Read Konyak Naga EZEKIEL 7 Bible Online

EZEKIEL 7 - Konyak Naga bible

EZEKIEL 7

¹Youngwanpa ngao üte pei,

²“Hangko kahta, hatüowa Tao, Okkeshangpu Youngwanpawe Israel kahmükte inang: Üküm! Kahmük ünuk peli tangme üküm pei ngohnang.”

³“Israel, üküm-a peiteki. Nange ümongshihpu shinge peilak, hangjingne nange hanghe lingyangki tüopa jingne Taowe nangte ngaophün nang. Nange nuweteih yangpu nyoingoh wanglam khongkümpu jingne taowe nangte leih phalak.

⁴Taowe nang hüke yetüohlak yejema-a nangte shüpshe hango yehüolak. Nange nuweteih-e lingyangpu toishao jingne Taowe nangte shaoshiyatengpu phalak, hümme nakshih nange Taowa Youngwanpa she shinglak.”

⁵Okkeshangpupa Youngwanpawe hanghe inang hatüowa tüo ngohnang, “Limahpu ja phei me ja she nang tangte peinang.

⁶Tüolan khongkümpu linne peinang. Hatüowa ükümpa. Nanga üküm ngoiye tamteki.

⁷Aoyin kahtalan kahmük me nyoi ngohyapeih numan jingne üküm peiküki. Kahtanglan me shaaji mongmei momopu yeje, üpongyetüope moppu ngohlak hipak owe peiteki.

⁸“Sha-a mamshe ümongshihpu wong khongkümpu nange hüolak. Nange hanghe lingyangki tüopa jingne Taowe nangte ngao phünnang, hüyange nange nuwe teihyangpu nyoingoh wanglam khongkümpu jingne Taowe nangte shümme yelak.

⁹Taowe nang hüke yetüohlak yejema-a nangte shüpshe hango yehüolak. Nange nuweteih-e lingyangpu toishao jingne Taowe nangte shaoshiyatengpu phalak, hümme nakshih nange Taowa Youngwanpa she shinglak, hüyange aowe nangte shaoshiyateng phanang hatüowa Tao she shinglak.”

¹⁰Israel jingne limahpu nyih peiküki. Yakphei lük puwa jaalun nang. Otapuwa okpu shinne dao ongteki.

¹¹Yakphei lükpuwe ümeng ünyei ngaitam nang. Iman jingne, imanjing moth, imanjing phihlange shemeiyaomapu, yejema-a imanjing müktishiwa hango yetolak.

¹²Hipak peiküki, aope shakpu hüyange yaopu me hang wongpong ne-o yemenglak nyih owe peiküki, hangjingne ima-a Kahwangpawe shaoshiyateng phapu moilante ja kih-e peilak.

¹³Hangjingne pheeinyuleihpa aowe-o Iye hanghe winyangki tüopa jingne küw tüone jin laowe yengohlak, hangjingne Kahwangpa mongshih ngaipuwa moilan tangme ngoh nang. Aoyin ünu me ngoh üyin tükke ngohne yeoklak.

¹⁴Nyawong wünge tam, hüyange moilanne tüm. Hüpoi wehoklak ne ao-o yetai, hangjingne Kahwangpa mongshih ngaipu moilan tangme ja kih-e yeilak.

¹⁵Ü-atme yanglow, hüyange noksalan me daktin hüyange nyaowelepu ngohnang. Kah yekaote ao ngailakei hokke lilak, hüyange ao chingnyu me ngohlakei daktinpu hei nyaowelepuwe lilak.

¹⁶Ütamja-a nyamteiye awshulan kih-e kahjee mepu kahtangte onge yinne ngohlak. Iman jing ünulan jingne iman khongkümpu shaphuleih-e ngohlak.

¹⁷Moilanjing yakme wong yenanglak, hüyange iman jing yatuh ninlak.

¹⁸Iman-e monnye inlak hüyange khongkümpu tangme shaonahpuwe yüohlak. Iman jing shanglinlak, hüyange iman khongkümpu wüotüolak.

¹⁹Iman-e imanjing hon hei khüm yelengpu kih-e püanglam me winlak, hangjingne aope Youngwanpawe yoi mengshipu shokke tamlakei; hon yejema-a khümme iman yinne tampu ye-oklak. Iman-e tüopa-a iman lahnyik mongkopu monghah tamlak jingne yejema-a imanjing seamohlak jingne yejon oklak. Hon hei khümme iman ünute woitam.

²⁰Hipak ja me iman-a imanjing shemeiyaomapu juyük jingne ota, hüpoi iman-e tüolan-a peshaolante nuwe teihtamlak jingne jon. Tüojingne Youngwanpawe imanjing moth-a iman mepu yah-teilakne lingetam.

²¹Youngwanpawe iyangki, “Taowe iman-a kahhenglante nyieyahne tamlak, hüyange ngaokeng mengpalan-e iman jing moth khongkümpu nyelak hüyange tüopa nuwe tamlak.”

²²Aope ü-khümjing bung yejao yeshape linge tamlakei, aope kuhpalan-e tüopa menge onge hüyange tüopa nuwe tamlakei, Taowe yak yupu yengohlak.

²³“Moilan nüngneipu me ngohnang kahmük-a toilangpuwe maawe hüyange chingnyulan-a yak phei lükpuwe maawe.

²⁴Taowe tüopa me shenupu jatlan yahpeilak hüyange iman-e numan nok-a minyayah. Aope Taowe jatlante ümeken me numan-e yoppe khümnang yejaoyeshape lingne tampu ngewante numan jing wong shenangpu kahtalan iman-e monghümme teihpu mahlak.

²⁵Menge tamlakpa peiküki. Numan-e chingmei yamlak hüpoi tüopa aope-o ye-ngelak.

²⁶Limahpu ja tangme ja woilak, hüyange monglaowe ngaolan ümeng shok khan shoklak. Iman-e hanghe ngeyangki ütahte ngaiye tamkei she numan-e hipalante tonglak. Kahtalante nyüowe tamlak jingne ngengpalan me hango yenanglak, hüyange hengpu phalak jingne lwngmeilan me hango yenanglak,

²⁷Ahngpawe mang shaplak, ahnghalan-e monghümpu shaaji tüohlak, hüyange kahtalan nyampuwe ninne polak. Numan-e lingyangpu khongkümpu jingne taowe numante shaoshiyateng phalak, hüyange numan-e ülaolante ngaophünpu jakih muh numante ngaophünlak. Tüo kaiye Taowa Youngwanpa she numante hüolak.”