Read Konyak Naga EZEKIEL 6 Bible Online

EZEKIEL 6 - Konyak Naga bible

EZEKIEL 6

¹Youngwanpa ngao üte pei,

²“O Hangko kahta” “Israel kahtang yekaote leitüoh hüyange imante ü-ngaolan phatüoh.

³Okkeshangpupa Youngwanpa ngao jailak jingne Israel kahtanglan te itüoh: Tao Okkeshangpupa Youngwanpawe kahtanglante, kahmüohlante, kahsholan, hüyange kahjeelante hanghe inang jailak jingne: ümeken me kahtalan-e peshaolante yoppe khümnang tüolan nyoijing menge winlak jingne Taowe yanglow ja shonlak.

⁴Wümjonglan menge tamlak hüyange üpe ümei jakpu wümjonglan paiye tamlak. Tüome ngohpu kahta khongkümpu imanjing peshaolan sheshao me toilak.

⁵Israel kahtalan lipu mang Taowe te-shai tamlak; wümjonglan neikonne imanjing waan khongkümpu Taowe te-shaiye tamlak.

⁶Israel chingnyulan khongkümpu menge tamlak hümme nakshih iman jing wümjonglan hüyange imanjing peshaolan khoihnyaiye menge tamlak, iman jing üpe ümei jakpu wümjonglan paikhoih tamlak, hüyange iman-e lingpu sheminlamphe yenangpe mahlak.

⁷Kahtalan üken phe me toilak, hüyange aoyin yinyangki tüolan-e Taowa Youngwanpa she shinglak.”

⁸“Hüpoi toilangpu mepu ütamja Taowe yinne tamlak hüyange jatlan yo me yanne tamlak,

⁹ümeken me iman chingtaipalan-e nyoilak. Tüoken me iman-e Tao teihtüolak hüyange Taowe imante shaoshiyatengne hüyange wüotüo ne tamshe shinglak, hangjingne iman ütingyelakpu mongjange üte wüngmakke tüoh hüyange iman-e üphei-a peshao pate mongpha; hüyange iman-e imante teinupu üyong ngailak hangjingne ima-a ünu hüyange yelengpu toishao iman-e ling.

¹⁰Iman-e Taowa Youngwanpa hüyange Taowe deingao phapulan-a ja jang jawe nyamshaopu yeje she shinglak.”

¹¹Okkeshangpupa Youngwanpawe inang, “Nang yak khoktüoh! Nang ya shoptüoh! Israellan-e lingyangpu nunushepu toishao hei ünu toilan khongkümpu jingne mongmengpu phei waotüoh. Iman-a wehok me, seanyao yenglepuwe, hüyange daktin-e lilak.

¹²Aoyin üjai me shejai she ngoh dak-e yüolak hüyange lilak; aoyin ü-o me ngoh wehok me toilak; aoyin yinpu okyangki, seanyao yenglepuwe lilak. Iman-e ü-mong shih-e peipu wong khongkümpu shinge peilak.

¹³Kahta manga peshaolan yo me hüyange wümjong neikonne shailak, kahmüoh shedaopu lili me, kahtang ümüoh lili me, hü-üngpu peshüm hüyange longkham peenyu phang lili me nyoijing lili ümeken me iman-e imanjing peshaolante toido, te-shaitamlak. Hüwante moilan-e Taowa Youngwanpa she shinglak.

¹⁴Üting, Taowe iman phei tüi-e ü-yak nolak hüyange iman kahmük menge tamlak. Taowe hatüowa heyekao wanwüng jeng mepu apyekao mepu Riblah chingnyu ngoiye, Israellan ümeken me nyoi, ja nehoi towe yetüohpe wüngmakpu nyoine linge tamlak. Hüwante moilan-e Taowa Youngwanpa she shinglak.”