Read Konyak Naga HOSEA 10 Bible Online

HOSEA 10 - Konyak Naga bible

HOSEA 10

¹Israel kahtalan-a wulickke maapu wulickwu kih-e ngoh. Iman hangshin jaalunyapeih, teshinne iman-e wümjonglan ling. Iman kahmük me hangshin hahying ngai, teshinne iman-e yoppe khümlak Üjao long shongnyulan shemei yaoma puphei iman-e ling.

²Iman mongjang me lowelamlak juteih phei ngoh, shaapa-a iman ünu jingne shaoshilak. Kahwange iman jing wümjonglan mengwinlak hüyange imanjing üjao shongnyulan menge winlak.

³Mamshe tüolan kahtawe hüke ilak, “Toman me ahng yenang hangjingne toman-e Youngwanpate yenyam. Hüpoi ahngpawe toman jingne hanghe lingpu oklak?”

⁴Iman-e ngao ükeng me leih kheihtam hüyange ngaoleih janpulan hüyange ühak yekohpu teishinpu yah. Ngaotingpa-a üleihpa ne meng, hamyangpu kah me jongpu hüng meng kih-e menge mah.

⁵Kahtalan aoyin Samaria chingnyu me nyoiyapeih, nyamlak hüyange Bethel me hon mahu üpong mahpu jingne mangshaplak. Iman hüyange ngengpalan aoyinne peshao shaoshan yangki tüopa tangme shaplak. Aope manneyange lingpu hon khokke yahlakei, iman shappe yoonglak.

⁶Peshaowa ahngpa üyongte poon ne Assyriate yahteilak. Ephraim-a mongshang mongmenglak, hüyange eiha kon yah-e yha kemyangpu jingne wüotüone tamlak.

⁷Yeng tangme phoonge teipu hankhüw kih-e Samaria ahngpa-a yah teilak.

⁸Israel ünu Aven ütang nyoijinglan-a, mah tamlak. Iman jing wümjonglan me huh hei huhwulan loonglak; hüwante iman-e kahtalante ilak, “Tomante büangpha”, hüyange kah-hoilante, “Toman tangme yeitam pha” she ilak!

⁹“Israel kahtalan-e iman-e Gibeah me ünu ompu hipak mepu ünu ompu yelak ok. Tüokhei Gibeah me wehokke iman omme yüolak.

¹⁰Aope Taowe mongeteihlakeih, Taowe iman shaoshine tamlak; aope iman-e ngaokeng mengpu üphong ni-e imante shalakeih, iman phei tüi-e jatlan jemlak.”

¹¹“Ephraim-a yeonge meiye thrimlei phayangpu mahu üha kih-e, tah noilak jingne tümyange hüyange monge ngoh yangki. Hüpoi yha jing shemeiyaomapu üngme sheam anglak jingne Taowe tümyangki, hüyange shewanpu toime yha anglak jingne tümyangki. Taowe Judahte kahlüohlak jingne hüyange Jacobte kah shinne kinlak jingne tamteki.

¹²Numan-e yoi jingne khakshupupa deitüoh, mongjüonge kenpu yahjemtüoh; numan-e yoi jingne kah üla hoktüoh; hangjingne hatüowa Youngwanpa yamlak hipak, hüyange I pei-e numan tangme khakshupupa shok tamlak.

¹³Hüpoi tüo nanleiye numan-e ümengpa dei hüyange tüopa lickpu numan-e wet. Numan-e tahleih iye ngaipu ülick numan-e hahyangki.” “Hangjingne ima-a numan-e numan jing pongtongtoi te hüyange numanjing wetaipalan üngang ngohpute monghümpu jingne,

¹⁴tüokhei numan kahtalan tangte wehok peilak, hüyange numan jing meipe latyangpu khongkümpu menge tamlak. Hatüowa aope ahngpa Shalman-e shapju me Betharbel chingnyu menge win tüo kih-e ngohlak, hüyange nyuyonglan hei imanjing hayimlan khoih-e li ne tamlak.

¹⁵Numan Bethel kahtalante hanghe peilakne ngoh, hangjingne ima-a fajümlihlakpa ne numan-e ünu lingyangpu jingne hüke ngailak. Shapju ükong wangpu phei jamshe Israel ahngpa-a lilak.”