Read Konyak Naga DANIEL 1 Bible Online

DANIEL 1 - Konyak Naga bible

DANIEL 1

¹Judah me Jehoiakim ahngne mengpu wangpeng lüm shepupa me, Babilon Ahngpa Nebuchadnezzarwe Jerusalem te shüm hüyange chingnyu neikon.

²Youngwanpawe Ite ahngpa Jehoiakim phone tam hüyange khümjing toinyu nanha ütam yahne tam. Iye phowe yahpulan ütam Iphei Babilon mepu Ijing kahwanglan khümjing te yahtei, hüyange yahyepu toinyu nanhalan-a I jing kahwang khümjing toinan angpu nyoi me ang.

³Ijing woipalan ütahpa, Ashpenazte phowe teipu Israellan yo mepu ahng nokphong mepu hüyange lwngnoklan mepu naoshe ütam lelak jingne ahngpawe ngaokeng pha.

⁴Iman-a pümta wangpu, jelo nahpu, thrimlei wange tüoyangpu, mamshe shinge okpu, hüyange daktin yenangpulan ne menglak, hümme nakshih ahngnok ghonyoi me shaoshanlak jingne iman wangngoilak. Imante Babilonlan ngao ilak hüyange nyanlak jingne Ashpenazwe nyüolak.

⁵Ahngpawe üne-o imante nyihjeih she hahying hüyange wuwüngti ahngnok me ngohpalan-e hahyingpu kihpu jakih-e phalak jingne ngaokeng pha. Tüopa thrimlei yahpu wangpeng lüm phei me iman-a ahngpa sheshao me peilak.

⁶Hüke lepu yome Daniel, Hananiah, Mishael, hüyange Azariah iman khongkümpu Judah nokphong mepu ne omme ngohyangki.

⁷Ahngnok woipa ütahpawe imante min üla mintam; Daniel te Iye Belteshazzar she nyik, Hananiah te Iye Shadrach she nyik, Mishael te Iye Meshach she nyik, hüyange Azariah te Iye Abednego she nyik.

⁸Hüpoi Ahngnok ghonyoi mepulan-e hahpu hahying hüyange wuwüngti yinge I nying nyingke yejao yeshape linge yetamlak she Daniel-e I kenmong me teih, tüokhei Ite jamlak jingne Iye Ashpenazte tong:

⁹I hüyange Danielte shüpsheye teihlak jingne Kahwange Ashpenaz linge tam.

¹⁰Tüoyangpoi Ashpenaz-a ahngpate nyamme teih, tüokhei Iye Danielte i, “Nange hanghe hahlak hüyange yinglak ahngpawe tümyangki, tüopoi ülao naoshelan kih-e wangngoiye nang ye-nge ma-a, Iye tao toikülak.”

¹¹Tüokhei I hüyange I shümpalan lümte yakjongpa ne Ashpenazwe yomme angne tampupa tangte Daniel wen.

¹²Iye i, “Nyih pen jingne tomante tokke leipha.” “Tomante hahlak jingne hoilai hüyange yinglak jingne yeng hei yahkei.

¹³Tüophei me aoyinne ahngnok ghonyoi mepu hahying hahyapeih tüolan naoshelan phei toman phinne leihu, hüyange toman hangke ngelakei tüopa me nange ngaophün phatüoh.”

¹⁴Tüokhei nyih pen mongme imante tokke leilak jingne Iye mong.

¹⁵Aope hipak ngoiye peiyapeih, aoyinne ahngnok hahying hahyapeih tüolan khongküm puphei-a imanpa leilak müklei me-o pümtangta shemei hüyange wong shenang she ngoh.

¹⁶Tüokhei tüo hipak me peiye yompawe imante ahngpawe hanghepa phayapeih tüopa nanleiye hoilai shaha phawe peiyangki.

¹⁷Kahwange naoshe pelite shinge manpu hüyange ngao shinge oklak wong hüyange juteih ülu pha. Tüo tokte paowe, Iye Daniel te himang hüyange mang lüppe oklak wong pha.

¹⁸Ahngpawe itpu wangpeng lüm üküm yeme, Ashpenazwe Nebuchadnezzar tangte naoshelan khongkümpu woipei.

¹⁹Ahngpawe iman khongküm puphei ngao, hüyange Daniel, Hananiah, Mishael, hüyange Azariah lan-e ülaolan khongkümpu phei shenyei she Ite monghah ne tam. Tüokhei iman-a ahngnok ghonyoi kahtalan ne meng.

²⁰Ahngpawe hangkihpu tongpu ja pha lakei phayapoi yejema-a Iye hangkihpu ngaonyu tonglakei, tüolan naoshe peliye I ahngching nopu mepu shao-itpalan yejema-a yepahipalan phei üphong pen me nyeiye shing.

²¹Persia Ahngpa Cyruswe Babilon ching manhah manhah she Daniel-a ahngnok ghonyoi me ngohyangki.