Read Konyak Naga DANIEL 6 Bible Online

DANIEL 6 - Konyak Naga bible

DANIEL 6

¹Dariuswe I ahngching nopu me toi linglak jingne governorlan (satrap) gho ja phei me da lelak tüm.

²Tüo tokte paowe Iye iman tangme üshangpalan lüm, Daniel hüyange ülao kahta ni governorlante paowe tüklak hüyange ahngpa toishaolante leilak jingne omme le.

³Daniel-e mamshe muh Ipheipu üshangpa ni yejema-a governorlan phei shemei she lingyah okpu hüo. Hangjingne ima-a I-a jamloi minngaipu kahta ne menge, ahngpawe I-a ahngching nopu me yakjongpa ne menge tamne mong.

⁴Hüwante ülao üshangpa ni hüyange governorlan-e Daniel-e ahngching me wanglamlampu me püohpinpu ülam ja nehoi ngeyashi she ngang, hüpoi iman-e yetüo, hangjingne ima-a Daniel-a khakshupu hüyange yeshupu yejema-a ye-i-yeshepu hango yeling.

⁵Iman-e jawe jate tei ngao, “Teman-e Iye mengpu wanglam yekao me ümeng yepho pheima-a Daniel me teman-e püohpinpu hango yetüolak yang.”

⁶Tüokhei governor hei üshangpalan ahngpa tangte pei hüyange i, “Ahngpa Darius, Nang üyongpa jinlaowe ngohshih!

⁷Nang ahngching me toman aoyinne shaoshanne wanglam lamnang, üshangpalan, governorlan, nyüoweleipalan, hüyange ülao woipalan khongkümpuwe Nang üyongpawe linglak ngaokhüm phatamlak hüyange tüopa-a khakshuwe jonne tamlak monge yahteki; Hüke nyih delüm mongme aowe-o ao kahwang mepu-o hango tongne yetamlak yejema-a Nang üyongpa mepu tokte kaiye kahta ao mepu-o hango yetonglak she ngaokeng phatüoh. Aowe tüopa ngaokeng kailakei yengkong mailange maawe ngohpu khokte shüppe tamlak.

⁸Tüokhei Nang Üyongpawe tüopa phashih hüyange tüopa me füo tüpshih, hüyange tüopa-a Medelan hei Persialan-e yeshaipe yejeilei okpu ngaokhüm ja ne jonlak.”

⁹Tüokhei ahngpa Dariuswe ngaokengte füotüp.

¹⁰Aope ngaokengte füotüppe tamteki she Daniel-e shinge pei, I nokte leihye. Inok mepu ütangpa tüp me Jerusalem yete lüppe tawo ja ngoh. Tüoken me, Iye hipak lep iye lingpu kih-e epyange ngohpu tawo me yatuh shing, hüyange nyihja me Kahwangte lümme yop.

¹¹Aope Daniel wepalan-e Iye Kahwangte yoppu ngeyeküp,

¹²iman khongkümpu jamshe Danielte ümeng phalak jingne ahngpa tangte pei. Iman-e i, “Nang Üyongpa, hüke ünepu nyih delüm mongme nangmepu tokte kaiye kahta ütam-e Kahwang ütam mepu yejema-a kahta ütam mepu ülam ja nehoi tongma-a, yengkong mailang üngang ngohpu khokte shüppe tamlak she nange ngaokeng te füotüp yangki.” Ahngpawe janneye, “Üting, wanpu ngaokeng, Medelan hei Persialan ngaokhüm, jeileine ye-oklakpa.”

¹³Hüwante iman-e ahngpate i, “Daniel, Judah mepu phowe teipu yo me ja, Iye Nang Üyongpate yejema-a nange phapu ngaokengte ye-i-yeshe. Iye nyihte yeshaipe lümme yopnangki.”

¹⁴Aope Ahngpawe tüopa jai, I yeonge mongshang hüyange Daniel yinlak jingne Iye okpu shinne ülam yam. Wanghe mannyip mannyip I ngange ngoh.

¹⁵Hüwante kahtalan ahngpa tangte leih ye hüyange Ite i, “Nang üyongpawe shingnang hüke Mede hei Persialan ngaokhümme ahngpawe hanghe ngaokeng phayangki jeileine ye-oklak.”

¹⁶Tüokhei ahngpawe Daniel pholak jingne ngaokeng pha hüyange yengkong mailange maa ngohpu kahsa te I-a shüppe tam. Ahngpawe Danielte i, “Nang Kahwang aote nange mongphünne phawe shaoshan nang, Iye nang yintam shih.”

¹⁷Kahsa üjute long jawe küppe tam, hüyange ahngpawe yoi füosange tam hüyange yoi jing üyih-üyonglan füosang longtang me tüppe tüoh, hümme nakshih aowe-o Daniel yintam ne ye-oklak.

¹⁸Tüophei me ahngpa-a ahngnokte leihye hüyange hahying yejema-a motappu hango yelingpe, shipu ye-okpe pha-yang.

¹⁹Wangngai phei jamme ahngpa shinlüo hüyange yengkong mailang kahsate mamme wen.

²⁰Aope I tüoken ngoi, mongshangpu phei Iye üngwünne nyik, “Üyin Kahwang shaoshanpa, Daniel! Nange teshinne mong phawe shaoshanpu Kahwange yengkong mailanglan mepu yintampu okya?”

²¹Daniel-e ahngpate jan, “O Ahngpa, jinte üyin ngohtüoh!

²²Ü-Kahwange yoi wangdang shongmokpa shon hüyange yengkong mailanglan ju küppe tam tüokaiye iman-e üte hangko yeling. Iye tüopa ling hangjingne ima-a üme hang ümengo yenangshe Iye shing hüyange taowe nangte ümeng yeling, Nang üyongpa.”

²³Hüwante Ahngpa loishe mongmei hüyange kahsa mepu Daniel shuiye ngailak jinge ngaokeng pha. Tüokhei iman-e I shuiye ngai hüyange Ite hang üko-o yeshapu iman-e nge, hangjingne ima-a Iye Kahwangte ütinglak.

²⁴Hüyange ahngpawe aoyinne Danielte ümeng pha tüolan kahta khongkümpu pholak jingne ngaokeng pha, hüyange iman-a imanjing shekonyulan hei imanjing hayimlan phei jamme yengkong mailange maawe ngohpu kahsate shüppe tam. Iman-e kahsa ükong ngoishao memuh yengkong mailanglan-e iman tangme onge shük hüyange iman waan khongkümpu paiye tam.

²⁵Hüwante Ahngpa Dariuswe kahtoknyu jatlan kahta, jatlilan, hüyange chingheinoklan khongkümpute nyan: “Numan phei chingmei ngohtüoh!

²⁶Taowe ngaokeng phanang hüke ü-ahngching nopu me moilanne Daniel jing Kahwangte nyam tüoh hüyange iyeshetüoh.” “I-a üyin Kahwang, hüyange Iye jinjinte wanglam lamlak. I ahngchinga aope-o yemah oklak, hüyange ünganwonga aope-o üküm yenanglak.

²⁷Iye yintamnang hüyange tükke angnang, Iye wangdang me hüyange kahtoknyu me yepinlakpa hüyange yashan yali lingnang. Iye yengkong mailanglan-e toilak mepu Daniel yinne tamyangki.”

²⁸Tüokhei tüopa Daniel Darius wanglam lampu hipak me hüyange Perisialan Cyrus wanglam lampu hipak me jaalunne ngohyangki.