Read Konyak Naga DANIEL 7 Bible Online

DANIEL 7 - Konyak Naga bible

DANIEL 7

¹Babilon me Belshazzar ahngne mengpu üwangpa wangpeng me, Daniel-e mang ja mang hüyange wangnyak me himang ja nge. Iye shinmanga nyanne ang, hüyange tüoya Iye hanghe nge,

²nyanne angpu hatüo ngohnang. Tao, Daniel-e himang hüke nge: Wangyanga ükenphe mepu lei hüyange yengching tangme shütte lei.

³Yengching mepu yinmok ünyu peli lüowe ngai, japa-o japa-o ülaolan phei yoiyoi ne ngohyangki.

⁴Üwangpa-a leilak me yengkong mailang kih-e ngoh, hüpoi awlan kih-e yangteng ngohyangki. Aope taowe leiye ngohyapeih, yangtenga phünne yei. Yinmok-a nongai hüyange kahta yongpu kih-e yongne tam. Hüyange tüopate kahta kenmong phawe tam.

⁵Nishepupa yinmok müklei me shapnyu kih-e Ijing ya kaoja phei yong. Tüowe Ijing fa pa me heampa leakwaan lüm jepyange ngoh, hüyange ngaowüng jawe tüopa i, “Taitüoh, nange okpu shinne mei hahtüoh!”

⁶Aope taowe leiye ngoh, yinmok ülao ja ngai. Tüopa-a leilak me shengtüp shah kih-e, hüpoi tokphei yeme yangteng peli, awha yangteng kih-e hüyange tüopa me üshang peli ngoh. Tüopa jingne wanglam lampu wong ngohnangpu kih leiye ok.

⁷Hüke taowe leiye ngohwante, peli shepupa yinmok ngai. Tüopa-a wongnangpu phei, nyamlakpa ne, hüyange mokhlakpa ne ngohyangki. Itepu yanfa üyong phei khoihpaine tam, hüyange tüolan tangme yashoppe tam. Ülao yinmoklan kih yejepe, tüopa me üwong pen nyimyange ngoh.

⁸Aope taowe tüolan üwongte khak-ange leiye ngoh, ülaolan yo me üwong üjoiha ja ngaipu taowe nge. Tüopawe tüome ngohpu ülao lümma bheiye lüoh-e win. Tüopa üwong me kahta mük nangyange hüyange otapu phei ngaopu ju ja nangyange ngohyangki.

⁹Aope taowe leiye ngoh, ahngpa shotjinglan nyoi ja me ange nge. Sheja aowe jinjintepu jingne ngohpei ahngpa shotjinglan yo me jate shot. Ijing inkheklan-a yi hengpu kih-e heng, hüyange Ijing shangminlan-a jaoshepu mat kihwe. Ijing ahngpa shotjinga vünloong pheipu Tükni tangme, vün phihlangpu phei,

¹⁰hüyange vün yengyin ja ngai hüyange I sheshao mepu ngaiye yün. Haja tokte haja-e I shaoshan; hüyange haja pen tokte haja pen I sheshao me yong. Ghonyoi mepuwe toishao ükong wang, hüyange laiteplan ep.

¹¹Aope taowe leiye ngoh, üwong üjoipawe ngaoyong ngaopu taowe yelakpe jai. Hüke taowe leiye ngohwante, peli shepupa yinmok-a toi, hüyange tüopa pümma vünloong te shüp hüyange mahtam.

¹²Ülao yinmoklanpa-a imanjing wonga yahtei, hüpoi hipak ityangpu mongme iman üyin me ngohlak jingne tam.

¹³Tüopa himang mongme wangnyak me, hanghepa müklei me kahta ja lepu taowe nge. I-a wangphom-e neikonyange ü-shongte owe pei, hüyange ao jinjinte ngohpeipupa ngoh tüopa tangte I wen hüyange Ite I phawe tüoh.

¹⁴Ite wanglam lamlak, yihnoonpu, hüyange ahngpa wong pha, tüo kaiye jatlan kahta liliye jatlilan, hüyange chingheinoklan-e I shaoshanpu oklak. Iye wanglam lampuwa jinte ngohlak, hüyange I ahngchinga aope-o mahne ye-oklak.

¹⁵Taowe ngeyangpu himange üte mokhne tam, hüyange üte yeonge shaoshine tam.

¹⁶Tüolan yongyange ngohpu yomepu sheja tangte tao wen, hüyange tüolan khongkümpu üte khoih ilak jingne tong. Tüokhei tüopate leppu Iye üte i.

¹⁷Iye i, “Tüolan yinmok üyong peli-a hanghepa kahtoknyu me ngailak ne ngohpu ahngching peli ngoh tüo ngohnang.

¹⁸Hüyangpoi Ütahpa jing Üjaolan-e ahngchinga tüolak, hüyange tüopa ahngchinga jinjintepu jingne yahlak hüke jinjinte üküm yenangpe ngohlak.”

¹⁹Hüwante taowe peli shepupa yinmok jeng ünyei shinghuwe teih, hanghepa ülaolan kih-e yeje nyamlakpa yinmok hangheye Iye mahne tampulan Itepu shakphan yan yakkhin hei yanfa phei khoihne tam hüyange tüolan tangme yashoppe tam.

²⁰Hüyange I shang mepu üwongpen jeng hüyange kenja ngohyange ngaipu üwonge ülao üwong lüm yeine tampu jeng taowe shinghuwe teih. Tüopa me mük nyimyange hüyange otamaohepu phei yongelüopu ju nyimyange ngoh. Tüopa ülaolan khongkümpu phei nyamlakpa ne ngoh.

²¹Aope taowe leiye ngohyapeih, tüopa üwonge Kahwangpa kahtalan phei wehok hüyange iman okke tam.

²²Hüwante ao jintepu jingne üyin ngohyapeih tüopa peingoi hüyange Ütahpa Kahwange kahtalante jampu ngaophünpu jaine tam. Kahwangpa kahtalan-e wanglamlampu wong tüolak hipak pei ngoiteki.

²³Üte khoih itampuwa tüopa ne ngohyangki. “Pelishepupa yinmok-a pelishepupa ahngching kahtoknyu me ngailak hüyange ülao ahngchinglan khongküm puphei yoi yoine ngohlak. Tüopawe kahtoknyu nopu mahtamlak hüyange yalokke phün khoih-e taitamlak.

²⁴Üwong pen-a ahngpalan pen aowe tüopa ahngchingte wanglam lamlak. Hüwante ülao ahng ja ngailak; I-a üwangpalan phei yeonge yoi yoi ne ngohlak hüyange ahngpalan lümma naowe tamlak.

²⁵Iye Ütahpa Kahwang phei tüi-e ngaolak hüyange Kahwangpa kahtalante shangne tamlak. Iye imanjing mengpu wanglam ngaokhüm hüyange motappu jeileitam ne nganglak, hüyange Kahwangpa kahtalan-a wangpeng lüm phei me tangkhüw jingne I wong phang me ngohlak.

²⁶Hüwante wangdangpa ngaophünjing ghonyoi me shotlak, I wong yahteilak, hüyange I-a lanshe mahne tamlak.

²⁷Kahtoknyu ahngchinglan wong hüyange kheyongpu khongkümpu Ütahpa Kahwang kahtalante phatamlak. Iman jing ahng wanglam lampu üküm yenanglak hüyange kahtoknyu wanglam lampalan khongkümpuwe iman shaoshanlak hüyange imante ngaojailak.”

²⁸Hatüowa tüopa jeng üküm ne ngohyangki. Tao jamloi nyam hüke tao sheta nyakke mah, hüyange sheminlamphe ü-nying nyingke taowe ang.