghe kihpu phahuwe teih tüopa dolak. Hükihpu tahlick dopu üphong ja ja jingne olive minnga liter lümpong dolak.

⁸Ahngpawe tüp üyongpa tailam tüohlak hüyange I hangke ong tüopa lamtemuh tailak.

⁹“Aope mo hipak me kahtalan Youngwanpate yoppe khümlak jingne peilakeih, aoyin apyekao peten me ongyalakei, iman-e yoppe khümme shoyang phei me heyekao peten me tailak, hüyange aoyin heyekao peten kaiye ongyapeih iman-a apyekao peten kaiye tailak. Aowe-o iman ongyangpu kih-e tüopa lam ja temuh taipu ye-oklak, hüpoi janhüopu peten kaiye tailak.

¹⁰Aope kahtalan peilakeih, ahngpa-o peiye ngoilak, hüyange aope iman tailakei I-o tailak.

¹¹Mopu nyih hipak me hüyange mowante hahying dopuwa mahu üpong yejema-a nyeepong ja ja jingne liter pen me nyit phei me tangkhüw, hüyange nyeeha ja ja jingne-a yoppe khümpalan-e hanghe yin phahu yapeih phalak. Tüopa kihpu hahying dopu jingne-a ja ja jingne olive minnga liter lüm pong dolak.”

¹²“Aope wanglam lampa ahnge Youngwanpate mongloong dopu phahuyahpeih, dopuwa nowe jakke phapu ne jeyah yejema-a chingmei dopu jeyah, heongye peten ümongpa ghonyoi I jingne eppe tamlak. Iye dopuwa Iye Nyüonyih me hangke ling tüopa kih-e linglak, hüyange I ngaiye taiyang phei me Peten-a nishe küplak.”

¹³“Napjeih she Iye tushangpu hango yenangpu wangpeng ja nyeeha ja Youngwanpate jakke khongkümpu dolak. Tüopa dopuwa nyihjeih she linglak.

¹⁴Tüophei jamme napjeih she ankhoih kilogram ni, tüophei nyütlak jingne olive minnga liter ja phei dolak. Youngwanpate dolak tüopa jonlak wanglam-a jintepu jingne ngohlak.

¹⁵Nyeeha, ankhoih, hüyange olive minnga jin jinte Youngwanpate napjeih she dolak.”

¹⁶Youngwanpa Kahwange hüke inang. “Wanglam lampa ahngpawe Ijing kahtok ütam hünghao ne Ihate phama-a, hatüowa Iha jingne Inok moth meitam ja ne menglak.

¹⁷Hüpoi wanglam lampa ahngpawe aowe I shaoshan nang, Ite Ijing kahtok mothlei ütam ja nehoi phama-a, aope yahyepu wangpeng shüpneiye ngoilakei tüopa-a ahngpa moth ne muh üne-o menge mahlak. Tüowa shaaji Ijing, hüyange I hüyange Iha yimlan-e hei jintepu jingne nokpu ne mengpu oklak.

¹⁸Wanglam lampu ahngpawe kahtalan jing moth aope-o iman mepu yah yeteilak yang. Hanghe kahtok Iye Ihate phalakei tüopa-a I jingne she phapu meitam kahtok mepu hei phalak, tüome nakshih iman jing kahtok yahpu kaiye Iye ü-kahtalante shangne yetamlak.”

¹⁹Tüophei me kahtapawe ümongpa ghonyoi heyekao peten phinme apyekaote meeyange ngohpu tüp tatenlamte Tao woi. Tüolan-a ngengpalan jingne üjaopa tüp. Tüp henyip yekao me Iye nyoijing ja hüo.

²⁰Hüyange i, “Hatüo nyoi-a ümeken me ngengpalan-e ünu jingne toidopu mei, yang yange dolak yejema-a püohpinpu dopulan, hüyange dopu an lingpu nyoi ne ngohnang, tüokaiye ü-atye ghonyoite yejaoyeshapu, ümeken me kahtalante shahmaolak ngohnang, hango yah yeyüolak.”

²¹Tüophei me Iye Tao ü-atye ghonyoite woi hüyange ünuk peli nyoi lili me ghonyoi ükamha japong nangyang phei

²²üjükte yakkong delüm ngohpu üte hüo.

²³Moilan me jant ne longe konyange, jant phei neakke vünjak nyoi linge wangyange ngoh.

²⁴Kahtawe üte i, “Tüolan-a khümjing shaoshanpalan-e kahtalan ne dopu toidopu yanglak phongjonglan ngohnang.”