Read Konyak Naga DANIEL 5 Bible Online

DANIEL 5 - Konyak Naga bible

DANIEL 5

¹Belshazzar ahngpawe yoi üyih-üyonglan haja jingne mo üyong tüm, hüyange haja sheshao me Iye wuwüngti ying.

²Wuwüngti-e naoyange Belshazzarwe, Ipa Nebuchadnezzarwe Jerusalem Khümjing mepu kiye peipu hon hei khüm wan hüyange tük-ha shengha yahpeilak jingne ngaokeng pha. Ahngpawe tüolan-a I, yoijing üyih-üyonglan, yoi shekonyulan, hüyange yoi phongphenyulan-e tüolan me yinglak nanjingne yahne shon.

³Hüwante muh iman-e Jerusalem Kahwang nok mepu yahpeipu hon wan hei tükhashengha lan yah pei, hüyange ahngpa hüyange I jing üyih üyonglan, I jing shekonyulan hei I jing phongphenyulan, iman khongkümpuwe tüolan me wuwüngti ying;

⁴hüyange hon, khüm, shakphanyan, yanmei, pee hüyange longe lingpu kahwanglan yihlu.

⁵Mokhshe kahta yak yaklan ja ngai hüyange shitte phoyange ngohpu ahngnok jant me, ümeken me vüntük mepu wangngai phei shemei she phihlange tee tüoken me nyanne wang. Hüyange hüke nyanne ngohwante ahngpawe yak-a nge.

⁶Hüwante Ahngpa sheta nyakke mah hüyange jamloi she nyam tüokaiye I yatuh nin.

⁷Ahngpawe yepahipalan, hi-nganlan, hüyange shanhilan woi peilak jingne Iye üngwün. Aope iman peingoi, ahngpawe imante i, “Numan yo me ütamjawe tüopa nyanpu iye ok hüyange tüopa hanghete leppu üte iye tamma-a tüopate ahngpa oleng pheipu ngeng-ahng phakshaoh shaoh-e tamlak, yihnoonpu hüowe I üngme hon yük yükke tamlak, hüyange ahngching me lüm shepupa shotjing wong phalak.”

⁸Ahngpate tongtahpalan ngaiye wang, hüpoi iman aowe-o nyanyangpuwa ipu ye-ok yejema-a tüopate leppu hanghe ahngpate ipu ye-ok.

⁹I mongshangpu üyong kaiye Ahngpa Belshazzar shewong shewong she sheta nyakke ngai, hüyange Ijing üyih üyonglan-a hang linglak juteih yenangpe mah.

¹⁰Ahngpa hüyange üyih-üyonglan-e langmanne moppu ahngyha nyuwe jai hüyange mongmeimo nyoite ong. Yhawe i, “Nang Üyongpa jinte üyin ngohshih! Chingmei lamlinge teshinne mong tahshang hüyange sheta nyakke tahmah.

¹¹Nang ahngching me kahta ja ngohnang ao me Üjao Kahwang yaha Ime ngohnang. Aope nangpa ahngne ngoh, tüopa kahtawe juteih ümei, shingemanpu, hüyange konheingao Kahwangpa konheingao kih-e hüowe ngohyangki. Hüyange nangpa ahngpa Nebuchadnezzarwe I-a yaknyanleipalan, yepahipalan, hi-nganlan, hüyange shanhilan tepu ütahpa ne linge tamyangki.

¹²Ime nganheilong pheipu nyoingoh ngoh nang, hüyange shinmang lüppe tamlak, nüngneipu ngao lüppe okpu, hüyange kahnyingwüngha khoih iye oklak jingne deitahpu hüyange shingeokpu wong ngohnang; tüokhei tüopa kahta Daniel, ao te ahngpawe Belteshazzar she minne tam tüopa jingne shontüoh, hüyange tüolante leppu hanghe khongkümpu Iye iphalak.”

¹³Ahngpa shongte Daniel mamshe woipei, hüyange ahngpawe Ite i, “Nanga phowe teiye angpu Jehudi ao ahngpa üpawe Judah mepu yahpei tüopa Daniel a?

¹⁴Üjao Kahwang yaha nangme ngohnang hüyange nangme konheiwong hüyange shing okpu juteih ngohnang she taowe jaiyangki.

¹⁵Tongtahpalan hei yepahipalan tüopa nyanpu hüyange tüopate leppu hanghe iye tamlak jingne woipei, hüpoi tüopate leppu iman-e yeshing ok.

¹⁶Sha-a hüke tüopate leppu ülu nange tüowe oklak hüyange kahnyingwüngha-a khoih ipu oklak she taowe jaiyangki. Nange tüopa nyanpu iye okma-a hüyange tüopa-a hanghete leppu üte ima-a, nangte ahngpa oleng pheipu ngeng-ahng phakshaoh shaoh-e tamlak, yihnoonpu hon yük nang üngme yükke tamlak, hüyange ahngching me lüm shepupa shotjing wong phalak.”

¹⁷Daniel-e janne i, “Nang hünghaolan-a nang jingne angtüoh yejema-a tüolan-a kahta ütamte phatüoh. Nang üyongpa jingne hanghe nyanyangki taowe ipha ning hüyange tüopate leppu hanghe nangte ipha ning.”

¹⁸“O Ahngpa, Ütahpa Kahwange nangpa Nebuchadnezzar-a ahngyongpa ne linge tam hüyange Ite kheyongpu hüyange nahlangpu pha.

¹⁹I jamloi yongelüo tüokaiye jatlan tepu kahta lili, jatlilan, hüyange chingnoklan khongkümpu Ite nyam hüyange ninyangki. Iye ütamja toihuma-a, hüke toi; Iye kahta ütam angne tamhuma-a hüke angne tamyangki. Ütamjate yihnoonhuma-a yejema-a mongmengne tamhuma-a Iye hüke lingyangki.

²⁰Hüpoi I ota, juteih woowemah, hüyange mengshipu jingne I-a yoi ahngpa shotjing mepu yanne tam hüyange Ite yihnoonpu yafün mahyangki.

²¹I-a kahta ükhong mepu jangetei, hüyange I kenmonga yinmok kenmongne menge mah. I phao gadolan phei ngoh, mahu üpong kih-e hüng hah, hüyange nyai yütpu mepu Ite büanglak ne hango yenangpu kahko me I shiyangki. Ükümne Iye Ütahpa Kahwange kahtanyuha ahngchinglan tangme wanglam lamnang hüyange Iye aoyinte monge teih tüolante phanang she shinge pei.”

²²“Hüpoi Iha, nange nang nying nyingke tüolan khongkümpu nange shingyahpeyoi innenyaiye üye.

²³Nange wangdang Youngwanpa phei tüi-e toiling hüyange I jing Khümjing mepu yahpu wan hei tükhashengha yahpeine tam. Nang, nangjing üyih üyonglan, nangjing shekonyulan, hüyange nangjing phongphenyulan ne tüolan me wuwüngti ying hüyange hon, khüm, shakphanyan, yanmei, pee, hüyange long phei lingpu kahwanglan, hanghepawe ye-nge oklak yejema-a yejailak hüyange hango shinge ye-oklak lante yihlupu pha. Hüpoi aowe nang üyin yahteilak hei üyin me anglak juteih nang hüyange aowe nange lingpu sheminlamphe tangme wanglam lamnang tüopa Kahwangte nange yihnoonpu yepha.

²⁴Tüojingne tüopa ngaolan nyanlak jingne Kahwange yak shonyangki.”

²⁵“Hanghe nyanyangki hatüowa tüo ngohnang: MENE, MENE, TEKEL hüyange PARSIN.

²⁶Hüyange hanghete leppu hatüowa tüo; MENE, Kahwange nang ahngchinga iye leiteki, hüyange tüopa-a üküm ngoine tamteki.

²⁷TEKEL, nanga toklak me tokyangki hüyange jamloi tok me ye-ong.

²⁸PARSIN, nang ahngchinga tam-e shoteki hüyange Medes hei Persialante phateki.”

²⁹Hüwante Belshazzarwe nünge I shaoshanpalante ahngpa oleng pheipu ngeng-ahng phakshaoh Danielte shaohtamlak jingne hüyange yihnoonpu hüowe I üngme hon yük yükke tamlak jingne ngaokeng pha. Hüyange ahngching me yafün lüm shepupa wanglam lampane Iye I linge tam.

³⁰Tüoya muh Babilon ahngpa Belshazzar toi;

³¹hüyange Medepa Dariuswe ao hüwante nyupuh wangpeng dewok me ni lwngmei ne ngoh, Iye ahngchinga nyieyeyah.