Read Konyak Naga DANIEL 8 Bible Online

DANIEL 8 - Konyak Naga bible

DANIEL 8

¹Belshazzar ahngne mengpu wangpeng lüm shepupa me, tao Daniel-e nishepupa himang nge.

²Himang me Elam yenghoi jantpenyu peyang phei Susa chingnyu me tao ü-nying nyingke mokhshe ngohpu ne ngoh. Taowa Ulai yengyin nah me yong,

³hüyange tüoken yengyin nah me lüolüngpu üwong ni nyimyange, üwong ja-a japa phei ülane shemeng hüyange shelao she nangyange nyeepong ja taowe nge.

⁴Ijing üwong phei nyeeponge henyipte, apyete, hüyange heyete shupute taowe leiye ngoh. Yinmok jawe nehoi Ite lakne tampu ye-ok yejema-a I wong mepu yeyin ok. Iye Ite meipupakih ling hüyange jamloipu wong me jong.

⁵Aope tao hatüo hanghete leppu she nüngneiye ngohwante, henyip yekao mepu younpong ja yeonge, jamloi phetpu jingne Ijing yawe kahtokte nehoi yeletpe phette pei; Ijing mük ni pa me mongjüongpu üwongja Ime nyimyange ngoh.

⁶Hanghepa yengyin nah me taowe yongyange nge, tüopa nyeepong shongte I pei, hüyange I wong sotkümme pei ngoi.

⁷Iye nyeepongte shümpute taowe leiye ngoh. I jamloi mongshih ngai tüokaiye Iye Ite lük hüyange üwongni phakke tam. Nyeeponga powe oklak jingne wong yenang. I-a kahtokte toonne shüp hüyange ya lokke tam, hüyange nyeepong yinne tamlak jingne ao-o yenangpe ngoh.

⁸Younpong jamloishe jong khan jong, hüyangpoi I wong nange tahlangpu hipak me Ijing üwonga phak. Tüopa nyoi me moilan yoiyoi yekao me meeyange mongjü-ongpu üwong peli ngai.

⁹Tüolan üwong peli yome pu ja me üwong üjoiha ja ngai, hanghepa wanglam lampu wong heyekao hei heong yekao hüyange shemeiyaomapu kahtok yekao ngoiye tai.

¹⁰Wangdang nyahponglan te shümpu okke wongnange jong, shanhalan imante naopu okke hüyange iman yomepu ütam-a kahtokte shüppetam hüyange iman tangme yalokke tam.

¹¹Wangdanglan nyahpong woipate nehoi Iye naoyim, Ite nyihjeih toidopu phapu lakne tam, hüyange Khümjing yejaoyeshape linge tam.

¹²Nyihjeih shepu toidopu meimeiye phahah shepu nanleiye kahtalan-e tüoken me ünu ling, hüyange ütingpa mengpu wanglam-a kahtokte shüppe win. Iye lingpu sheminlamphe me üwonge okpu ngeyangki.

¹³Hüwante wangdang shongmokpa jawe ülao japate tongpu taowe jai, “Hangshin hipak laowe himang me ngepu toishaolan-a ngohwenlak shi? Hangshin laowe nulakpa ünuwe nyihjeih she toidopu nanleiye ngohlak shi? Hangshin me wangdang nyahponglante hüyange khümjingte yalokke tampu laowe ngohlak?”

¹⁴Ülao wangdang shongmokpawe janpu taowe jai, “Tüopa-a nyih haja ja gho ja phei me denga mongme yelakpe ngohlak, tüolan nyih mongme ünpongme hüyange shomme toidopu yedolak. Hüwante Khümjinga linge yelak.”

¹⁵Himangte leppu hanghe shinge yahlak jingne tao ngange ngoh, hüwante mokhshe ü-sheshao me kahta lepu ütamja yong.

¹⁶Ulai Yengyin tangmepu nyikpu ngaowüng ja taowe jai, “Gabriel, Iye hanghe nge tüopate leppu Ite iye tam tüoh.”

¹⁷Gabriel wen hüyange üphinme yong, hüwante tao loishe nyamme mokh hüyange Kahtokte lamme ta. Iye üte i, “Hangko kahta, tüopate leppu shinge yahtüoh. Tüopa himanga kahtoknyu üküm jeng inang.”

¹⁸Iye ü-phei ngaowe ngohwante, tao kahtokte miengngawe, lamme ta. Hüpoi Iye üte jon, ü-ya phei tao yongne tam.

¹⁹Hüyange i, “Taowe nangte Kahwangpa mongshih ngaipu hangke ngailak hüowe tamnang. Himanga kahtoknyu üküm hipak jeng ngohnang.”

²⁰“Nange ngepu üwongni pheipu nyeepongte leppuwa Media hüyange Persia ahngchinglan.

²¹Younpongte leppuwa Greece ahngching, hüyange Ijing müknipa me ngaipu üwongte leppuwa üwangpa Ahngpa.

²²Aope üwangpa üwong phakwante üwong peli ngai tüopate leppuwa ahngching peli ne ngaiye tamlak hüyange üwangpa wongnangpu shinne wongnangpu ye-oklak.”

²³“Aope tüolan ahngching üküm ngoilak shongte owe peilakeih hüyange iman jamloi nuweshakke tüokaiye imante shangne tamlakne ngailakei, juteih woopu, leihkheihpu, hüyange lowelampu ahngpa ngailak.

²⁴I wongnange jonglak, hüpoi I yoi wonge yeje. Iye nyamlakpa ne mahtampu ngaitamlak hüyange Iye lingpu lamphe li me okpu ngelak. Iye wongnangpu kahtalan tangme hüyange Kahwangpa yoi kahtalan tangme mahtampu yahpeilak.

²⁵I hahnyakpu jingne, yoi lowelampu me Iye okpu ngelak. I yoi nying nyingke otalak hüyange deingao yephape kahta maawe mahtamlak. Iye üshei phei sheyongpupa ahngpa nehoi nuweshakke tamlak, hüpoi kahtanyuha hang wongo yejonpute I-a mahne tamlak.

²⁶Tüopa himang ünme hüyange shomme toidopu jeng hanghepa nangte khoih iyangki tüopa-a ütingme peikülak. Hüpoi sha-a tüopa-a lowe angtüoh, hangjingne ima-a tüopa ütingme ngaiye peilak jingne hipak nangjange ngohnang.”

²⁷Tao, Daniel, towenyai hüyange nyih nangjange dak. Tüophei me tao lao hüyange ahngpawe üte tampu toishao te leih ye, hüpoi himange üte nüngneine tam hüyange tüopa jeng shinge ye-ok.