Read Konyak Naga EZEKIEL 47 Bible Online

EZEKIEL 47 - Konyak Naga bible

EZEKIEL 47

¹Kahtapawe Taowa Khümjing taten yete yahye. Tatenlam üphang mepu yeng ngai hüyange heongyete yünne ta, hangjingne Khümjinga tüoyekaote meeyange ngoh yangki. Tüopa-a Khümjing heyekao üphang mepu yünne tawe wümjong heyekaote ngoiye ta.

²Kahtapawe apyekao peten yekao kih-e Khümjing nyoi mepu tao yah ngai hüyange heong yekao me meeyange ngohpu peten neikonne Tao woi. Heyekao peten me yengyin üjinghapu yünne ta.

³Ijing sheamlieng phei kahtapawe meter gho nga (yakkong haja ja) heongyete yengyin sheamme tai hüyange tüoken me yengyin kaiye kemlak üte i. Yeng-a ü-ya üng ngoiye hei ong.

⁴Tüophei me Iye üne-o meter gho nga sheam, hüyange ü-yatuh ngoiye yeng ong üne-o jam meter gho nga sheamme tai, yeng-a üshiengshüm ngoiye ong.

⁵Iye üne-o meter gho nga sheam, tüophei me tüoken mepu yeng jamloi lupu jingne tao tüo kaiye yekem ok. Tüopa-a wo-e tailak tokte kaiye tüopa kailaka jamloi luwe ngoh.

⁶Iye üte i, “Hangko kahta, tüolan khongkümpu nange ngenang no?” Tüophei me kahtapawe taowa yengyin nahte yah yene tam;

⁷hüyange aope Tao tüokente ngoi yengnah moini yekao me pee üngang maawe Taowe nge.

⁸Iye üte i, “Tüopa yeng-a kahmük kaiye heong yete yünnang, hüyange Jordan kahjee te yütnang hüyange yengmangte ngoinang. Aope yengmangte tüopa yünyapeih tüopa yengching hüm yeng-a yeng üjaone jeilei.

⁹Ümeken nyoilante, tüopa yeng yünyapeih, yinmok ülam lili hüyange nyah ngohlak. Tüopa yengyinne yengmang (hüm yengching) yeng-a jaowe shawe tamlak, hüyange ümeken nyoilante yünyapeih tüopawe üyin angne tamlak.

¹⁰En-gedi yengpeiwo mepu Eneglaim yengpeiwo paowe, yengching nah paowe nyah ompalan ngohkülak, hüyange iman-e tüoken me imanjing shaan saayange wanne ngohkülak. Mediterranean yengching me ngohpu kih-e tüoken me nyah ülam yoi yoi loishe ngohlak.

¹¹Hüpoi yengnah paowe ngohpu yengsho hei yengkooklan mepu yengpa-a jaowe yetamlak. Tüolanpa-a hüm ngaijing ne hüke ngohlak.

¹²Yengnah moini yekao me hahying ngaiye tamlak jingne pee ülam lili ngailak, jongne tamlak. Tüolan peeyaklan aope-o yekoi lak hüyange iman-e ülick lickpu aope-o yelaklak. Iman me lekeng lep iye pelick üla licklak, hangjingne ima-a Khümjing mepu yünne tapu yengyinne yeng wange pha. Peelan-e hahying phalak, hüyange iman tepu üyaklan-a kahtalan meitamlak jingne jonlak.”

¹³Youngwanpa Kahwange i, “Tüolan-a kahmük tepu jat penme ni yo me tamlak, Joseph jat mepuwe üphongni tüolak, yikenglan ngoh nang.

¹⁴Taowe lahnyikmongko puphei numan jing pajeiyonglan phei Taowe tüopa kahmük moth imante phalak she janpu pha; sha-a numan yo me tüopa-a jakih-e tamtüoh.

¹⁵“Apyekao yikenga heong yekaote Mediterranean yengching mepu Hethlon chingnyu ngoiye, Hamath lamkeng ngoiye, Zedad chingnyu ngoiye,

¹⁶Berothah hei Sibraim chingnyulan ngoiye (tüolan-a Damascus ahngching hei Hamath ahngching nipa yikengpong me nyoipulan,) hüyange Ticon chingnyu (Hauran ahngching yikengpong ngoiye) ta-nang.

¹⁷Tüokhei apyekao yikenga Mediterranean heongyekao mepu Enon chingnyu ngoiye Damascus yikengpong hüyange tüopatepu apyekao me Hamath ngoiye ta-nang.”

¹⁸“Heongye yikenga heyekao me Damascus hei Hauran nipa mepu yikeng pong me wange, Jordan yengyin-a yikeng ne menge henyip yekao me Israel kahmük hüyange heongme Gilead nipa me heong yengching Tamar ngoiye ta-nang.”

¹⁹“Heyekao yikeng Tamar mepu Kadesh ünyaipong ngoiye henyip yekao ta-nang, hüyange apyekao lüpte Egyptlan yikeng paowe Mediterranean yengchingte tannang.”

²⁰“Henyip yekao yikenga Mediterranean paowe hüyange apyekaote Hamath lamkeng henyipye ngoiye ta-nang.”

²¹“Numan Israel jatlan yo me tüopa kahmük tamtüoh;

²²tüopa-a numan jingne jinte ngohlakpa moth. Yinhulan aoyin numan phei nyoiye ngohnang hüyange aoyinne hatüo me hayim tüowe ngoh imane-o aope numan-e tamlakei hüwante imanjing meitam tüolak. Iman-o ütingpa Israel nyupuh ja leye jonlak hüyange iman-e meitam tüolak jingne Israellan phei jamme phongyengpu me omlak.

²³Yinhunok liliye I jing meitam ao jat kahtalan phei I nyoingoh iman phei jamme tüolak. Tao, Youngwanpa Kahwange ngaoyangki.”