Read Konyak Naga HOSEA 1 Bible Online

HOSEA 1 - Konyak Naga bible

HOSEA 1

¹Hatüowa Beeri üha Hoseate Judah me Uzziah, Jotham, Ahaz, hüyange Hezekialan ahngne mengwante, hüyange Jehoash üha Jeroboam Israel ahngne mengwante Youngwanpawe phapu ngaolan ngoh nang.

²Aope Hosea kaiye Israelte Youngwanpawe üwangne ngao, Iye Hoseate i, “Taitüoh hüyange nokne mengtüoh; nenok shekonyu ne-a phwngngamnyu ngohlak, hüyange nang hayimlan-a yha mei mei kih-e ngohlak. Hatüo kih-e muh ü-kahtalan-e Tao tüohteki hüyange phwngngam teki.”

³Tüokhei Hoseawe, Diblaim yhala Gomer she minpu sheko ja yah; hüyange yha püm yekengpe ngaiye Ite netan naha puhtam.

⁴Hüyange Youngwanpawe Hoseate i, “Ite Jezreel she mintüoh, hangjingne ima-a Jezreel me Ijing pajeiyong Jehuwe toiye ünu ompu jingne Israel ahngpate Taowe shaoshiyateng pha eipe hipak laowe yengohlak. Taowe Jehu ahngching (Israel) üküm ngoine tamlak.

⁵Tüopa hipak me Taowe Jezreel kahjee me Israel wenglah phaktamlak.”

⁶Gomer me nishe püm yekengpe ngaiye moipai: tüopa-a sheko ne ngoh. Youngwanpawe Hoseate i, “Yhate ‘Yekenpu’ she mintüoh, hangjingne ima-a shaaji Taowe Israel kahtalante kenpu yehüolak yejema-a imante ümeng yewinlak.

⁷Hüpoi Judah kahtalante Taowe kenpu hüolak. Tao, Youngwanpa iman Kahwange iman yinne tamlak, hüpoi tüopa-a taowe wehok yanglow yejema-a wenglah hei lahhan yejema-a koiponglan hei koipong pheipu kahtalan kaiye yelinglak.”

⁸Gomerwe yhajing sheko nahate düam uhpu lakyang phei me yha üne-o püm yekengpe ngai hüyange netan ja puh.

⁹Youngwanpawe Hoseate i, “Ü-kahta Yeje she mintüoh, hangjingne Israel kahtalan-a ü-kahtane yeje, hüyange Taowa iman Kahwang ne yeje.”

¹⁰Tüoyangpoi Israel kahtalan-a iye ye-okpe yejema-a tokke heipu ye-okpe yengching pheih shinne ngailak. Sha-a Kahwange imante inang “Numan-a ü kahta ne yeje,” hüpoi hipak ja peiküki aope Iye imante ilak, “Numan-a Üyin Kahwang hayimlan!”

¹¹Judah kahtalan hüyange Israel kahtalan nishe shüppe jemlak. Iman-e iman jingne woipa ja lelak, hüyange nishe iman yoijing kahmük me jonglak hüyange jaalunlak. Üting Jezreel nyih-a nyih üyongne menglak!