Read Konyak Naga HOSEA 4 Bible Online

HOSEA 4 - Konyak Naga bible

HOSEA 4

¹O Israel, Youngwanpa ngao jaitüoh. Tüopa kahmük me aoyin nyoiyapeih tüolan phei tüi-e Youngwanpawe ümeng phapu yahpeinang. “Kahmük me monghümlakpa yejema-a kenpu yenang, hüyange kahtalan-e üte Kahwang ja leye, shinge yahpu yenang.

²Jiengjeppu, ngaoleih, toilang, kuh, hüyange phwngngampu ling. Yakphei lükpu ngaikhan ngai, hüyange toilang iy shaipu ja phei me ja she ngai.

³Tüokhei kahmük-a wanne mahlak, hüyange tüopa me nyoipu shemin lamphe lilak. Yinmok hüyange awhalan khongkümpu, hüyange nyah nehoi lilak.”

⁴Youngwanpawe i, “Aowe-o kahtalante ümeng teitah pha yejema-a imante menge tahtee, Taowe yemeipe teihpuwa numan ngengpalante yemeipe teihnang.

⁵Wangnyak wangngai numan-e yemeipe püohpin, hüyange hipalan-e numan phei shemei she yeling. Taowe nang hümnoongnyu, Israel mahtamlak.

⁶Numan-e üte ye-i-yeshepu jingne ü-kahtalan mahnang. Numan ngengpalan-e üte ye-i-yeshe hüyange Taowe nyüopu yeyah, tüojingne Taowe numan yeyah hüyange ü-ngengpalan-e numan hayim yeyahtamlak.”

⁷“Numan jing ngengpalan hangshin phong, teshinne numan-e ü-phei tüi-e ünu ling, tüojingne numan minyong ngampai-a mongmeng ne Taowe linge tamlak.

⁸Ü-kahtalan ünu kaiye numan hakpa ne jong, tüojingne numan-e iman-a ünyei ünyei ünu omne tamhu nang.

⁹Kahtalan hangkihpu phei pong, tüopa jakihpu shaoshi yateng phei ngengpalan-a ponglak! Taowe numante shaoshi yatengne tamlak hüyange numan-e lingyangpu ünu jingne shümme tamlak.

¹⁰Numan-e toidopu numan jing meitam hahlak, hüpoi yelakpe muh seanyaolak. Numan-e ülick ngaitamlak kahwanglante yoppe khümlak, tüoyangpoi hayim yetüolak, hangjingne ima-a ülao kahwanglan pheite woilak jingne ü-mepu numan lüppetai.”

¹¹“Wuwüngti, ülang hüyange üla moiniye ü-kahtalan, iman jing juteih ümei mahtamnang.

¹²Pesho ja mepu ütahte ngaitamlak jingne ü-kahtalan-e tongnang! Iman-e hanghe shinghuwe teih shengshaoh jawe imante itamnang! Iman-e Tao tüohteki! Sheko ja üsho yüonyu ne menge mahpu kih-e, iman-e iman nying nyingke ülao kahwanglante phateki.

¹³Kahtang üshang üjao nyoilan me iman-e toidopulan phanang, hüyange kahkenglan me iman-e shedaopu hüyange üqui üyak pheipu pee shümphanglan me üpe meipulan jaknang, hangjingne ima-a peshüm phanga ngohujak-e meiye ngoh! “Tüo kaiye, numanjing yhala lan-e üshoyüopu toi ling, hüyange numan jing nyemnya lan-e phwngngampu ling.

¹⁴Tüoyangpoi tüopa jingne Taowe numan jing yhalalan hei nyemnyalante shaoshi yatengne yetamlak, hangjingne ima-a numan-e numan nying nyingke khümjing üshoyüopalan tangte tai, hüyange iman phei jamme numan-e ülao kahwanglante toidopu pha. Detngao me ipuke, ‘Juteih yenangpu kahtalan-a menglak.’”

¹⁵“Numan Israel kahtalan-e üte ütinglakpu yenang yapeyoi, Judahwe jakihpu toi ümeng me mintah om. Gilgal yejema-a Bethel me tahyop tahkhüm, yejema-a tüoken me üyin Youngwanpa min me janpulan tah ling.

¹⁶Israel kahtalan-a lwngkoipong shinne üngei ne meng. Hangke Taowe phümha yo me nyeehalan kih-e imante uhyinglak?

¹⁷Ephraimlan-a peshaolan phei, iman nying nyingke iman yoi lamte mintai yah.

¹⁸Wuwüngti üngang yingyangphei me, iman-e üshoyüopu toite lahnyik, yihnoonpupa nanleiye mongmengpa leng.

¹⁹Wangyange yoi yangteng me iman yah tai-e ngohnang, hüyange iman-e toidopu dopulan jingne iman wüokhüwwe ngohlak.