Read Konyak Naga HOSEA 5 Bible Online

HOSEA 5 - Konyak Naga bible

HOSEA 5

¹“Numan ngengpalan, tüopate jaiyah! Israel kahtalan, mong pha yah! Ahngnok phongne mengpu numan-e jaiyah! Ngaotingpa me numan-e ngaophünlak ne ngohshihpu, tüokhei ngaophünpuwa numan tangme peilak! Mizpah me numan-a tün ja ne meng. Tabor Kahtang me shaan ja saa:

²Acacia chingnyu me kahsa ülu ja, tüokhei Taowe numan khongkümpute shaoshi yateng phalak.

³Taowe Ephraim shingnang, hüyange Ü-mepu Israel lowe yenang; hangjingne sha-a, O Ephraim, nange nuweshakpu jonteki, Israel nushakke taiteki.”

⁴Iman-e lingpu ünu toishaowe iman jing Kahwang tangte leih yelak mepu kahtalante tien. Nuweshakpuwe imante wongnange tük, hüyange iman-e Youngwanpa yeshing.

⁵Jamloipu Israel kahtalan-e iman phei tüi-e üngwün. Ephraim ünuwe iman yashah hüone tam hüyange toita; hüyange Judah kahtalan iman phei toita.

⁶Youngwanpate toidolak jingne iman-e imanjing nyee hei mahulan yah, hüpoi tüopawe imante meipu hango yenang. Iman-e I ye-nge, hangjingne Iye iman tüohyangki.

⁷Iman-e Youngwanpate üting yelakpe ngohpei; imanjing chingyangha I jingne yemeng. Tüokhei shaapa-a iman hüyange imanjing kahmüklan-a mamshe mahtamlak.

⁸Gibeah me wehok nyawong wüngtüoh! Ramah me ngaowüng phatüoh! Bethel me shapju haatüoh! Shapju jingne, Benjamin kahtalan!

⁹Ephraim shaoshiyatenglak nyih peiküki, hüyange Israel-a heamme mahlak. Israel kahtalan, tüopa-a ütingpa me ngailak!

¹⁰Judah woipalan-e Israel chinghah teki hüyange yha mepu kahmük kuh yahteki. Tüokhei Taowe iman tangme muleampu shinne shaoshi yateng shokke tamlak.

¹¹Shangne tampuwe Ephraim-a shaoshi nang; yha jingne ütingpa me ngohshihpu kahmük yhawe mahne tam, hangjingne ima-a aoyin me phalak hango yenang tüolan tangte yha taine ngang.

¹²Taowe Ephraim tangme mah tampu hüyange Judah kahtalan tangme heamme tampu yahpeilak.

¹³“Aope Ephraim-e yha hangshin dakpu ngelakei hüyange aope Judahwe yhajing yoi mako ngelakei, hüwante ahngpa üyongte jampu tonglak jingne Assyriate Ephraim tailak, hüpoi Iye iman meitampu ye-oklak yejema-a imanjing mako meiye tampu ye-oklak;

¹⁴Yengkong mailang kih-e Taowe Ephraim hei Judah kahtalante shümlak. Taowe iman phünne khoihlak hüyange tüophei me iman tüohlak. Aope taowe imante shui ngailakei, aowe-o iman yintampu ye-oklak.”

¹⁵“Iman ünu jingne iman wangmanne manshang manshang hüyange Tao yamme manpei manpei Taowe ü-kahtalan winne tüohlak. Aoweshing iman shangpu me iman-e Tao yamne ngangne ok.”