Read Konyak Naga HOSEA 2 Bible Online

HOSEA 2 - Konyak Naga bible

HOSEA 2

¹Tüokhei numan pheipu Israellante “Kahwang Kahtalan” hüyange Youngwanpawe kennang she nyiktüoh.

²Ü-hayimlan, yha shaaji ü-sheko ne yemeng yapoi, hüyange tao shaaji yha netanpa ne yemeng yapoi, numan jing nyuyong te yoppe tongtüoh. Yha, phwngngampu hei üsho yüopu laklak jingne yhate yoppe tongtüoh.

³Yha yelakma-a, yha puhpu nyih hangke ngoh hüke Taowe yha-a tangko ne khokke tamlak, Taowe yha-a hango yenangpu kahtok üko kih-e linge tamlak, hüyange yha-a yenglepuwe lilak.

⁴Yhajing hayimlante Taowe shüpshe yehüolak; iman-a yewüope üsho yüonyujing hayim.

⁵Hangjingne iman ünyuwe phwngngampu ling, yhawe iman moipailak jingne yewüope jon. Hangjingne yhawe i: “Tao ümailan tangte leih yelak, iman-e üte hahlak hei yinglak yeng, mat hei pengkhai, olive minnga hei wuwüngti phanang.”

⁶Tüokhei Taowe yhate huhphümtümp phei pepelak hüyange yha tailam tienlak jingne jant yonglak.

⁷Yha yoi mailan tangte phetlak hüpoi iman yeyüo oklak. Yhawe iman yamlak hüpoi iman yetüolak. Hüwante yhawe ilak, “Tao ü-üwangpa ü-netanpa tangte leih yening-hangjingne tao ngohyangpu phei-a tao sha-a ngoh lakpa shemei.”

⁸Yhate tahlick, wuwüngti, olive minnga, hüyange yhawe Baalte yoppe khümpu me jonpu hon hei khüm khongkümpu aowe pha nang tüowa Tao she yhawe aope-o yeshing.

⁹Tüokhei tah yahpu hipak me Taowe ü-hünghaolan tahlick hei wuwüngti yah yelak, hüyange yhate Taowe inkhek jingne phapu mat hei pengkhai yah teilak, tüokaiye yhawe yoi tangko yepang oklak.

¹⁰Yha jing mailan sheshao me taowe yha-a pümkeng me khokke tamlak, hüyange ü-wong mepu aowe-o yha yintamne ye-oklak.

¹¹Yha jing motappu khongkümpu yha lekeng lep iye hüyange wangpeng phe me mopulan hüyange yhawe nyüonyih yihnoonpu, yha mengpu wanglam me shüppe jempu lili Taowe üküm ngoine tamlak.

¹²Taowe yha jing wuwüngwu hei phuklick peelan, hanghe yhawe yoijing mailan-e imante uhyinglak jingne pha she yhawe inang Taowe mahtamlak. Taowe yhajing wuwüngkah hei pelick jonga wanwüng jengne linge tamlak; phao yinmoklan-e tüolan-a mah tamlak.

¹³Taowe yhate hipak ütenjapu jingne shaoshi yatengne tamlak hüke aope yhawe Baalte üpeameipu jakke hüyange yhajing juyük yahyange yhajing mailante jange taiwante yhawe Tao pemeiyangki she, Youngwanpawe ngaoyangki.

¹⁴Tüokhei Taowe yha-a nishe wanwüng jengte yah teilak; tüoken me Taowe kenpu ngaophei yha-a okpu ngelak.

¹⁵Yha me ngohyangpu wuwüngkah Taowe yhate phawe yelak hüyange Shangshih Kahjee-a monghümpu taten ne linge tamlak. Tüoken me yhawe yha naoyhaha ne ngohwante Egypt mepu yha ngaiwante lingpu kih yhawe üte janlak.

¹⁶Hüwante yhawe nishe üte yha netanpa she nyiklak, yhawe shaaji üte yhajing Baal she yenyüklak.

¹⁷Hangjingne Taowe yha ju mepu Baal min-a yahteilak, hüyange iman shaaji ye-ilak.

¹⁸Tüohipak me phao yinmok hei awhalan khongkümpu phei Taowe jiengjeppu linglak, tüokaiye iman-e ü-kahtalante mayephalak. Taowe üne-o kahmük mepu wehok tepu yonglah khongküm, yanglow hei wenglah khongkümpu yahteilak; hüyange ü-kahtalan chingmei me hüyange yinne nyoine tamlak.

¹⁹Israel, Taowe nanga ü-sheko ne linge tamlak; Tao ütingpa me hüyange monghümpu phei ngohlak. Taowe nangte yelakpe kenpu hüyange shüpshe hüolak hüyange jintepu jingne nanga üjingne linge tamlak.

²⁰Taowe ü-janpu anglak hüyange nanga üjingne linge tamlak, hüyange nange Taowa Youngwanpa she shingne tamlak.

²¹“Tüo nyih Taowe janlak she Youngwanpawe inang. Wangte taowe janpu phalak, hüyange iman-e kahtokte janlak.

²²Taowe kahmük me wai keine tamlak, hüyange kahtokke tahlick hei wuwünglick hüyange olive ngaine tamlak.

²³Kahmük me Taowe ü-kahtalan nyoine tamlak hüyange iman jaalunne tamlak. Aoyin kahtalante ‘Yeken’ she nyik-e ngoh, tüolante Taowe kenpu hüolak, hüyange aoyinte Taowe ‘Ü-kahtalan yeje’ she nyik, imante Taowe ‘Numan-a ü-kahtalan’ she ilak; hüyange iman-e ‘Nanga toman Kahwang’ she janlak.”