Read Konyak Naga DANIEL 9 Bible Online

DANIEL 9 - Konyak Naga bible

DANIEL 9

¹Mede jat Ahasuerus üha Darius üwangpa wangpeng me, aohe Chaldealan (Babilon) ahngching tang me ahng ne mengtam-e ngoh;

²Iye wanglam lampu üwangpa wangpeng me, taowe üjao laitep yamme ngoh hüyange Youngwanpawe hipa Jeremiate ngaowe tampu kih-e hüke wangpeng denyit mongme Jerusalem heamlak teih ngoh.

³Hüyange taowe mongpha puphei Youngwanpa Kahwangte, Ite yoppe towe nyaoweleye, monnye inyange, hüyange tüpla yo me shotyange yop.

⁴Taowe ü-Kahwang Youngwanpate yop hüyange ü-kahtalan ünu jan. Taowe i, “Youngwanpa Kahwang, nanga kheyong nang, hüyange toman-e nangte yihnoon nang. Nange jiengjeppu me nange khak shuwe ngohnang hüyange aoyinne nangte kennang hüyange nange hanghe ngaokeng pha lingpalante nange yelakpe kennang.

⁵Toman-e ünu omyangki, toman-e yeshupe ngoh, toman-e püohpin yangki. Nange tomante hanghe linglak jingne ngaokeng pha toman-e yeyah hüyange nange tomante hanghepa üting hüo tüopa mepu toman lüppe tai.

⁶Toman-e nang shaoshanpa hipalan aowe nang min me toman ahngpalante, toman jing wanglam lampalante, toman jing pajeiyonglante, hüyange toman jatlan nopute ngaoyangki toman-e yejai.

⁷O Youngwanpa, nanga khakshupupa, hüpoi toman-e toman nying nyingke hipak phe me wüolakpa yahpei. Tüopa-a toman khongkümpu jingne ütingpa aoyin Judah hei Jerusalem hüyange Israellan üshei tangme aoyin nange ü-o me hüyange üjaime jange yanne tam hangjingne ima-a iman-e nangte üting yelakpu kaiye.

⁸Tomanjing ahngpalan, tomanjing wanglam lampalan, hüyange tomanjing pajeiyonglan-e wüolakpa ne toi ling hüyange nang phei tüi-e ünu ling, Youngwanpa.

⁹Toman-e nang phei tüi-e hokke weyapoi, nange-a shüpshe phei hüyange ünu winpu ok.

¹⁰Aope nange tomante ngaokhüm kih-e nyoilak jingne hanghepa nange tomante nang shaoshanpa hipalan kaiye pha, toman-e nangte yejai, O Youngwanpa toman Kahwang.

¹¹“Israel khongkümpuwe nang ngaokhümlan meng hüyange nange hanghe iyangki yejailak jingne lan. Toman-e nang phei tüi-e ünu om, tüojingne nang shaoshanpa Mosa Ngaokhüm me nyanpu phoiwümpulan nange toman tangme peine tam.

¹²Nange toman hüyange toman jing wanglam lampalan phei tüi-e linglak she hanghe iyangki nange lingetam. Kahtoknyu mepu ülao chingnyulan üshei phei shemeng she nange Jerusalemte yemeipe shaoshiyateng ne tam;

¹³Mosa Ngaokhüm me hanghepa shaoshiyateng phalak she iye ngoh khongkümpu tomante pha. Sha-a nehoi, O Youngwanpa toman Kahwang, toman ünu mepu lüppe yepu kaiye yejema-a nang ütingpa pheite woipu kaiye nangte monghahwe tamlak jingne toman-e ye-ngang.

¹⁴Nang, O Youngwanpa toman Kahwang, tomante shaoshi yateng phalak jingne tümyangki, hüyange nange hüke pha, hangjingne hanghepa üting nange jinte lingnang, hüyange toman-e nangte yejai.

¹⁵“O Youngwanpa toman Kahwang, nange nang kahtalan Egypt mepu yah peipuwe nang wong nange hüoyangki, hüyange nang wonga yelakpe teih tüonang. Toman-e ünu lingyangki, toman-e yeshupu lingyangki.

¹⁶Lintepu hipak me nange toman yinne ang, tüokhei Jerusalem jingne shaaji mongshih tahngai. Tüopa-a nangjing chingnyu, nang jing üjao kahtang (Zion). Toman ünu hüyange tomanjing pajeiyonglan-e lingpu ünu ümeng jingne yupi jatlan mepu kahtalan khongkümpuwe Jerusalem hüyange nangjing kahtalante yaowelepu phei leinang.

¹⁷O Kahwang, taowe yoppu hüyange yoppetongpu jai pha. Nangjing khümjing linge yetampha, hanghepa menge tamyangki; tüopa linge yenetampha hümme nakshih moilanne nanga Kahwang she shinglak.

¹⁸Tomante jaipha, O Kahwang, tomante leipha, hüyange toman ponghümpu shangshih, hüyange nangmin yahyange ngohpu chingnyu shaoshipute leipha. Toman-e nangte yopnang hangjingne, nanga shüpshe puphei, toman-e shuwe lingyangpu jingne yeje.

¹⁹Youngwanpa tomante jaipha; Youngwanpa, tomante ümeng winpha. Youngwanpa tomante jaipha, hüyange toi lingpha! Kahta liliye nanga Kahwang she shinglak jingne shonne tahngoh! Tüopa chingnyu hüyange tüolan kahtalan-a nangjing ngohnang.”

²⁰Aope Tao yelakpe yoppe, ü-ünu hüyange ü-kahta Israellan ünu janne, hüyange Youngwanpa ü-Kahwangte I jing Üjao Chingnyu linge yelak jingne yoppetonge ngohyapeih,

²¹aope tao yoppe ngohyapeih, Gabriel, ao taowe ü-üwangpa himang me nge, ümeken me tao ngohyapeih tüokente puwe tawe ngoi. Tüopa-a ünpong me toidopu dopu hipak ne ngoh yangki.

²²Iye khoih i, “Daniel, himang hanghe shi, nange shinglak hüyange konjong nangte shinge tamlak jingne tao tüome peinang.

²³Aope nange Kahwangte yoppetonglak jingne ükong wang, Iye nangte janpu pha. Iye nangte kennang, tüokhei tüopate leppu hanghe nangte janpu phalak jingne tao peiyangki. Sha-a aope taowe himang khoih iyapeih mong phayah.”

²⁴“Wangpeng denyit nyit me shinne laowe nang kahtalan lantampu tüo eipe hüyange nangjing Üjao Chingnyu ünu hüyange ümeng mepu lantam eipe Kahwange hipak itteki. Ünu lingpuwa ümeng wintamlak hüyange üküm yenangpu khakshupupa eppetamlak, tüokaiye himang hüyange itpuwa ütingme ngailak, hüyange Üjao Khümjinga nishe jaowe tamlak.

²⁵Tüopa nyanne yahtüoh hüyange tüopa shinge yahtüoh: Jerusalem linge yelak jingne ngaokeng phapu hipak mepu Kahwangpawe lepu woipa manpeipute ngoiye nyit nyit me wangpeng nyit linlak. Jerusalem-a püanglam üngang phei hüyange meipe latyange linge yelak hüyange nyit nyit me dewok me ni wangpeng ngohlak, hüpoi tüopa-a shanghah shaoshipu hipak ne menglak.

²⁶Hüyange tüopa hipak üküm ye me Kahwangpawe lepu woipa-a ngaoting ye-i-tampe toilak. Chingnyu hüyange Khümjinga wongnangpu wanglam lampa nyahponglan-e chinghahpuwe menge winlak. Muleampu kih-e üküm-a, hanghepa Kahwange tümyangki tüopa wehok hüyange mahtampu yahyange pei ngoilak.

²⁷Wangpeng nyit jingne tüopa wanglam lampawe kahtalan maapu phei mongjü-ongpu teijanpu yahlak, hüyange aope tüopa hipak tangkhüw linlakei, Iye toidopu dolak mepu lakne tamlak. Nyam nyam shepupa-a khümjing shedaopupa me ange tamlak hüyange hanghepa Kahwange I jingne tümme angpupawe manhüo manhüo tüoken me ngohlak.”