Read Konyak Naga HOSEA 12 Bible Online

HOSEA 12 - Konyak Naga bible

HOSEA 12

¹Ephraim kahtalan-e shom mepu ün ngoiye lingpu sheminlamphe-a jajang japu hüyange menglakpa shaha. Menge lingetampu hüyange yakphei lükpu iman pa me ünyei ngai. Iman-e Assyria phei teijanpu yah hüyange Egypt phei pheeileihpu ling.”

²Youngwanpawe Judah kahtalan phei tüi-e ümengpa yahpeilak ngohnang. Iye üne-o iman-e lingpu toishao kih-e Israelte shaoshi yateng phalak. Iman-e hanghe lingyangki tüopa jingne Iye imante leih phalak.

³Naonyoi me Iye yoi jei ya-oong me tük, hüyange I kahta ne menge ngaiwante I Kahwang phei tok tei.

⁴Wangdang shongmokpa phei I pong hüyange Iye nao. I shap hüyange moiman jingne tongyangki. Hüyange Bethel me I tangte Kahwang pei hüyange Iphei ngao.

⁵Tüopa-a Ütahpa Youngwanpa Kahwang, Youngwanpa-a I min tüopa min me yoppe khümlak yang.

⁶Hüpoi sha-a, Jacob huhayim, numan Kahwangte ütinglak tüoh hüyange I tangte lüppe yetüoh. Mongjüonge hüyange ütingpa me ngohyah, hüyange numan Kahwange toi lingpu tanne nünne ngoh tüoh.

⁷Pheeileihpa aohe yak me ngaoleih pheipu toklak jon, Iye lüplolakte kennang.

⁸Ephraim-e i, “Toman haknang. Toman-e yatuhshao lingyangki. Hüyange ngaoting ye-i-pe toman hakke okpute aowe-o ümeng phane ye-ok.

⁹Hüpoi Tao, Youngwanpa nang Kahwang aowe Egypt mepu nang woitei, aope Tao phaonyu jong me numan tangte pei, hüwante numan-e linge ngohpu kih-e Taowe nang nishe nyenok me ngohne tamlak.”

¹⁰“Taowe hipalan phei ngao hüyange imante himang maawe pha, hüyange hipalan kaiye Taowe ü-kahtalante deingao pha.

¹¹Tüoyangpoi Gilead me peshaolante yoppe khüm, hüyange aoyinne tüolante yoppekhüm iman lilak. Gilgal me mahu üponglan toido, tüokhei tüoken mepu wümjonglan-a kahko me long phongpu ne hei menglak.”

¹²Jacob Mesopotamiate phette taine ngai, ümeken me Iye shekonyu yahlak jingne, ülao kahta ja jingne toi ling hüyange Ijing nyeeyom.

¹³Youngwanpawe Egypt me rha yatuhshao me ngohpu Israel kahtalan yinlak jingne hüyange imante paowetüklak jingne hi pa ja shon.

¹⁴Ephraim kahtalan-e Youngwanpate yeonge khah-e mongshih ngaine tam; iman toimeng jingne iman lilak wangnang. Iman-e I tangme wüotüone tamyangpu jingne Youngwanpawe imante shaoshiyateng phalak.