Read Konyak Naga EZEKIEL 9 Bible Online

EZEKIEL 9 - Konyak Naga bible

EZEKIEL 9

¹Hüwante Kahwange üngwünpu taowe jai, “Numan kahtalan aoyinne chingnyute shaoshi yateng phalak ne ngohnang tüome peikei. Numan phei numan jing yonglah yahpeikei.”

²Mamshe kahta wok moilanne yonglah jonyange, khümjing ü-atye apyekao peten mepu pei. Iman phei jamme nye-ükhai phei o-yange, nyanlak jingne ülam ja jonyange kahta ja ngohyangki; iman khongküm pei hüyange shakphan yan wümjong shongme yong.

³Hüwante Israel Kahwang omme ngohpu phihphihlangpu wangngai cherubim mepu yong, ümeken me tüopa ngoh, hüyange khümjing taten yekaote ong. Nye-ükhai inyange ngohpu kahtate Youngwanpawe nyik,

⁴“Jerusalem chingnyu khongkümpu kaiye taitüoh hüyange chingnyu me nunushepu toishaolan lingpu jingne aoyin shangyangki hüyange shaoshiyateng yangki tüolan moilan shekeng me minsang angtamtüoh.”

⁵Hüyange ülao kahtalante Kahwange ipu taowe jai, “Chingnyu kaiye Ipheite woitüoh, hüyange toitüoh. Sheja nehoi tahtüoh; ao te-o shüpshepu tahngoh.

⁶Puyonglan, naoshelan, nyuyong ülalan, nyuyonglan, hüyange nahalan toitüoh. Hüpoi ao me I shekeng me minsang ngoh tüolan aote-o yak tah le. Ü-khümjing hatüo me wangtüoh.” Tüokhei iman-e aoyin khümjing me yongyange ngoh tüolan woipalan me ükong wang.

⁷Kahwange imante i, “Khümjing nuweshakke tamtüoh. Tüopa longkonmong kahta mange maatam tüoh. Toilingne yayong tüoh!” Tüokhei iman-e chingnyu me kahtalan toi ne ükong wang.

⁸Aope toipu ükong wange tai, tüoken me ü-shaha ngoh. Taowe ü-nying nyingke kahtok yete ü-sheta khuhta hüyange üngwün, “Okkeshangpupa Youngwanpa, hüke nange Israel me towe tüohpu khongküm toilak ne nange Jerusalem, tangme teshinne mongshih ngaipu a?”

⁹Kahwange jan, “Israel hüyange Judah kahtalan-e nyamlakpa ünuwe püohyangki. Iman-e kahmük nopu me toilangyangki hüyange Jerusalem-a püohpinpu ünuwe maane tam. Iman-e hüke i, Tao, Youngwanpawe iman kahmük winne tam hüyange Taowe iman ye-nge.

¹⁰Hüpoi Taowe imante yayenge yeteihlak; Iman-e eihate hanghe lingetam, Taowe imante linge tamlak.”

¹¹Tüophei me nye-ükhai inpu kahta leihye hüyange Youngwanpate ngaolan phawe i, “Nange phapu ngaokeng taowe lingyangki.”