Read Konyak Naga DANIEL 10 Bible Online

DANIEL 10 - Konyak Naga bible

DANIEL 10

¹Persia me Cyrus ahngne mengpu wangpeng lüm shepupa me, Daniel, ao te Belteshazzar she-o nyik ngaolan ja ütahte ngai. Ngaolan-a ütingne ngoh hüyangpoi shinge yahlak jingne jamloi wan. (wehok üyong jeng). Tüopa-a Ite himang me khoih itam.

²Tüopa nyih hipak me, Daniel, taowa hat lüm mongme shappe yoonge ngohyangki.

³Hatlüm linne mantai mantai taowe hahying ümei hango yehah yejema-a hanghepa mei-o yehah, wuwüngti hango yeying, yejema-a shang yeshai.

⁴Üwangpa le tepu nyih da me peli shepupa nyih me, Tigris Yengyin üyong nah me tao yongyange ngohyangki.

⁵Taowe nganne lei hüyange kahtaja ao khaipu inkhek inyange hüyange shemeipupa honne shienghit hityange nge.

⁶I jing püm toinyu long kih-e hüo. Ijing sheta wangphihlangpu phei shetee she, hüyange Ijing mük-a vünyi kih-e lünglei. I jing yak hei ya-a shitte phoyang phei shakphan yan kih-e, hüyange Ijing wünga bangnyuha üyong waopu kih-e ngohyangki.

⁷Aowe himang ngeyapeih tüopa-a Daniel, ü-shaha-e nge ngohyangki. Kahtalan aoyin ü-phei ngohyapeih iman-e hango ye-nge, hüpoi iman yawinmongpaiye mah hüyange phette taiye lo.

⁸Tüopa yashanlakpa himangte leiye, tüoken me ü-shaha tüoh. Üme shaaji hang wongo yenang, hüyange ü-sheta loishe leijeiye mah tüokaiye aowe-o tao shingpu ye-ok.

⁹Aope taowe I ngaowüng jai, tao miengnga-e kahtokte lamme ta hüyange tüoken me kahtokte sheta tüpyange lamme ngoh.

¹⁰Hüwante yak jawe üte jon hüyange ü-yak me jonyange yatuh shünge lüone tam; hüpoi taowa yelakpe ninne ngohyangki.

¹¹Iye üte i, “Daniel, Kahwange nangte kennang. Yongtüoh hüyange taowe hanghe ilakei mongphawe jaitüoh. Taowa nang tangte shonne ngohnang.” Aope Iye tüopa ngao, tao yelakpe ninne lüowe yong.

¹²Hüwante Iye i, “Daniel, tahnyam: hangjingne üwang memuh Kahwang sheshao me shingeoklak jingne nange nang mongjang me lahnyikpu, hüyange innenyaipu hipak memuh, nange yoppuwa jaiteki, hüyange nange yoppute janne tao peinang.

¹³Hüpoi Persia ahngching yompa wangdang shongmokpawe nyih da me ja ngoiye üte tien. Hüwante Mikhael, wangdang shongmokpalan Ütahpa yo me ja üte jamlak jingne pei, hangjingne ima-a tüoken Persia me ü-shaha tüoh.

¹⁴Ngoikülak hipak me nang kahtalante hanghe ngailak tüopa nangte üpong tüowe tamlak jingne tao peiyangki. Hatüowa ngoikülak jeng jingne himang.”

¹⁵Aope Iye tüo ngaoyapeih, ngao yengao okpe tao kahtok te shuwe lamme ta.

¹⁶Hüwante wangdang shongmokpa, ao kahta kih-e nge, Iye yoi yakno hüyange ü-jupente let. Taowe Ite i, “Üyongpa, tüopa himange üte jamloi wong yenangne tamnang tüokaiye tao ninpu yelak ok.

¹⁷Taowa yoi nokpupa sheshao me yongpu rhapa ja leye ngohnang. Hangke taowe nangte ngaowe oklak? Tao lüohelak yejema-a wong üme towe yenang.”

¹⁸Üne-o nishe Iye üte jon, hüyange üte wongnange pei.

¹⁹Iye i, “Kahwange nangte kennang, tüokhei hanghe-o nangte mongshangne tahtam yejema-a nang nyamne tahtam.” Aope Iye tüopa ngaowe sho, üte wongnange pei hüyange taowe i, “Üyongpa, nange hanghe ilak ngoh üte ipha. Nange üte meiye tampu lingyangki.”

²⁰Iye i, “Hangne tao nang tangte pei nange shingya? Sha-a tao leih yelak hüyange Persia yompa wangdang shongmokpa phei hoklak. Aope taowe I naolakei tüophei me, Greece yompa wangdang shongmokpa peilak.

²¹Hüpoi laitep me hanghe üting nyanyange ngoh taowe tüopa nangte ütahte ngaitamlak jingne pei. Israel yompa wangdang shongmokpa Mikhael tokte kaiye üte jamlak ao-o yenang.