Read Konyak Naga DANIEL 12 Bible Online

DANIEL 12 - Konyak Naga bible

DANIEL 12

¹“Tüohipak me wangdang shongmokpa üyongpa Mikhael, aowe numan kahtalan yomnang peilak. Hüwante shangpu hipak ja, jatlan ngaiyang phei me shemengpupa ne ngaipu peilak. Aope tüopa hipak peilakeih, numan jat mepu kahta üshei aoyin min Kahwangpa Laitep me nyanyange ngoh yinlak.

²Aoyin liteiye ngoh, üngang nishe yange yelak: ütam-a jintepu üyin tüolak, hüyange ütam-a jinte wüotüopu phei shanglak.

³Kentamongtingpu woipalan-e wangdang müktishiwapu khongkümpu kih-e teehelak. Hüyange aoyinne kahtalan maapute hanghe khakshupu-a ngoh tüopa linglak jingne nyüoyangpulan-e shanhalan kih-e jin jinte teehelak.”

⁴“Hüpoi sha-a, Daniel, laitep-a küptüoh hüyange kahtoknyu üküm manngoi manngoi tüopa me füosange tüpyange angtüoh. Maapu tai tai ye ye she phetlak, hüyange shingmanpu (ümengpa) jalunlak.”

⁵Hüwante tao, Daniel-e lei kahta ni yengyin nah ükao japong me yongyange nge.

⁶Imni yo me shejawe yengyin ütokye me shejai she ngohpu shongmokpate tong, “Hatüo yashanyalipu toishaolan üküm ngoiye pei eipe hangshin laowe ngohlak?”

⁷Wangdang shongmokpawe moini yak wangte hong hüyange üküm yenangpu Kahwang min me lahnyik mongkopu janpu ja yah. Iye ipu taowe hüke jai, “Tüopa-a wangpeng lüm phei me tangkhüw. Aope Kahwangpa kahtalan shanghah shaoshine tampu üküm ngoilakei, tüolan toishao khongküm ngaiye kümlak.”

⁸Iye hanghe i taowe jai, hüpoi taowe shinge ye-ok. Tüokhei taowe tong. “Hüpoi, Üyongpa, hangke tüolan khongküm üküm ngoilak?”

⁹Iye jan, “Shaapa-a nang taitüoh, Daniel, hangjingne tüolan ngaowa üküm manngoi manngoi jaowe shawe hüyange füosange tüpyange anglak yang.

¹⁰Kahtalan maawe yoi nying nyingke hüyange iman nying nyingke he-enge, hüyange jaoshalak. Hüpoi aoyin nuweshak nang iman-e nuweshakpu linglak; hüyange ünulan aowe-o yeshing oklak, hüpoi yelakpe nuweshakke ngohlak; hüpoi aoyin kentamongting iman-e shingeyahpu oklak.”

¹¹“Nyihjeih toidopu lakpu hipak mepu, hüyange nulakpa yawinmongpailakpa yoi nyoi me angpute ngoiye, nyih haja ja gho ni phei me detu ngohlak.

¹²Aoyinne nyih haja ja gho lüm delüm me nga ngoipute linne ütinglakpu phei ngohlakei iman mongmeilak!”

¹³“Hüyange nang, Daniel, üküm ngoiye ütinglaktüoh. Hüwante nang lilak, hüpoi üküm hipak me nangjing khintak tüolak jingne nang lüolak.”