Read Konyak Naga EZEKIEL 8 Bible Online

EZEKIEL 8 - Konyak Naga bible

EZEKIEL 8

¹Wangpeng wok lekeng wok hüyange nga shepupa nyih me, Judah mepu phowe teipu woipalan ü-phei jamme tenok me shotte ngoh. Mokhshe Kahwang Youngwanpa ünganwong üte pei.

²Taowe nganne lei hüyange vün kihpu kahta ja himang nge. Shiengshim me peiye I jing püm ümaiye-a leilak me vün kih-e, hüyange shieng me peiye ütokye shitte phoyang phei shakphan yan kih-e ngohyangki.

³Iye yak lepume ja nowe ngai hüyange shangmin me üte pho. Tüophei me tüopa himang me Kahwangpa yahawe wangte tao nowe in hüyange Jerusalemte tao yahtei. Iye taowa khümjing tepu apyekao taten ümongpate woi, ümeken me Kahwangte nuweshakke lingpu toishao ümeng peshao ngoh.

⁴Tüoken me taowe Israel Kahwang ompu hüopu phih phih langpu wangngai, Chebar yengyin nah me tao aope ngoh hüwante taowe ngepu meimei kih-e ngepu ngohyangki.

⁵Kahwange üte i, “Hangko kahta, apyekaote leitüoh.” Taowe lei, hüyange tüoken me tatente ongpu yekao wümjong phin me Kahwangte nuweshakke lingpu toishao ümeng peshao (kahyak) taowe nge.

⁶Kahwange üte i, “Hangko kahta, hanghe ngainang nange ngeya? Israel kahtalan-e tüoken me nunushepu toishaolan lingpu ü-üjao nyoi mepu shejai shejai she üte jange teipute leiyah. Tüopa phei nehoi shenyei she wüotüone tampu toishaolan nange ngelak.”

⁷Iye tao ghonyoi ü-at yekao tatente woitei hüyange jant me üwo ja üte hüo.

⁸Iye i, “Hangko kahta, hatüo me jant lüowe ongtüoh.” Tüokhei taowe jant lüowe shao, tüoken me tatenlam ngohyangki.

⁹Iye üte i, “Ümongte ongtüoh hüyange nulakpa ünu toishao tüoken me iman-e lingpute leitüoh.”

¹⁰Tüokhei tao ong hüyange lei. Jant mepu leihpan hüyange ülao yejao yeshapu yinmoklan, hüyange Israellan-e yoppe khümpu ülao toilamlan leihpan-e maawe lingyange ngohyangki.

¹¹Tüoken me Shaphan üha Jaazaniah omyange Israel lwngmeilan denyit ngoiye ngoh. Moilan-e üpe ümei jaklak jonyange, hüyange üpe ümei mepu vünkhuh ngai.

¹²Kahwange üte tong, “Hangko kahta, Israel lwngmeilan-e hanghe lowe ling nange ngeya? Iman khongkümpuwe peshaolan-e maayangpu tüpsa ja me yoppe khümnang. Iman ngaowa hatüo. ‘Youngwanpawe teman ye-nge ja! Kahmük-a Iye winyangkü ja.’ ”

¹³Hüwante Youngwanpawe üte i, “Tüopa phei nehoi ünyei nulakpa toishao iman-e lingpu nange ngelak.”

¹⁴Tüokhei Iye khümjing apyekao petente tao yahtei hüyange Tammuz kahwang lepute shekolan shappu üte hüo.

¹⁵Iye üte i, “Hangko kahta, nange tüopa ngeya? Nange tüopa phei nehoi ünyei nulakpa toishao ngelak.”

¹⁶Tüokhei Iye khümjing ümongpa longkonmongte tao woi in. Tüoken me ümongpa khümjingte ongpu taten ü-o me, wümjong hüyange lam ni pa me kahta da me nga nanjing ngoh. Iman-e ümongpa khümjing te iman tok shong hüyange heong yekaote khuhta yange, ongpu wanghete yoppekhüm.

¹⁷Youngwanpawe üte i, “Hangko kahta, nange tüopa ngeya? Tüolan Judah kahtalan-e nange tüo me ngepu nunushakpu toishaolan shaha lingpu tüolan khongkümpu me hüyange kahmük nopu me yakphei lükpu jalunne tampute mongme yehu. Yeje, Iman peine tamyange hüyange khümjing tüopa nyoi me iman-e lingne tamtüoh, hüyange Tao ünyei mongshih ngaine tamtüoh. Leihuyah hangke iman-e okpu shinne yemeipe linghupu me üte teetampu!

¹⁸Ümong shihpu ülam khongküm iman-e hüolak. Taowe yinne yetüohlak yejema-a imante shüpshe hango yehüolak. Iman-e üngwünne yoppe, okpu shinne üte üngwünlak, hüpoi Taowe imante yejailak.”