Read Konyak Naga DANIEL 4 Bible Online

DANIEL 4 - Konyak Naga bible

DANIEL 4

¹Ahngpa Nebuchadnezzarwe kahtoknyu mepu kahtalan üshei, jatlante, hüyange chingheinoklan khongkümpute tüopa ngaolan shonne tei: “Numan phei chingmei ngohtüoh!

²Ütahpa Kahwange hanghe üte hüo tüopa füo hüyange yashanyalipu ü-jengte jaitüoh.

³“I jing yepinlakpa hangshin yongpu! I jing yashanyalilan hangshin wongnangpu! I jing ahngchinga üküm yenangpu ahngching, hüyange Iye wanglam lampu jintok te jin ngohlak.”

⁴“Taowa ü-ahngnok me jalunpu üyong phei, yeonge wangngoiye nyoi ngohyangki.

⁵Hüpoi taowe nyamlakpane shinmang ja nge, hatüowa aope tao shiye ngohyapeih fajümlihlakpa ne himang ngetam.

⁶Tüokhei Babilon ahngching me tongtahpalan khongküm ü-shongte woi peilak hüyange iman-e shinmangte leppuwa hanghe üte iye tamlak jingne taowe ngaokeng pha.

⁷Hüwante yaknyanleipalan, yepahipalan, hi-nganlan, hüyange shanhilan khongkümpu woipei, hüyange taowe imante ü-shinmang iye tam; hüpoi iman-e tüopa üte khoih itampu ye-ok.

⁸Tüophei me Daniel pei ngoi. (Ite ü-kahwang min leiye Belteshazzar she-o nyik). Üjao Kahwang yaha Ime ngoh, tüokhei taowe hanghe mangyangki Ite i. Taowe Ite i:

⁹O Belteshazzar, yepahipalan yo me ütahpa, nangme Üjao Kahwang yaha ngoh nang she taowe shingnang, hüyange tüokaiye kahnyingwüngha khongkümpu nange shingnang. Hatüome ü-shinmang ngoh nang. Tüopate leppu hanghe üte ipha.”

¹⁰“Aope tao shi ngohyapeih, kahtoknyu hotan me yeonge daopu pee ja ngaipu taowe himang me nge.

¹¹Tüopa-a sheyong sheyong she wangte ngoiye jonge yong hüyange kahtoknyu me ngohpu moilanne ngepu okke ngoh.

¹²Tüopatepu üyaklan-a yeonge shemeiyaoma-e, hüyange tüopa me kahtoknyu nopuwe hahlak jingne wange pelicke maayange ngoh. Tüopa tepu yashüm me phao yinmoklan toloimei, tüopatepu pequilan me awhalan-e ülüp ling, hüyange yinmoknyuha ülam liliye tüopa tepu pelick hah.”

¹³“Aope taowe himang jeng teih-e yelakpe ngohyapeih, hüwante wangdang mepu wangdang shongmokpa ja tümyange hüyange deitah puphei yupu taowe nge.

¹⁴Iye ngaowüng üyong phei üngwün, ‘Pee akke taitamtüoh hüyange tüopatepu pequilan langtüoh; tüopa tepu üyaklan khaitam tüoh hüyange tüopa tepu ülicklan shaitam tüoh. Tüopa phang me ngohpu yinmoklan hüyange tüopa üquilan me ngohpu awhalan jang tüoh.

¹⁵Hüpoi peejüngpa-a yanshoha phei hüyange shakphan yanne kamyange kahtok me tüotüoh. Tüoken kahko me hüng yo me tüotüoh. “ ‘Sha-a tüopa kahta tangme nyai hütne (yeine) tamtüoh hüyange yinmoklan hei phümha yo me I nyoi ne tamtüoh.

¹⁶Kahta kenmong mepu I jeileine tamtüoh, hüyange yinmok kenmong Ite phatam tüoh. Hüyange I tangme hipak nyit me linne tamtüoh.

¹⁷Tüopa-a tümyange hüyange deitahpu pheipu wangdang shongmokpalan taisho ngohnang. Tüojingne, üken phe mepu kahta liliye shingne tamtüoh hüke kahtalan ahngching tangme Ütahpa Kahwang wong ngohnang hüyange ja ja hepa iman yomepu Iye lepupate hüke ye-i-yeshepu kahtalante nehoi phalak.’

¹⁸“Tüopa-a taowe mangyangpu üja” she Ahngpa Nebuchadnezzarwe i. “Sha-a, Belteshazzar, tüopate leppu hangheshi üte ipha. Ü-ahngnok tongtahpalan aowe-o üte ipu ye-ok, hüpoi nange-a oklak, hangjingne ima-a üjao Kahwang yaha nangme ngoh nang.”

¹⁹Hüwante Daniel, ao te Belteshazzar she-o nyik, I jamloi mokhyange hango ye-i-okpe ngai; Ahngpawe Ite i, “Belteshazzar, shinmang hüyange tüopatepu ngaolan-e nang mokhne tahtam.” Belteshazzarwe janne i, “Nang üyongpa, shinmang hüyange tüopa khoih tampuwa nang jingne yeje nangjing wepalan jingne minngaishih she taowe teihnang.

²⁰Nange ngepu pee, loishe daopuwe wang ngoiye, kahtoknyu me ngohpu moilanne ngepu okke ngoh.

²¹Tüopa tepu üyaklan-a shemei yaomapu phei, hüyange kahtoknyu nopute uhying oklakne tüopa me pelick wangmanne ngoh. Phao yinmoklan tüopa phangme toloimei, hüyange awhalan-e tüopa pequilan me imanjing ülüp ling.”

²²“Nang Üyongpa, tüopa daowe hüyange wongnange ngohpu pee-a nang ngohnang. Nang loishe kheyong hüke wang ngoiye nang ong, hüyange nang wanglam lampu wonga kahtoknyu nopu tangme ngoh.

²³Aope Nang Üyongpawe leiye ngohyapeih, hüwante wangdang mepu wangdang shongmokpa ja yu hüyange i, ‘Pee-a aktamtüoh hüyange tüopa-a mahtamtüoh, hüpoi peejünga kahtok me tüotüoh. Tüopa neikonne yanshoha hüyange shakphan yankam me shatamtüoh, hüyange kahko me tüopa-a hüng yo me tüohtüoh. Tüopa kahta tangme nyai yütne tamtüoh, hüyange tüoken me phao yinmoklan phei wangpeng nyit ngoh ne tamtüoh.’

²⁴“Hüma-a, hanghete leppu tüowa hatüo ngohnang, Nang Üyongpa, hüyange Ütahpa Kahwange hanghe ngaiye iyangki tüopa-a nangte ngailak.

²⁵Kahta ükhong yo mepu nanga jange teilak hüyange phao yinmoklan phei ngohlak. hipak wangpeng nyit linne mantai mantai nange mahu üponge hahpu kih-e hüng hahlak, hüyange kahko me shilak, ümeken me nangte nyai yütlak. Hüwante Ütahpa Kahwange kahtoknyu ahngching khongkümpute wanglam lamnang she hüyange hüke Iye leye yahpu jajahepate pha nang she nange shinglak.

²⁶Peejünga kahtok me yalah phei tüohlak jingne wangdang shongmokpawe ngaokeng pha. Tüopate leppuwa aope nange Kahwange kahtoknyu nopute wanglam lamnang she janne peilakeih hüwante nang nishe ahngne menglak.

²⁷Tüokhei, Nang üyongpa, taowe henge tampu yahtüoh, ünu lingpu laktüoh, hanghepa üting lingtüoh, hüyange toinanpalante shüpshe tüoh. Hüwante nang jaalunpu yelaklak.”

²⁸Tüolan khongkümpu Ahngpa Nebuchadnezzarte ngaiyangki.

²⁹Lekeng pen me ni shaha pheime, aope Babilon me yoi ahngnok noktok me I kemme ngohyapeih,

³⁰Iye i, “Leihuyah Babilon hangshin yongpu! Taowe tüopa-a ü-ahngjong chingnyune ü-wong hüyange okkeshangpu, ü-müktishiwa hüyange nahlangpu hüolak jingne lingyangki.”

³¹I ju mepu ngao man i shope, wang mepu ngaowüng jawe ngao, “Ahngpa Nebuchadnezzar, Taowe hanghe i jaiyah! Nang ahngching wonga sha-a nangmepu yah teiteki.

³²Nanga kahta ükhong mepu jange teilak, phao yinmoklan phei ngohlak, hüyange mahu üponge hahpu kih-e hüng (phümha) hahwe wangpeng nyit jingne ngohlak. Hüwante kahtanyuha ahngching tangme Ütahpa Kahwang wong ngohnang she hüyange Iye lepu jajahepate tüolan-a Iye pha tamnang she nange shinge peilak.”

³³Nünge mokhshe ngaowa ütingne menge pei. Kahta ükhong yo mepu Nebuchadnezzar jange tei, hüyange mahu üpong kih-e hüng hah. I tangme nyai yüt, hüyange Ijing shangmin awlan yang laopu shinne lao hüyange I jing yakkhinlan-a awha yakhin shinne lao.

³⁴Aope itpu wangpeng nyit linyapeih, “Taowe wangyete nganne lei, hüyange ü-juteih menghawe ye, she ahngpawe i. Taowe Ütahpa Kahwangte yihlupu pha hüyange aowe jintepu jingne ngoh Ite yihnoonpu hüyange müktishiwapu pha.” “Iye jintepu jingne wanglam lamlak, hüyange I ahngchinga jinte üküm yenangpe ngohlak.

³⁵Iye kahtoknyu kahtalante hangke-o yeteihpe leinang; wangdang me wangdang shongmokpalan hüyange kahtok me kahtalan-a Iye wanglam lampu phangme ngohnang. Iye teihpute laayonglak yejema-a Iye hanghe ling tüopate hangne she tonglak ao-o yenang.”

³⁶“Aope ü-juteih menghawe ye, üte yihnoonpu, taowe okkeshangpu, hüyange ü-ahngching müktishiwapulan üte phawe yeyangki. Ü-shaoshanpu üyonglan hüyange lwngwanglan-e tao mongmei sheiye yah, hüyange üshongwante yihnoonpu phei shenyei she yihnoonne üte ahngching wong phawe yeyangki.”

³⁷“Hüyange sha-a, Tao, Nebuchadnezzarwe Wangdang Ahngpate yihlupu, yihnoonpu, hüyange müktishiwapu phanang. Iye lingpu sheminlam phe-a shunang hüyange ütingpa, hüyange aowe otapu phei linge yahnang Iye khayne tampu oknang.”