Read Konyak Naga DANIEL 11 Bible Online

DANIEL 11 - Konyak Naga bible

DANIEL 11

¹Hüyange taowa, Medelan Darius üwangpa wangpeng me I tüklak hüyange wongnang tamlak jingne tao yong.

²“Hüyange sha-a taowe nangte hanghepa ilakei tüopa-a ütingpa. Wangdang shongmokpawe i, Persia tangme üne-o ahngpalan lümme wanglam lam-e ngailak; tüophei me woiye peli shepupa, ao ülaolan khongküm puphei shehakpupa ngailak. I wongnangpu hüyange moth ütah phei Iye Greece ahngching te shapnyiklak.”

³“Tüophei me okkeshangpu ahngpa ja ngailak. Iye ahngching üyonglapa tangme wanglam lamlak hüyange Iye hanghe leng linglak.

⁴Hüpoi I jamloi okkeshangpu wong kaiye I ahngchinga tamme shongpu ngailak hüyange üphong peli ne tamlak. Imepu jaalunpu yejepu ahngpalan-e I nyoi me wanglam lamlak, hüpoi Ime ngohyangpu kih-e iman me wong yenanglak.”

⁵“Heye ahngpa-a wongnange ngohlak. Tüoyangpoi I phang mepu ahnghalan yomepu ja ünyei wongnange ngohlak hüyange sheyongpupa ahngchingte wanglam lamlak.

⁶Wangpeng nangjange ngohyang phei me Heye ahngpawe apye ahngpa phei teishüppe shapu yahlak, hüyange Ite yoijing yhala phawe mata ne menglak. Hüpoi teishüppe shapuwa hipak laowe yengohlak, hüyange yha, yha netanpa, yha hayim, hüyange shaoshanpalan aoyin yha phei tai khongkümpu toilak.

⁷Tüophei me nünge yha pheipu yomepu sheja ahngne menglak. Iye apye ahngpa nyahponglante shümlak, iman jing meipe latyangpu me onglak hüyange iman naowe tamlak.

⁸Iye imanjing kahwanglan peshao hüyange tüolan kahwanglante jaowe tam-e phapu hon hei khüm toinan Egypt te kiye yah yelak. Wangpeng nangjange chingmei ngohyang phei me,

⁹Syria ahngpawe Egypt hahlak, hüpoi I-a leihyelak jingne kange tamlak.

¹⁰“Syria ahngpa hayimlan-e wehok jingne tümlak hüyange nyahpong ükhong üngang jemlak. Iman yo me sheja-a muleampu kih-e lüklak hüyange wepalan meipe latyangpute shümlak.

¹¹“I mongshih ngaipu phei heye ahngpawe apye ahngpa phei hoklak jingne yonglak hüyange Ijing nyahpong üngang phowe yahlak.

¹²Iye okpu ngepute hüyange wetaipalan üngang Iye toiyangpute I otalak; hüpoi I yelakpe okpu ngeye yetailak.”

¹³“Apye ahngpa leihyelak hüyange Iye üshongwante ngohyang puphei shenyei she nyahponglan shaijemlak. Aope hipak ümei peilakeih, khakwange tümyangphei nyahpong üngang phei I leihyelak.

¹⁴Hüwante heye ahngpa phei tüi-e kahtalan maawe hokkewelak. Hüyange Daniel, numan jat mepu yakphei lükpu kahta ütam-e iman-e ngeyangpu himang jingne hokkewelak, hüpoi iman-a palak.

¹⁵Tüokhei apye ahngpawe meipe latyangpu chingnyuwa tuklak hüyange tüopa-a omme yahlak. Heye wetaipalan-e shaaji yehoklak; iman yo mepu shemeipupa nehoi wangmanne wong yengohlak.

¹⁶Hüpoi Syrialan chinghahpa lan-e imante iman phei tokteilak ao-o yenangpe Ite meipupa kih-e linglak. Janpu kahtok me I yonglak hüyange tüopa-a lanshe I wong phang me anglak.”

¹⁷“Syria ahngpawe yoijing nyahponglan khongküm yahyange chinghahlak jingne tümlak. Tüophei me, Itepu wepalan ahngching mahtamlak jingne, Iye Iphei teishüppe shapu yahlak hüyange mata ne menge Iye yoijing yhala naoyha poiye teilak; hüpoi Iye tümpu tüopa me okpu ye-ngelak.

¹⁸Tüophei me Iye yengching yekao me jatlante shümlak hüyange iman maapu chinghahlak. Hüpoi kahheng woipajawe Ite naolak hüyange I jamloipoipuwa üküm ngoine tamlak; ütingpa me, Syria ahngpa loipoipuwa Ite muh leih yelak.

¹⁹Ahngpa-a meipe latyangpu yoijing kahmükte leihyelak, hüpoi I-a naowe tamlak hüyange I jingne tüopa-a ükümpa ne menglak.”

²⁰“Iphei me ülao ahngja peilak, aowe yoi shaoshanpalan yoi ahngching me moth jaalunlak jingne kahtalante kahngin kange shaine tamlak jingne shonne teilak. Hipak shohkünohpu mongme tüopa ahngpa-a toilak, ükhong sheshao me yeje yejema-a shapju me yeje.”

²¹“I nyoi me ünepupa Syria ahngpa-a, ahngne menglak wanglam yeshupu, kahta ümengja, hüpoi I mokhshe peilak hüyange lolamme wonga yahlak.

²²Iphei laa-kunge nyahponglan ngaipu hüyange ngaokhüm jonpu ahngpalan nehoi, omme moiteilak hüyange poihwinlak.

²³I jat üjoi ja me wanglam lamyapeyoi, teishinpu yahpu kaiye Iye ülao jatlan lowe tamlak, hüyange I-a wong shenang shenang she yonglak.

²⁴Iye moth pheipu yenghoi, deingao yephape chinghah lak hüyange Ijing pajeiyonglan aoyinne aope-o yelingpu toishao linglak. Tüophei me Iye wehok me ompu toinyunanha hüyange toinan Ipheite woipulante tamme phalak. Iye meipe latyangpulante shümlak jingne tümlak, hüpoi I hipak-a mamshe linne tailak.”

²⁵“Heye ahngpate shümlak jingne Iye mongyongpu phei nyahpong üngang tümme ngailak, aowe wongnangpu nyahponglan üngang phei hokke naowe yetamlak jingne tümlak. Hüpoi heye ahngpa-a lowetamlak hüyange okpu ye-ngelak.

²⁶Iphei she-opu tongtahpalan-e I-a menge tamlak. Ijing wetaipalan maawe toilak, hüyange I jing nyahponglan-a kinnewinlak.

²⁷Tüophei me ahngpa ni-a khao ja me hahlak jingne shotlak, hüpoi iman-a ümengpa juteih phei ngohlak, hüyange imniye jawe jate ngaoleih ilak, iman-e hanghe yahhuwe teih yetüolak, hangjingne ima-a tüopa jingne hipak üne-o manngoi.

²⁸“Apye ahngpa-a Kahwangpa kahtalan mengpu wanglam mahtamlak she teihyange, Iye nyieye omme yahpu khongkümpu phei nokte leih yelak. Ite meipupa kih Iye linglak hüyange tüophei me yoi kahmükte leih yelak.”

²⁹“Phei me Iye üne-o heye chinghahlak, hüpoi tüopa ünma-a toishao yoi yoi ne ngailak.

³⁰Rome lan yenglin me peilak hüyange Ite tienlak, hüyange I nyamlak.” “Hüwante mongshih ngaipu üyong phei I leih yelak hüyange Kahwangpa kahtalan mengpu wanglam mahtamlak jingne nganglak. Aoyinne tüopa mengpu wanglam winne tüohyapeih tüolan-e hengpu yahyange I woilak.

³¹Ijing wetaipalan ütam-e khümjinga nuweshakke tamlak. Iman-e nyihjeih she toidopu lakke tamlak, hüyange yawinmongpaipu ngaitamlak.

³²Lowelampu linge ahngpawe aoyinne yoi mengpu wanglam winne tüohyapeih tüolan-e jampu tüolak, hüpoi aoyinne Kahwang pheite woi iman-e hokke yonglak.

³³Kahtalan yomepu kentamongtingpu woipalan-e iman me ngohpu konjong kahtalan maapute tamme hanlak. Hüpoi ütenjapu mongme iman ütam-a shapju me toilak yejema-a li ne tamme sheaklak, hüyange ütam-a shaoshi ne tamlak hüyange küpnok me phowe anglak.

³⁴Aope toilangpu ngohlakei, Kahwangpa kahtalan-e hüke iman phei jampu maapuwe yoite meilak teihyange lüppe lowe lingyapoi jampu üjingha tüolak.

³⁵Tüolan kentamongtingpu woipalan ütam-a toilak, hüpoi hükihwe lingpu kaiye kahtalan-a jaowe shalak. Tüokihwe Kahwange itpu hipak üküm manngoi manngoi yelakpe ngohlak.

³⁶“Hüwante ahngpawe Ite meipupakih linglak. Kahwanglan üshei phei I sheyong pupa she, Ütahpa Kahwang phei nehoi shetokpupa she I otalak. Kahwange Ite shaoshiyateng phapu hipak manngoi manngoi she Iye tüopakihwe lingpu oklak. Iye hangke tümyangki khakshuwe Kahwange linglak.

³⁷Ijing pajeiyonglan-e shaoshanpu Kahwang, hüyange shekolan-e kenpu Kahwangte ahngpawe hangko yeteihlak. Ütingpa me Iye kahwang lilite hangko yeteihlak, hangjingne ima-a iman moilan phei I sheyongpupa she Iye teihlak.

³⁸Tüoleima, iye yomteplan yinne tampu kahwangte Iye yihnoonlak. Ijing pajeiyonglan-e aope-o ye-yop yekhümpu kahwang jate Iye hon, khüm, toinyu long, hüyange ülao hünghao ümei phalak.

³⁹Yomteplan yomlak jingne Iye aoyinne ülao jat Kahwangte yoppe khümnang tüolan kahta jonlak. Aoyinne I-a wanglam lampa üyong she yah imante Iye yihnoonpu phalak, shaoshanpu yafün üyong me iman angtamlak, hüyange imante ta-mee ja leye kahtok phalak.”

⁴⁰“Aope apye ahngpa jingne ükümpa hipakne shaaji owe pei, heye ahngpawe Ite shümlak; hüwante Syria ahngpawe pongtongtoi hei koiponglan, hüyange yenglin üngang phei I wong kümme yüpnyeih leipu kihwe hokke yelak. Yeng muleampu kih-e, Iye kahmük maawe chinghahlak.

⁴¹Iye janpu kahtok nehoi chinghahlak hüyange haja tokte toilak; hüpoi Edom, Moab, hüyange Ammon kahmüklan mepu hanghe towe tüoh yinpu oklak.

⁴²“Aope Iye tüolan kahmüklan chinghahlakei, Egypt nehoi panne yetüohlak.

⁴³Iye Egyptlan-e lowe angpu toinyu nanha hon hei khüm hüyange ülao pheeiwanpu moth yahtailak. Iye Libya hei Sudan chinghah tamlak.

⁴⁴Hüwante heong hei apyekao mepu peipu ngaolan-e Ite nyamne tamlak, hüyange Iye nyamlakpa ne kahtalan üngang toine tamme hoklak.

⁴⁵Iye yengching hei ümeken me Khümjing yongyapeih tüopa üjao kahtang nipa me yoi ahngpa nyenok üyonglapa nehoi welak. Hüpoi tüoken me Ite jamponglak ao-o yenangpe, I lilak.