Read Konyak Naga DANIEL 3 Bible Online

DANIEL 3 - Konyak Naga bible

DANIEL 3

¹Ahngpa Nebuchadnezzarwe honne lingpu peshao daopute yakkong dewok hüyange khaopute yakkong wok ling, hüyange Iye tüopa-a Babilon yenghoi Dura kahjee me yonge ang.

²Tüophei me Ahngpawe üyonglan khongkümpu - ahnghalan, governorlan, nyüoweleipalan, commissionerlan, nginpalan, kahphünpalan, pongtehpalan, hüyange yenghoi mepu ülao üyonglan khongkümpu jamshe jemlak jingne ngaokeng pha. Iman-a ahngpa Nebuchadnezzarwe hanghepa peshao linge yongyapeih tüopa jaowe tamlak jingne omlak.

³Hüwante üyih-üyonglan, governorlan, nyüoweleipalan, nginpalan, kahpalan, pongtehpalan, hüyange yenghoi mepu ülao üyonglan khongkümpu Nebuchadnezzar ahngpawe yongtampu moung sheshao me iman yong. Aope Nebuchadnezzarwe yongtampu moung sheshao me iman yong,

⁴üngwüntampawe üngwünne shingne tam, “Jatlan tepu kahtalan, jatjalija tepulan, hüyange ngaojat ngaolilan;

⁵aope numan-e nyawong phei woiye peviwo, kongkilahha, kongkilanha, hüyange konglah wüngpu wüng jailak, hüyange tüophei me ülao kongtoilan khongkümpu jamlak. Hemwüng wangpu phei jamshe, numan-e Ahngpa Nebuchadnezzarwe yonge tampu hon peshaote khuhtawe yoppe khümlak.

⁶Aowe khuhtawe yoppe yekhümlakei loonge ngohpu vünjhomte mamshe shüplak.”

⁷Tüojingne, iman-e kongtoilan wüng jaipu phei jamshe jatlan kahta lili, jatja lijalan, hüyange chingnok liliye khuhta hüyange Ahngpa Nebuchadnezzarwe hanghepa hon peshao yonge ang, tüopate yoppekhüm.

⁸Tüopa hipak me Babilonlan ütam-e Jehudilante yaowe winlak jingne yafün ümei tüo.

⁹Iman-e ahngpa Nebuchadnezzarte i. “Nang Üyongpa, jintepu jingne üyin ngoh shih!

¹⁰O Ahngpa, kahta lili-e nyawong wüng, peviwo, kongkilahha, kongkilanha, hüyange konglak ülam maapu phei hem jaiwante khuhta khümlak, hüyange hon peshao te khümlak she nange ngaokhüm ling;

¹¹hüyange aowe khuh yetalakei hüyange yoppe yekhümlakei nünge vünjhomte phowe shüptamlak.

¹²Jehudilan ütam ngohnang aoyinte nange Babilon yenghoi te nokpu ne menge tam; Shadrach, Meshach, hüyange Abednego; aoyinne Nang Üyongpa ngaokengte ye-i-yeshe. Iman-e nangjing kahwangte yekhüm yejema-a nange yonge tampu peshaote khuh yeta.”

¹³Hüwante ahngpa yeonge mongshih loonge ngai hüyange kahta lüm-a I sheshao me woipeilak jingne ngaokeng pha.

¹⁴Iye imante i, “Shadrach, Meshach, hüyange Abednego, numan-e ü-kahwangte yoppe yekhümlak hüyange taowe yonge tampu hon peshaote khuh yetalak she ipuwa üting a?

¹⁵Tüoyangpoi sha-a, numan-e nyawong wüngpu, peviwo, kongkilahha, kongkilanha, konglah, hüyange ülao kongtoilan wüng jaipu phei jamshe peshaote khuhta tüoh hüyange yoppe khümtüoh. Numan-e hüke yelingma-a, mamshe numan-a loonge ngohpu vünjhomte shüplak. Numan yinne tamphalak ülao kahwang ngohnang she numan-e teih nang kü a?”

¹⁶Shadrach, Meshach, hüyange Abednego janne i, “Nang Üyongpa, toman-e toman nying nyingke yinne oklak jingne yenganglak.

¹⁷Ao te toman-e shaoshan tüopa Kahwange loonge ngohpu vünjhom mepu hüyange nang wong mepu toman yintampu okma-a, hümma-a Iye oklak.

¹⁸Tüoyangpoi Iye ye-okne ngaiyapoi, Nang Üyongpa hatüowa ütingpa hüke toman-e nangjing kahwangte yoppe yekhümlak, hüyange nange yonge angpu hon peshaote toman-e khuh yetalak.”

¹⁹Hüwante Nebuchadnezzar loishe mongshih ngai, hüyange Shadrach, Meshach, hüyange Abednegolante mongshih ngaiye I yoi sheta taakke ngai. Tüokhei Iye yoi kahtalante wangpangpute jak puphei üphong nyit nyeiye shemme vünloong jaklak jingne ngaokeng pha.

²⁰Hüyange Ijing nyahponglan yo mepu wong shenangpulante tüolan kahta lüm phowe shalak hüyange loonge ngohpu vünjhomte iman shüplak jingne ngaokeng pha.

²¹Tüokhei iman-e tüolante phakshaoh hei ngeng-ahng phakshaoh khongkümpu khakwange o ne tamyange shatam, hüyange loonge ngohpu vünjhomte iman shüppe tam.

²²Sha-a vünloonga loishe shemme jaklak jingne ahngpawe ngaokeng wongnange phapu jingne, aoyin yompalan-e tüolan kahta lüm vünloongte yahwen iman-o vünyi-e shuwe mah.

²³Hüyange Shadrach, Meshach, hüyange Abednego, shayange muh ngohpalan-a loonge ngohpu vün ümongte shüppe tam.

²⁴Mokhshe Nebuchadnezzar yashanpu phei I ya me yong. Iye yoijing shaoshanpalante tong, “Teman-e kahta lümte shayange hüyange iman-a loonge ngohpu vünjhomte shüppe tampu ne yeje a?” Iman-e janne i, “Eihya, teman-e hüke lingyangki, Nang Üyongpa.”

²⁵“Hümma-a hanghe taowe kahta peli vün yo me kemme ngepu?” she Iye tong. “Imante shayange yenang, hüyange imante mayahpu ümee hango yehüo; hüyange peli shepupa-a Kahwang kih-e ngenangki.”

²⁶Tüokhei loonge ngohpu vünjhom taten shongte ngoiye Nebuchadnezzar wen hüyange nyik, “Shadrach! Meshach! Abednego! Ütahpa Kahwang shaoshanpalan! Ngaikei!” Hüyange iman nünge ngai.

²⁷Ahnghalan, governorlan, nyüoweleipalan, hüyange ülao woipalan khongkümpu, aoyinte vünne hangko yeshei tüolan kahta lümte leilak jingne jem. Iman jing shangmin vünne yekui, iman jing inkheklan yehah, hüyange iman me vünkhuh üpe nehoi yenang.

²⁸Nebuchadnezzarwe i, “Shadrach, Meshach, hüyange Abednego, Kahwang minyong tüoh! Iye yoi shongmokpa shon hüyange tüolan kahta aoyinne I shaoshan hüyange Ite ütinglak iman yinne tam. Iman-e ü-ngaokengte ye-i-yeshepe ling hüyange imanjing yoi Kahwang tokte kaiye ülao Kahwangte khuhtawe hüyange yoppe khümpu ngohleima she iman-e yoi üyin me shaoshi nge.”

²⁹“Hüyange sha-a taowe ngaokeng phangnang hüke jatmepu, jatja lija mepu, yejema-a chingheinoklan ütam-e Shadrach, Meshach, hüyange Abednegolan Kahwangte ye-i-yeshepe ngaongao ma-a, I-a yung ja mepu yung ja she phakke khoih tamlak, hüyange I nok-a mete khoih-e heamme tamlak. Tüo kih-e yinne tamlak ülao Kahwang ao-o yenang.”

³⁰Hüyange ahngpawe Shadrach, Meshach, hüyange Abednegolan-a Babilon yenghoi me ütahpa yafünte inne tam.