Read Konyak Naga EZEKIEL 5 Bible Online

EZEKIEL 5 - Konyak Naga bible

EZEKIEL 5

¹Sha-a, “Hangko kahta, ünah pheipu yanglow ja yayah hüyange nang jumin hüyange nang shang khongkümpu linlak jingne shanglin nyit ne tüopa jontüoh. Tüophei me toklak ja me shangmin-a toktüoh hüyange tüopa-a üphong lüm ne tamtüoh.

²Aope chingnyu tukpu sholakei üphong lüm yo mepu meitam ja-a chingnyu me jaktüoh. Üphong lüm yo me meitam ja yayah hüyange chingnyu ü-at neikonne nang kemwante nang yanglow phei tüopa-a mette tamtüoh. Topu meitam lüm shepupa-a wangyangte shaiye tamtüoh hüyange tüopate Taowe ü-yanglow phei janglak.

³Shangmin ütam tükke angyah hüyange tüolan-a nang shiengnye me peitüoh.

⁴Tüophei me üne-o tüolan yo mepu ütamja yahtüoh, tüolan-a vünte shüppe tamtüoh, hüyange tüolan-a vünne hahne tamtüoh. Tüolan mepu Israel jat nopute vün ngailak.”

⁵Okkeshangpu Youngwanpawe i, “Jerusalemte leiyah. Taowe yha-a ülao kahmüklan khongkümpuwe yhate neikon yange kahtoknyu hotan me yha angetam.

⁶Hüpoi Jerusalemwe ü-ngaokeng phei tüi-e hokkewe hüyange ülao jatlan phei yha ünyei shemengpupa, yha neikonne ngohpu kahmüklan phei ünyei ngao yejaipupa she hüoteki. Jerusalem-e ü-ngaokeng yeyah hüyange ü-ngaokhümlan minjon she lan.

⁷Sha-a Jerusalem, Okkeshangpupa Youngwanpa Taowe hanghe inang jaiyah. Ü-ngaokhümlan yejai yahpuwe yejema-a ü-ngaokenglan ye-ang yahpuwe nange nang neikonne ngohpu jatlan phei shenyei she shangshih ngaiye tamnang. Nange ülao jatlan nyoingoh wanglam pheite woiyangki.

⁸Tüojingne Tao, Okkeshangpupa Youngwanpawe nangte inang hüke Taowa nang wepa. Taowe jatlan khongkümpuwe ngelak ne nangte ngaophünpu peitamlak.

⁹Hangjingne ima-a Taowe nupu toishaolan khongküm nange lingpu jingne, Taowe üshongwante aope-o manlingpu hüyange üneye aope-o yelinglak shaoshiyateng Taowe Jerusalem tangme peitamlak.

¹⁰Tüo kaiye, Jerusalem mepu nyupalan-e imanjing hayim hahlak, hüyange hayimlan-e imanjing nyupalan hahlak. Taowe nangte shaoshiyateng phalak hüyange aoyin üyin me towe tüoh ükenphe te yanne tamlak.

¹¹“Tüokhei Taowa üyin Kahwangne mengtepuwe; hatüowa okkeshangpupa Youngwanpa ngao, nange ü-khümjing ümeng hüyange nunushepu toishaolan liliye nuwe tampu jingne, shüpshe yenangpe Taowe nang lange winlak.

¹²Numan kahta meitam lümyome ja-a chingnyu me seanyao yengleye hüyange daktin-e lilak; meitam lümyome üphongja-a chingnyu ü-at ye me yanglow-e langlak; hüyange ükümpa üphong lüm shepupa-a Taowe wangyang yote yanne tamlak hüyange imante yanglow phei janglak.”

¹³“Tao mongme manhu manhu ümong shihpu hüyange mengshipu numan-e hüolak. Aope tüolan khongkümpu ngailakei, Tao Youngwanpawe numan ütingyelak okpu jingne mengshipu hüoyange ngaoyangki she numan-e shinge peilak.

¹⁴Nang neikonpu jatlan lili mepu aoyinne nang linne taiyalakei yaoleye tüohlak hüyange shejai she sheng tüohlak.”

¹⁵“Aope Tao mongshih ngai hüyange nangte mengshi, hüyange shaoshiyateng pha, nang neikonne ngohpu jatlan-e yashan yalilak. Iman-e nangte yeonge yelengpe leilak hüyange nangte nyiyailak.

¹⁶Aope Taowe nangte ü-mepu lilakpa hüyange mahtamlakpa seanyao-yenglepu lahhan keplakeih, Taowe nanga mahtamlak ne keplak. Taowe nang tang me seanyaoyengle ünyei peitam-e nangte hahying peilak lam phüntamlak.

¹⁷Numan hayimlan toilakjingne phao yinmok hüyange seanyaopu Taowe shonlak, hüyange numan toilak jingne daktin, yakphei lükpu, hüyange wehok shonlak. Tao, Youngwanpawe ngaoyangki.”